অধ্যায় 6

6.1

বৈশংপায়ন উবাচ
দারুকোঽপি কুরূন্গত্বা দৃষ্ট্বা পার্থান্মহারথান্
আচষ্ট মৌসলে বৃষ্ণীনন্যোন্যেনোপসংহৃতান্

শ্রুত্বা বিনষ্টান্বার্ষ্ণেয়ান্সভোজকুকুরান্ধকান্
পাণ্ডবাঃ শোকসংতপ্তা বিত্রস্তমনসোঽভবন্

ততোঽর্জুনস্তানামন্ত্র্য কেশবস্য প্রিয়ঃ সখা
প্রয়য়ৌ মাতুলং দ্রষ্টুং নেদমস্তীতি চাব্রবীৎ

স বৃষ্ণিনিলয়ং গত্বা দারুকেণ সহ প্রভো
দদর্শ দ্বারকাং বীরো মৃতনাথামিব স্ত্রিয়ম্

যাঃ স্ম তা লোকনাথেন নাথবত্যঃ পুরাভবন্
তাস্ত্বনাথাস্তদা নাথং পার্থং দৃষ্ট্বা বিচুক্রুশুঃ

ষোডশস্ত্রীসহস্রাণি বাসুদেবপরিগ্রহঃ
তাসামাসীন্মহান্নাদো দৃষ্ট্বৈবার্জুনমাগতম্

তাস্তু দৃষ্ট্বৈব কৌরব্যো বাষ্পেণ পিহিতোঽর্জুনঃ
হীনাঃ কৃষ্ণেন পুত্রৈশ্চ নাশকত্সোঽভিবীক্ষিতুম্

তাং স বৃষ্ণ্যন্ধকজলাং হয়মীনাং রথোডুপাম্
বাদিত্ররথঘোষৌঘাং বেশ্মতীর্থমহাগ্রহাম্

রত্নশৈবলসংঘাটাং বজ্রপ্রাকারমালিনীম্
রথ্যাস্রোতোজলাবর্তাং চত্বরস্তিমিতহ্রদাম্

রামকৃষ্ণমহাগ্রাহাং দ্বারকাসরিতং তদা
কালপাশগ্রহাং ঘোরাং নদীং বৈতরণীমিব

তাং দদর্শার্জুনো ধীমান্বিহীনাং বৃষ্ণিপুংগবৈঃ
গতশ্রিয়ং নিরানন্দাং পদ্মিনীং শিশিরে যথা

তাং দৃষ্ট্বা দ্বারকাং পার্থস্তাশ্চ কৃষ্ণস্য যোষিতঃ
সস্বনং বাষ্পমুত্সৃজ্য নিপপাত মহীতলে

সাত্রাজিতী ততঃ সত্যা রুক্মিণী চ বিশাং পতে
অভিপত্য প্ররুরুদুঃ পরিবার্য ধনংজয়ম্

ততস্তাঃ কাঞ্চনে পীঠে সমুত্থায়োপবেশ্য চ
অব্রুবন্ত্যো মহাত্মানং পরিবার্যোপতস্থিরে

ততঃ সংস্তূয় গোবিন্দং কথয়িত্বা চ পাণ্ডবঃ
আশ্বাস্য তাঃ স্ত্রিয়শ্চাপি মাতুলং দ্রষ্টুমভ্যগাৎ