UtshovChapter 2
2.1
जनमेजय उवाच
कथं विनष्टा भगवन्नन्धका वृष्णिभिः सह
पश्यतो वासुदेवस्य भोजाश्चैव महारथाः
Janamejaya uvacha
Katham vinashta bhagavannandhaka vrishnibhih saha
Pashyato vasudevasya bhojashchaiva maharathah
2.2
वैशंपायन उवाच
षट्त्रिंशेऽथ ततो वर्षे वृष्णीनामनयो महान्
अन्योन्यं मुसलैस्ते तु निजघ्नुः कालचोदिताः
Vaishampayana uvacha
Shattrinshetha tato varshe vrishninamanayo mahan
Anyonyam musalaiste tu nijaghnuh kalachoditah
2.3
जनमेजय उवाच
केनानुशप्तास्ते वीराः क्षयं वृष्ण्यन्धका ययुः
भोजाश्च द्विजवर्य त्वं विस्तरेण वदस्व मे
Janamejaya uvacha
Kenanushaptaste virah kshayam vrishnyandhaka yayuh
Bhojashcha dvijavarya tvam vistarena vadasva me
2.4
वैशंपायन उवाच
विश्वामित्रं च कण्वं च नारदं च तपोधनम्
सारणप्रमुखा वीरा ददृशुर्द्वारकागतान्
Vaishampayana uvacha
Vishvamitram cha kanvam cha naradam cha tapodhanam
Saranapramukha vira dadrishurdvarakagatan
2.5
ते वै साम्बं पुरस्कृत्य भूषयित्वा स्त्रियं यथा
अब्रुवन्नुपसंगम्य दैवदण्डनिपीडिताः
Te vai sambam puraskritya bhushayitva striyam yatha
Abruvannupasangamya daivadandanipiditah
2.6
इयं स्त्री पुत्रकामस्य बभ्रोरमिततेजसः
ऋषयः साधु जानीत किमियं जनयिष्यति
Iyam stri putrakamasya babhroramitatejasah
Rishayah sadhu janita kimiyam janayishyati
2.7
इत्युक्तास्ते तदा राजन्विप्रलम्भप्रधर्षिताः
प्रत्यब्रुवंस्तान्मुनयो यत्तच्छृणु नराधिप
Ityuktaste tada rajanvipralambhapradharshitah
Pratyabruvanstanmunayo yattachchhrinu naradhipa
2.8
वृष्ण्यन्धकविनाशाय मुसलं घोरमायसम्
वासुदेवस्य दायादः साम्बोऽयं जनयिष्यति
Vrishnyandhakavinashaya musalam ghoramayasam
Vasudevasya dayadah samboyam janayishyati
2.9
येन यूयं सुदुर्वृत्ता नृशंसा जातमन्यवः
उच्छेत्तारः कुलं कृत्स्नमृते रामजनार्दनौ
Yena yuyam sudurvritta nrishansa jatamanyavah
Uchchhettarah kulam kritsnamrite ramajanardanau
2.10
समुद्रं यास्यति श्रीमांस्त्यक्त्वा देहं हलायुधः
जरा कृष्णं महात्मानं शयानं भुवि भेत्स्यति
Samudram yasyati shrimanstyaktva deham halayudhah
Jara krishnam mahatmanam shayanam bhuvi bhetsyati
2.11
इत्यब्रुवन्त ते राजन्प्रलब्धास्तैर्दुरात्मभिः
मुनयः क्रोधरक्ताक्षाः समीक्ष्याथ परस्परम्
Ityabruvanta te rajanpralabdhastairduratmabhih
Munayah krodharaktakshah samikshyatha parasparam
2.12
तथोक्त्वा मुनयस्ते तु ततः केशवमभ्ययुः
Tathoktva munayaste tu tatah keshavamabhyayuh
2.13
अथाब्रवीत्तदा वृष्णीञ्श्रुत्वैवं मधुसूदनः
अन्तज्ञो मतिमांस्तस्य भवितव्यं तथेति तान्
Athabravittada vrishninshrutvaivam madhusudanah
Antagyo matimanstasya bhavitavyam tatheti tan
2.14
एवमुक्त्वा हृषीकेशः प्रविवेश पुनर्गृहान्
कृतान्तमन्यथा नैच्छत्कर्तुं स जगतः प्रभुः
Evamuktva hrishikeshah pravivesha punargrihan
Kritantamanyatha naichchhatkartum sa jagatah prabhuh
2.15
श्वोभूतेऽथ ततः साम्बो मुसलं तदसूत वै
वृष्ण्यन्धकविनाशाय किंकरप्रतिमं महत्
Shvobhutetha tatah sambo musalam tadasuta vai
Vrishnyandhakavinashaya kinkarapratimam mahat
2.16
प्रसूतं शापजं घोरं तच्च राज्ञे न्यवेदयन्
विषण्णरूपस्तद्राजा सूक्ष्मं चूर्णमकारयत्
Prasutam shapajam ghoram tachcha ragye nyavedayan
Vishannarupastadraja sukshmam churnamakarayat
2.17
प्राक्षिपन्सागरे तच्च पुरुषा राजशासनात्
अघोषयंश्च नगरे वचनादाहुकस्य च
Prakshipansagare tachcha purusha rajashasanat
Aghoshayanshcha nagare vachanadahukasya cha
2.18
अद्य प्रभृति सर्वेषु वृष्ण्यन्धकगृहेष्विह
सुरासवो न कर्तव्यः सर्वैर्नगरवासिभिः
Adya prabhriti sarveshu vrishnyandhakagriheshviha
Surasavo na kartavyah sarvairnagaravasibhih
2.19
यश्च नोऽविदितं कुर्यात्पेयं कश्चिन्नरः क्वचित्
जीवन्स शूलमारोहेत्स्वयं कृत्वा सबान्धवः
Yashcha noviditam kuryatpeyam kashchinnarah kvachit
Jivansa shulamarohetsvayam kritva sabandhavah
2.20
ततो राजभयात्सर्वे नियमं चक्रिरे तदा
नराः शासनमाज्ञाय तस्य राज्ञो महात्मनः
Tato rajabhayatsarve niyamam chakrire tada
Narah shasanamagyaya tasya ragyo mahatmanah