Utshovঅধ্যায় 2
2.1
জনমেজয় উবাচ
কথং বিনষ্টা ভগবন্নন্ধকা বৃষ্ণিভিঃ সহ
পশ্যতো বাসুদেবস্য ভোজাশ্চৈব মহারথাঃ
2.2
বৈশংপায়ন উবাচ
ষট্ত্রিংশেঽথ ততো বর্ষে বৃষ্ণীনামনয়ো মহান্
অন্যোন্যং মুসলৈস্তে তু নিজঘ্নুঃ কালচোদিতাঃ
2.3
জনমেজয় উবাচ
কেনানুশপ্তাস্তে বীরাঃ ক্ষয়ং বৃষ্ণ্যন্ধকা যয়ুঃ
ভোজাশ্চ দ্বিজবর্য ত্বং বিস্তরেণ বদস্ব মে
2.4
বৈশংপায়ন উবাচ
বিশ্বামিত্রং চ কণ্বং চ নারদং চ তপোধনম্
সারণপ্রমুখা বীরা দদৃশুর্দ্বারকাগতান্
2.5
তে বৈ সাম্বং পুরস্কৃত্য ভূষয়িত্বা স্ত্রিয়ং যথা
অব্রুবন্নুপসংগম্য দৈবদণ্ডনিপীডিতাঃ
2.6
ইয়ং স্ত্রী পুত্রকামস্য বভ্রোরমিততেজসঃ
ঋষয়ঃ সাধু জানীত কিমিয়ং জনয়িষ্যতি
2.7
ইত্যুক্তাস্তে তদা রাজন্বিপ্রলম্ভপ্রধর্ষিতাঃ
প্রত্যব্রুবংস্তান্মুনয়ো যত্তচ্ছৃণু নরাধিপ
2.8
বৃষ্ণ্যন্ধকবিনাশায় মুসলং ঘোরমায়সম্
বাসুদেবস্য দায়াদঃ সাম্বোঽয়ং জনয়িষ্যতি
2.9
যেন যূয়ং সুদুর্বৃত্তা নৃশংসা জাতমন্যবঃ
উচ্ছেত্তারঃ কুলং কৃত্স্নমৃতে রামজনার্দনৌ
2.10
সমুদ্রং যাস্যতি শ্রীমাংস্ত্যক্ত্বা দেহং হলায়ুধঃ
জরা কৃষ্ণং মহাত্মানং শয়ানং ভুবি ভেত্স্যতি
2.11
ইত্যব্রুবন্ত তে রাজন্প্রলব্ধাস্তৈর্দুরাত্মভিঃ
মুনয়ঃ ক্রোধরক্তাক্ষাঃ সমীক্ষ্যাথ পরস্পরম্
2.12
তথোক্ত্বা মুনয়স্তে তু ততঃ কেশবমভ্যয়ুঃ
2.13
অথাব্রবীত্তদা বৃষ্ণীঞ্শ্রুত্বৈবং মধুসূদনঃ
অন্তজ্ঞো মতিমাংস্তস্য ভবিতব্যং তথেতি তান্
2.14
এবমুক্ত্বা হৃষীকেশঃ প্রবিবেশ পুনর্গৃহান্
কৃতান্তমন্যথা নৈচ্ছত্কর্তুং স জগতঃ প্রভুঃ
2.15
শ্বোভূতেঽথ ততঃ সাম্বো মুসলং তদসূত বৈ
বৃষ্ণ্যন্ধকবিনাশায় কিংকরপ্রতিমং মহৎ
2.16
প্রসূতং শাপজং ঘোরং তচ্চ রাজ্ঞে ন্যবেদয়ন্
বিষণ্ণরূপস্তদ্রাজা সূক্ষ্মং চূর্ণমকারয়ৎ
2.17
প্রাক্ষিপন্সাগরে তচ্চ পুরুষা রাজশাসনাৎ
অঘোষয়ংশ্চ নগরে বচনাদাহুকস্য চ
2.18
অদ্য প্রভৃতি সর্বেষু বৃষ্ণ্যন্ধকগৃহেষ্বিহ
সুরাসবো ন কর্তব্যঃ সর্বৈর্নগরবাসিভিঃ
2.19
যশ্চ নোঽবিদিতং কুর্যাত্পেয়ং কশ্চিন্নরঃ ক্বচিৎ
জীবন্স শূলমারোহেত্স্বয়ং কৃত্বা সবান্ধবঃ
2.20
ততো রাজভয়াত্সর্বে নিয়মং চক্রিরে তদা
নরাঃ শাসনমাজ্ঞায় তস্য রাজ্ঞো মহাত্মনঃ