Chapter 1

1.1

वैशंपायन उवाच
षट्त्रिंशे त्वथ संप्राप्ते वर्षे कौरवनन्दनः
ददर्श विपरीतानि निमित्तानि युधिष्ठिरः

Vaishampayana uvacha
Shattrinshe tvatha samprapte varshe kauravanandanah
Dadarsha viparitani nimittani yudhishthirah

ववुर्वाताः सनिर्घाता रूक्षाः शर्करवर्षिणः
अपसव्यानि शकुना मण्डलानि प्रचक्रिरे

Vavurvatah sanirghata rukshah sharkaravarshinah
Apasavyani shakuna mandalani prachakrire

प्रत्यगूहुर्महानद्यो दिशो नीहारसंवृताः
उल्काश्चाङ्गारवर्षिण्यः प्रपेतुर्गगनाद्भुवि

Pratyaguhurmahanadyo disho niharasanvritah
Ulkashchangaravarshinyah prapeturgaganadbhuvi

आदित्यो रजसा राजन्समवच्छन्नमण्डलः
विरश्मिरुदये नित्यं कबन्धैः समदृश्यत

Adityo rajasa rajansamavachchhannamandalah
Virashmirudaye nityam kabandhaih samadrishyata

परिवेषाश्च दृश्यन्ते दारुणाः चन्द्रसूर्ययोः
त्रिवर्णाः श्यामरूक्षान्तास्तथा भस्मारुणप्रभाः

Pariveshashcha drishyante darunah chandrasuryayoh
Trivarnah shyamarukshantastatha bhasmarunaprabhah

एते चान्ये च बहव उत्पाता भयशंसिनः
दृश्यन्तेऽहरहो राजन्हृदयोद्वेगकारकाः

Ete chanye cha bahava utpata bhayashansinah
Drishyanteharaho rajanhridayodvegakarakah

कस्यचित्त्वथ कालस्य कुरुराजो युधिष्ठिरः
शुश्राव वृष्णिचक्रस्य मौसले कदनं कृतम्

Kasyachittvatha kalasya kururajo yudhishthirah
Shushrava vrishnichakrasya mausale kadanam kritam

विमुक्तं वासुदेवं च श्रुत्वा रामं च पाण्डवः
समानीयाब्रवीद्भ्रातॄन्किं करिष्याम इत्युत

Vimuktam vasudevam cha shrutva ramam cha pandavah
Samaniyabravidbhratrinkim karishyama ityuta

परस्परं समासाद्य ब्रह्मदण्डबलात्कृतान्
वृष्णीन्विनष्टांस्ते श्रुत्वा व्यथिताः पाण्डवाभवन्

Parasparam samasadya brahmadandabalatkritan
Vrishninvinashtanste shrutva vyathitah pandavabhavan

निधनं वासुदेवस्य समुद्रस्येव शोषणम्
वीरा न श्रद्दधुस्तस्य विनाशं शार्ङ्गधन्वनः

Nidhanam vasudevasya samudrasyeva shoshanam
Vira na shraddadhustasya vinasham sharngadhanvanah

मौसलं ते परिश्रुत्य दुःखशोकसमन्विताः
विषण्णा हतसंकल्पाः पाण्डवाः समुपाविशन्

Mausalam te parishrutya duhkhashokasamanvitah
Vishanna hatasankalpah pandavah samupavishan