অধ্যায় 3

3.1

বৈশংপায়ন উবাচ
এবং প্রয়তমানানাং বৃষ্ণীনামন্ধকৈঃ সহ
কালো গৃহাণি সর্বেষাং পরিচক্রাম নিত্যশঃ

করালো বিকটো মুণ্ডঃ পুরুষঃ কৃষ্ণপিঙ্গলঃ
গৃহাণ্যবেক্ষ্য বৃষ্ণীনাং নাদৃশ্যত পুনঃ ক্বচিৎ

উত্পেদিরে মহাবাতা দারুণাশ্চা দিনে দিনে
বৃষ্ণ্যন্ধকবিনাশায় বহবো রোমহর্ষণাঃ

বিবৃদ্ধমূষকা রথ্যা বিভিন্নমণিকাস্তথা
চীচীকূচীতি বাশ্যন্ত্যঃ সারিকা বৃষ্ণিবেশ্মসু
নোপশাম্যতি শব্দশ্চ স দিবারাত্রমেব হি

অনুকুর্বন্নুলূকানাং সারসা বিরুতং তথা
অজাঃ শিবানাং চ রুতমন্বকুর্বত ভারত

পাণ্ডুরা রক্তপাদাশ্চ বিহগাঃ কালচোদিতাঃ
বৃষ্ণ্যন্ধকানাং গেহেষু কপোতা ব্যচরংস্তদা

ব্যজায়ন্ত খরা গোষু করভাশ্বতরীষু চ
শুনীষ্বপি বিডালাশ্চ মূষকা নকুলীষু চ

নাপত্রপন্ত পাপানি কুর্বন্তো বৃষ্ণয়স্তদা
প্রাদ্বিষন্ব্রাহ্মণাংশ্চাপি পিতৄন্দেবাংস্তথৈব চ

গুরূংশ্চাপ্যবমন্যন্ত ন তু রামজনার্দনৌ
পত্ন্যঃ পতীন্ব্যুচ্চরন্ত পত্নীশ্চ পতয়স্তথা

বিভাবসুঃ প্রজ্বলিতো বামং বিপরিবর্ততে
নীললোহিতমাঞ্জিষ্ঠা বিসৃজন্নর্চিষঃ পৃথক্

উদয়াস্তমনে নিত্যং পুর্যাং তস্যাং দিবাকরঃ
ব্যদৃশ্যতাসকৃত্পুংভিঃ কবন্ধৈঃ পরিবারিতঃ

মহানসেষু সিদ্ধেঽন্নে সংস্কৃতেঽতীব ভারত
আহার্যমাণে কৃময়ো ব্যদৃশ্যন্ত নরাধিপ

পুণ্যাহে বাচ্যমানে চ জপত্সু চ মহাত্মসু
অভিধাবন্তঃ শ্রূয়ন্তে ন চাদৃশ্যত কশ্চন

পরস্পরং চ নক্ষত্রং হন্যমানং পুনঃ পুনঃ
গ্রহৈরপশ্যন্সর্বে তে নাত্মনস্তু কথংচন

নদন্তং পাঞ্চজন্যং চ বৃষ্ণ্যন্ধকনিবেশনে
সমন্তাত্প্রত্যবাশ্যন্ত রাসভা দারুণস্বরাঃ

এবং পশ্যন্হৃষীকেশঃ সংপ্রাপ্তং কালপর্যয়ম্
ত্রয়োদশ্যামমাবাস্যাং তাং দৃষ্ট্বা প্রাব্রবীদিদম্

চতুর্দশী পঞ্চদশী কৃতেয়ং রাহুণা পুনঃ
তদা চ ভারতে যুদ্ধে প্রাপ্তা চাদ্য ক্ষয়ায় নঃ

বিমৃশন্নেব কালং তং পরিচিন্ত্য জনার্দনঃ
মেনে প্রাপ্তং স ষট্ত্রিংশং বর্ষং বৈ কেশিসূদনঃ

পুত্রশোকাভিসংতপ্তা গান্ধারী হতবান্ধবা
যদনুব্যাজহারার্তা তদিদং সমুপাগতম্

ইদং চ তদনুপ্রাপ্তমব্রবীদ্যদ্যুধিষ্ঠিরঃ
পুরা ব্যূঢেষ্বনীকেষু দৃষ্ট্বোত্পাতান্সুদারুণান্

ইত্যুক্ত্বা বাসুদেবস্তু চিকীর্ষন্সত্যমেব তৎ
আজ্ঞাপয়ামাস তদা তীর্থয়াত্রামরিংদম

অঘোষয়ন্ত পুরুষাস্তত্র কেশবশাসনাৎ
তীর্থয়াত্রা সমুদ্রে বঃ কার্যেতি পুরুষর্ষভাঃ