UtshovChapter 6
6.1
वैशंपायन उवाच
दारुकोऽपि कुरून्गत्वा दृष्ट्वा पार्थान्महारथान्
आचष्ट मौसले वृष्णीनन्योन्येनोपसंहृतान्
Vaishampayana uvacha
Darukopi kurungatva drishtva parthanmaharathan
Achashta mausale vrishninanyonyenopasanhritan
6.2
श्रुत्वा विनष्टान्वार्ष्णेयान्सभोजकुकुरान्धकान्
पाण्डवाः शोकसंतप्ता वित्रस्तमनसोऽभवन्
Shrutva vinashtanvarshneyansabhojakukurandhakan
Pandavah shokasantapta vitrastamanasobhavan
6.3
ततोऽर्जुनस्तानामन्त्र्य केशवस्य प्रियः सखा
प्रययौ मातुलं द्रष्टुं नेदमस्तीति चाब्रवीत्
Tatorjunastanamantrya keshavasya priyah sakha
Prayayau matulam drashtum nedamastiti chabravit
6.4
स वृष्णिनिलयं गत्वा दारुकेण सह प्रभो
ददर्श द्वारकां वीरो मृतनाथामिव स्त्रियम्
Sa vrishninilayam gatva darukena saha prabho
Dadarsha dvarakam viro mritanathamiva striyam
6.5
याः स्म ता लोकनाथेन नाथवत्यः पुराभवन्
तास्त्वनाथास्तदा नाथं पार्थं दृष्ट्वा विचुक्रुशुः
Yah sma ta lokanathena nathavatyah purabhavan
Tastvanathastada natham partham drishtva vichukrushuh
6.6
षोडशस्त्रीसहस्राणि वासुदेवपरिग्रहः
तासामासीन्महान्नादो दृष्ट्वैवार्जुनमागतम्
Shodashastrisahasrani vasudevaparigrahah
Tasamasinmahannado drishtvaivarjunamagatam
6.7
तास्तु दृष्ट्वैव कौरव्यो बाष्पेण पिहितोऽर्जुनः
हीनाः कृष्णेन पुत्रैश्च नाशकत्सोऽभिवीक्षितुम्
Tastu drishtvaiva kauravyo bashpena pihitorjunah
Hinah krishnena putraishcha nashakatsobhivikshitum
6.8
तां स वृष्ण्यन्धकजलां हयमीनां रथोडुपाम्
वादित्ररथघोषौघां वेश्मतीर्थमहाग्रहाम्
Tam sa vrishnyandhakajalam hayaminam rathodupam
Vaditrarathaghoshaugham veshmatirthamahagraham
6.9
रत्नशैवलसंघाटां वज्रप्राकारमालिनीम्
रथ्यास्रोतोजलावर्तां चत्वरस्तिमितह्रदाम्
Ratnashaivalasanghatam vajraprakaramalinim
Rathyasrotojalavartam chatvarastimitahradam
6.10
रामकृष्णमहाग्राहां द्वारकासरितं तदा
कालपाशग्रहां घोरां नदीं वैतरणीमिव
Ramakrishnamahagraham dvarakasaritam tada
Kalapashagraham ghoram nadim vaitaranimiva
6.11
तां ददर्शार्जुनो धीमान्विहीनां वृष्णिपुंगवैः
गतश्रियं निरानन्दां पद्मिनीं शिशिरे यथा
Tam dadarsharjuno dhimanvihinam vrishnipungavaih
Gatashriyam niranandam padminim shishire yatha
6.12
तां दृष्ट्वा द्वारकां पार्थस्ताश्च कृष्णस्य योषितः
सस्वनं बाष्पमुत्सृज्य निपपात महीतले
Tam drishtva dvarakam parthastashcha krishnasya yoshitah
Sasvanam bashpamutsrijya nipapata mahitale
6.13
सात्राजिती ततः सत्या रुक्मिणी च विशां पते
अभिपत्य प्ररुरुदुः परिवार्य धनंजयम्
Satrajiti tatah satya rukmini cha visham pate
Abhipatya praruruduh parivarya dhananjayam
6.14
ततस्ताः काञ्चने पीठे समुत्थायोपवेश्य च
अब्रुवन्त्यो महात्मानं परिवार्योपतस्थिरे
Tatastah kanchane pithe samutthayopaveshya cha
Abruvantyo mahatmanam parivaryopatasthire
6.15
ततः संस्तूय गोविन्दं कथयित्वा च पाण्डवः
आश्वास्य ताः स्त्रियश्चापि मातुलं द्रष्टुमभ्यगात्
Tatah sanstuya govindam kathayitva cha pandavah
Ashvasya tah striyashchapi matulam drashtumabhyagat