অধ্যায় 1

1.1

বৈশংপায়ন উবাচ
ষট্ত্রিংশে ত্বথ সংপ্রাপ্তে বর্ষে কৌরবনন্দনঃ
দদর্শ বিপরীতানি নিমিত্তানি যুধিষ্ঠিরঃ

ববুর্বাতাঃ সনির্ঘাতা রূক্ষাঃ শর্করবর্ষিণঃ
অপসব্যানি শকুনা মণ্ডলানি প্রচক্রিরে

প্রত্যগূহুর্মহানদ্যো দিশো নীহারসংবৃতাঃ
উল্কাশ্চাঙ্গারবর্ষিণ্যঃ প্রপেতুর্গগনাদ্ভুবি

আদিত্যো রজসা রাজন্সমবচ্ছন্নমণ্ডলঃ
বিরশ্মিরুদয়ে নিত্যং কবন্ধৈঃ সমদৃশ্যত

পরিবেষাশ্চ দৃশ্যন্তে দারুণাঃ চন্দ্রসূর্যয়োঃ
ত্রিবর্ণাঃ শ্যামরূক্ষান্তাস্তথা ভস্মারুণপ্রভাঃ

এতে চান্যে চ বহব উত্পাতা ভয়শংসিনঃ
দৃশ্যন্তেঽহরহো রাজন্হৃদয়োদ্বেগকারকাঃ

কস্যচিত্ত্বথ কালস্য কুরুরাজো যুধিষ্ঠিরঃ
শুশ্রাব বৃষ্ণিচক্রস্য মৌসলে কদনং কৃতম্

বিমুক্তং বাসুদেবং চ শ্রুত্বা রামং চ পাণ্ডবঃ
সমানীয়াব্রবীদ্ভ্রাতৄন্কিং করিষ্যাম ইত্যুত

পরস্পরং সমাসাদ্য ব্রহ্মদণ্ডবলাত্কৃতান্
বৃষ্ণীন্বিনষ্টাংস্তে শ্রুত্বা ব্যথিতাঃ পাণ্ডবাভবন্

নিধনং বাসুদেবস্য সমুদ্রস্যেব শোষণম্
বীরা ন শ্রদ্দধুস্তস্য বিনাশং শার্ঙ্গধন্বনঃ

মৌসলং তে পরিশ্রুত্য দুঃখশোকসমন্বিতাঃ
বিষণ্ণা হতসংকল্পাঃ পাণ্ডবাঃ সমুপাবিশন্