Utshovঅধ্যায় 4
4.1
বৈশংপায়ন উবাচ
কালী স্ত্রী পাণ্ডুরৈর্দন্তৈঃ প্রবিশ্য হসতী নিশি
স্ত্রিয়ঃ স্বপ্নেষু মুষ্ণন্তী দ্বারকাং পরিধাবতি
4.2
অলংকারাশ্চ ছত্রং চ ধ্বজাশ্চ কবচানি চ
হ্রিয়মাণান্যদৃশ্যন্ত রক্ষোভিঃ সুভয়ানকৈঃ
4.3
তচ্চাগ্নিদত্তং কৃষ্ণস্য বজ্রনাভময়স্ময়ম্
দিবমাচক্রমে চক্রং বৃষ্ণীনাং পশ্যতাং তদা
4.4
যুক্তং রথং দিব্যমাদিত্যবর্ণং; হয়াহরন্পশ্যতো দারুকস্য
তে সাগরস্যোপরিষ্টাদবর্ত;ন্মনোজবাশ্চতুরো বাজিমুখ্যাঃ
4.5
তালঃ সুপর্ণশ্চ মহাধ্বজৌ তৌ; সুপূজিতৌ রামজনার্দনাভ্যাম্
উচ্চৈর্জহ্রুরপ্সরসো দিবানিশং; বাচশ্চোচুর্গম্যতাং তীর্থয়াত্রা
4.6
ততো জিগমিষন্তস্তে বৃষ্ণ্যন্ধকমহারথাঃ
সান্তঃপুরাস্তদা তীর্থয়াত্রামৈচ্ছন্নরর্ষভাঃ
4.7
ততো ভোজ্যং চ ভক্ষ্যং চ পেয়ং চান্ধকবৃষ্ণয়ঃ
বহু নানাবিধং চক্রুর্মদ্যং মাংসমনেকশঃ
4.8
ততঃ সীধুষু সক্তাশ্চ নির্যয়ুর্নগরাদ্বহিঃ
যানৈরশ্বৈর্গজৈশ্চৈব শ্রীমন্তস্তিগ্মতেজসঃ
4.9
ততঃ প্রভাসে ন্যবসন্যথোদ্দেশং যথাগৃহম্
প্রভূতভক্ষ্যপেয়াস্তে সদারা যাদবাস্তদা
4.10
নিবিষ্টাংস্তান্নিশম্যাথ সমুদ্রান্তে স যোগবিৎ
জগামামন্ত্র্য তান্বীরানুদ্ধবোঽর্থবিশারদঃ
4.11
তং প্রস্থিতং মহাত্মানমভিবাদ্য কৃতাঞ্জলিম্
জানন্বিনাশং বৃষ্ণীনাং নৈচ্ছদ্বারয়িতুং হরিঃ
4.12
ততঃ কালপরীতাস্তে বৃষ্ণ্যন্ধকমহারথাঃ
অপশ্যন্নুদ্ধবং যান্তং তেজসাবৃত্য রোদসী
4.13
ব্রাহ্মণার্থেষু যত্সিদ্ধমন্নং তেষাং মহাত্মনাম্
তদ্বানরেভ্যঃ প্রদদুঃ সুরাগন্ধসমন্বিতম্
4.14
ততস্তূর্যশতাকীর্ণং নটনর্তকসংকুলম্
প্রাবর্তত মহাপানং প্রভাসে তিগ্মতেজসাম্
4.15
কৃষ্ণস্য সংনিধৌ রামঃ সহিতঃ কৃতবর্মণা
অপিবদ্যুয়ুধানশ্চ গদো বভ্রুস্তথৈব চ
4.16
ততঃ পরিষদো মধ্যে যুয়ুধানো মদোত্কটঃ
অব্রবীত্কৃতবর্মাণমবহস্যাবমন্য চ
4.17
কঃ ক্ষত্রিয়ো মন্যমানঃ সুপ্তান্হন্যান্মৃতানিব
ন তন্মৃষ্যন্তি হার্দিক্য যাদবা যত্ত্বয়া কৃতম্
4.18
ইত্যুক্তে যুয়ুধানেন পূজয়ামাস তদ্বচঃ
প্রদ্যুম্নো রথিনাং শ্রেষ্ঠো হার্দিক্যমবমন্য চ
4.19
ততঃ পরমসংক্রুদ্ধঃ কৃতবর্মা তমব্রবীৎ
নির্দিশন্নিব সাবজ্ঞং তদা সব্যেন পাণিনা
4.20
ভূরিশ্রবাশ্ছিন্নবাহুর্যুদ্ধে প্রায়গতস্ত্বয়া
বধেন সুনৃশংসেন কথং বীরেণ পাতিতঃ
4.21
ইতি তস্য বচঃ শ্রুত্বা কেশবঃ পরবীরহা
তির্যক্সরোষয়া দৃষ্ট্যা বীক্ষাং চক্রে স মন্যুমান্
4.22
মণিঃ স্যমন্তকশ্চৈব যঃ স সত্রাজিতোঽভবৎ
তাং কথাং স্মারয়ামাস সাত্যকির্মধুসূদনম্
4.23
তচ্ছ্রুত্বা কেশবস্যাঙ্কমগমদ্রুদতী তদা
সত্যভামা প্রকুপিতা কোপয়ন্তী জনার্দনম্
4.24
তত উত্থায় সক্রোধঃ সাত্যকির্বাক্যমব্রবীৎ
পঞ্চানাং দ্রৌপদেয়ানাং ধৃষ্টদ্যুম্নশিখণ্ডিনোঃ
4.25
এষ গচ্ছামি পদবীং সত্যেন চ তথা শপে
সৌপ্তিকে যে চ নিহতাঃ সুপ্তানেন দুরাত্মনা
4.26
দ্রোণপুত্রসহায়েন পাপেন কৃতবর্মণা
সমাপ্তমায়ুরস্যাদ্য যশশ্চাপি সুমধ্যমে
4.27
ইতীদমুক্ত্বা খড্গেন কেশবস্য সমীপতঃ
অভিদ্রুত্য শিরঃ ক্রুদ্ধশ্চিচ্ছেদ কৃতবর্মণঃ
4.28
তথান্যানপি নিঘ্নন্তং যুয়ুধানং সমন্ততঃ
অভ্যধাবদ্ধৃষীকেশো বিনিবারয়িষুস্তদা
4.29
একীভূতাস্ততঃ সর্বে কালপর্যায়চোদিতাঃ
ভোজান্ধকা মহারাজ শৈনেয়ং পর্যবারয়ন্
4.30
তান্দৃষ্ট্বা পততস্তূর্ণমভিক্রুদ্ধাঞ্জনার্দনঃ
ন চুক্রোধ মহাতেজা জানন্কালস্য পর্যয়ম্
4.31
তে তু পানমদাবিষ্টাশ্চোদিতাশ্চৈব মন্যুনা
যুয়ুধানমথাভ্যঘ্নন্নুচ্ছিষ্টৈর্ভাজনৈস্তদা
4.32
হন্যমানে তু শৈনেয়ে ক্রুদ্ধো রুক্মিণিনন্দনঃ
তদন্তরমুপাধাবন্মোক্ষয়িষ্যঞ্শিনেঃ সুতম্
4.33
স ভোজৈঃ সহ সংয়ুক্তঃ সাত্যকিশ্চান্ধকৈঃ সহ
বহুত্বান্নিহতৌ তত্র উভৌ কৃষ্ণস্য পশ্যতঃ
4.34
হতং দৃষ্ট্বা তু শৈনেয়ং পুত্রং চ যদুনন্দনঃ
এরকাণাং তদা মুষ্টিং কোপাজ্জগ্রাহ কেশবঃ
4.35
তদভূন্মুসলং ঘোরং বজ্রকল্পময়োময়ম্
জঘান তেন কৃষ্ণস্তান্যেঽস্য প্রমুখতোঽভবন্
4.36
ততোঽন্ধকাশ্চ ভোজাশ্চ শৈনেয়া বৃষ্ণয়স্তথা
জঘ্নুরন্যোন্যমাক্রন্দে মুসলৈঃ কালচোদিতাঃ
4.37
যস্তেষামেরকাং কশ্চিজ্জগ্রাহ রুষিতো নৃপ
বজ্রভূতেব সা রাজন্নদৃশ্যত তদা বিভো
4.38
তৃণং চ মুসলীভূতমপি তত্র ব্যদৃশ্যত
ব্রহ্মদণ্ডকৃতং সর্বমিতি তদ্বিদ্ধি পার্থিব
4.39
আবিধ্যাবিধ্য তে রাজন্প্রক্ষিপন্তি স্ম যত্তৃণম্
তদ্বজ্রভূতং মুসলং ব্যদৃশ্যত তদা দৃঢম্
4.40
অবধীত্পিতরং পুত্রঃ পিতা পুত্রং চ ভারত
মত্তাঃ পরিপতন্তি স্ম পোথয়ন্তঃ পরস্পরম্
4.41
পতংগা ইব চাগ্নৌ তে ন্যপতন্কুকুরান্ধকাঃ
নাসীত্পলায়নে বুদ্ধির্বধ্যমানস্য কস্যচিৎ
4.42
তং তু পশ্যন্মহাবাহুর্জানন্কালস্য পর্যয়ম্
মুসলং সমবষ্টভ্য তস্থৌ স মধুসূদনঃ
4.43
সাম্বং চ নিহতং দৃষ্ট্বা চারুদেষ্ণং চ মাধবঃ
প্রদ্যুম্নং চানিরুদ্ধং চ ততশ্চুক্রোধ ভারত
4.44
গদং বীক্ষ্য শয়ানং চ ভৃশং কোপসমন্বিতঃ
স নিঃশেষং তদা চক্রে শার্ঙ্গচক্রগদাধরঃ
4.45
তং নিঘ্নন্তং মহাতেজা বভ্রুঃ পরপুরংজয়ঃ
দারুকশ্চৈব দাশার্হমূচতুর্যন্নিবোধ তৎ
4.46
ভগবন্সংহৃতং সর্বং ত্বয়া ভূয়িষ্ঠমচ্যুত
রামস্য পদমন্বিচ্ছ তত্র গচ্ছাম যত্র সঃ