অধ্যায় 5

5.1

বৈশংপায়ন উবাচ
ততো যয়ুর্দারুকঃ কেশবশ্চ; বভ্রুশ্চ রামস্য পদং পতন্তঃ
অথাপশ্যন্রামমনন্তবীর্যং; বৃক্ষে স্থিতং চিন্তয়ানং বিবিক্তে

5.2

ততঃ সমাসাদ্য মহানুভাবঃ; কৃষ্ণস্তদা দারুকমন্বশাসৎ
গত্বা কুরূঞ্শীঘ্রমিমং মহান্তং; পার্থায় শংসস্ব বধং যদূনাম্

5.3

ততোঽর্জুনঃ ক্ষিপ্রমিহোপয়াতু; শ্রুত্বা মৃতান্যাদবান্ব্রহ্মশাপাৎ
ইত্যেবমুক্তঃ স যয়ৌ রথেন; কুরূংস্তদা দারুকো নষ্টচেতাঃ

5.4

ততো গতে দারুকে কেশবোঽথ; দৃষ্ট্বান্তিকে বভ্রুমুবাচ বাক্যম্
স্ত্রিয়ো ভবান্রক্ষতু যাতু শীঘ্রং; নৈতা হিংস্যুর্দস্যবো বিত্তলোভাৎ

5.5

স প্রস্থিতঃ কেশবেনানুশিষ্টো; মদাতুরো জ্ঞাতিবধার্দিতশ্চ
তং বৈ যান্তং সংনিধৌ কেশবস্য; ত্বরন্তমেকং সহসৈব বভ্রুম্
ব্রহ্মানুশপ্তমবধীন্মহদ্বৈ; কূটোন্মুক্তং মুসলং লুব্ধকস্য

5.6

ততো দৃষ্ট্বা নিহতং বভ্রুমাহ; কৃষ্ণো বাক্যং ভ্রাতরমগ্রজং তু
ইহৈব ত্বং মাং প্রতীক্ষস্ব রাম; যাবত্স্ত্রিয়ো জ্ঞাতিবশাঃ করোমি

5.7

ততঃ পুরীং দ্বারবতীং প্রবিশ্য; জনার্দনঃ পিতরং প্রাহ বাক্যম্
স্ত্রিয়ো ভবান্রক্ষতু নঃ সমগ্রা; ধনংজয়স্যাগমনং প্রতীক্ষন্
রামো বনান্তে প্রতিপালয়ন্মা;মাস্তেঽদ্যাহং তেন সমাগমিষ্যে

5.8

দৃষ্টং ময়েদং নিধনং যদূনাং; রাজ্ঞাং চ পূর্বং কুরুপুংগবানাম্
নাহং বিনা যদুভির্যাদবানাং; পুরীমিমাং দ্রষ্টুমিহাদ্য শক্তঃ

5.9

তপশ্চরিষ্যামি নিবোধ তন্মে; রামেণ সার্ধং বনমভ্যুপেত্য
ইতীদমুক্ত্বা শিরসাস্য পাদৌ; সংস্পৃশ্য কৃষ্ণস্ত্বরিতো জগাম

5.10

ততো মহান্নিনদঃ প্রাদুরাসী;ত্সস্ত্রীকুমারস্য পুরস্য তস্য
অথাব্রবীত্কেশবঃ সংনিবর্ত্য; শব্দং শ্রুত্বা যোষিতাং ক্রোশতীনাম্

5.11

পুরীমিমামেষ্যতি সব্যসাচী; স বো দুঃখান্মোচয়িতা নরাগ্র্যঃ
ততো গত্বা কেশবস্তং দদর্শ; রামং বনে স্থিতমেকং বিবিক্তে

5.12

অথাপশ্যদ্যোগয়ুক্তস্য তস্য; নাগং মুখান্নিঃসরন্তং মহান্তম্
শ্বেতং যয়ৌ স ততঃ প্রেক্ষ্যমাণো; মহার্ণবো যেন মহানুভাবঃ

5.13

সহস্রশীর্ষঃ পর্বতাভোগবর্ষ্মা; রক্তাননঃ স্বাং তনুং তাং বিমুচ্য
সম্যক্চ তং সাগরঃ প্রত্যগৃহ্ণা;ন্নাগা দিব্যাঃ সরিতশ্চৈব পুণ্যাঃ

5.14

কর্কোটকো বাসুকিস্তক্ষকশ্চ; পৃথুশ্রবা বরুণঃ কুঞ্জরশ্চ
মিশ্রী শঙ্খঃ কুমুদঃ পুণ্ডরীক;স্তথা নাগো ধৃতরাষ্ট্রো মহাত্মা

5.15

হ্রাদঃ ক্রাথঃ শিতিকণ্ঠোঽগ্রতেজা;স্তথা নাগৌ চক্রমন্দাতিষণ্ডৌ
নাগশ্রেষ্ঠো দুর্মুখশ্চাম্বরীষঃ; স্বয়ং রাজা বরুণশ্চাপি রাজন্
প্রত্যুদ্গম্য স্বাগতেনাভ্যনন্দং;স্তেঽপূজয়ংশ্চার্ঘ্যপাদ্যক্রিয়াভিঃ

5.16

ততো গতে ভ্রাতরি বাসুদেবো; জানন্সর্বা গতয়ো দিব্যদৃষ্টিঃ
বনে শূন্যে বিচরংশ্চিন্তয়ানো; ভূমৌ ততঃ সংবিবেশাগ্র্যতেজাঃ

5.17

সর্বং হি তেন প্রাক্তদা বিত্তমাসী;দ্গান্ধার্যা যদ্বাক্যমুক্তঃ স পূর্বম্
দুর্বাসসা পায়সোচ্ছিষ্টলিপ্তে; যচ্চাপ্যুক্তং তচ্চ সস্মার কৃষ্ণঃ

5.18

স চিন্তয়ানোঽন্ধকবৃষ্ণিনাশং; কুরুক্ষয়ং চৈব মহানুভাবঃ
মেনে ততঃ সংক্রমণস্য কালং; ততশ্চকারেন্দ্রিয়সংনিরোধম্

5.19

স সংনিরুদ্ধেন্দ্রিয়বাঙ্মনাস্তু; শিশ্যে মহায়োগমুপেত্য কৃষ্ণঃ
জরাথ তং দেশমুপাজগাম; লুব্ধস্তদানীং মৃগলিপ্সুরুগ্রঃ

5.20

স কেশবং যোগয়ুক্তং শয়ানং; মৃগাশঙ্কী লুব্ধকঃ সায়কেন
জরাবিধ্যত্পাদতলে ত্বরাবাং;স্তং চাভিতস্তজ্জিঘৃক্ষুর্জগাম
অথাপশ্যত্পুরুষং যোগয়ুক্তং; পীতাম্বরং লুব্ধকোঽনেকবাহুম্

5.21

মত্বাত্মানমপরাদ্ধং স তস্য; জগ্রাহ পাদৌ শিরসা চার্তরূপঃ
আশ্বাসয়ত্তং মহাত্মা তদানীং; গচ্ছন্নূর্ধ্বং রোদসী ব্যাপ্য লক্ষ্ম্যা

5.22

দিবং প্রাপ্তং বাসবোঽথাশ্বিনৌ চ; রুদ্রাদিত্যা বসবশ্চাথ বিশ্বে
প্রত্যুদ্যয়ুর্মুনয়শ্চাপি সিদ্ধা; গন্ধর্বমুখ্যাশ্চ সহাপ্সরোভিঃ

5.23

ততো রাজন্ভগবানুগ্রতেজা; নারায়ণঃ প্রভবশ্চাব্যয়শ্চ
যোগাচার্যো রোদসী ব্যাপ্য লক্ষ্ম্যা; স্থানং প্রাপ স্বং মহাত্মাপ্রমেয়ম্

5.24

ততো দেবৈরৃষিভিশ্চাপি কৃষ্ণঃ; সমাগতশ্চারণৈশ্চৈব রাজন্
গন্ধর্বাগ্র্যৈরপ্সরোভির্বরাভিঃ; সিদ্ধৈঃ সাধ্যৈশ্চানতৈঃ পূজ্যমানঃ

5.25

তে বৈ দেবাঃ প্রত্যনন্দন্ত রাজ;ন্মুনিশ্রেষ্ঠা বাগ্ভিরানর্চুরীশম্
গন্ধর্বাশ্চাপ্যুপতস্থুঃ স্তুবন্তঃ; প্রীত্যা চৈনং পুরুহূতোঽভ্যনন্দৎ

Contains text from DharmicData, made available under the Open Database License (ODbL). Simple meanings are written by AI and can contain mistakes.