অধ্যায় 9

9.1

বৈশংপায়ন উবাচ
ততো রাজ্ঞাভ্যনুজ্ঞাতো ধৃতরাষ্ট্রঃ প্রতাপবান্
যয়ৌ স্বভবনং রাজা গান্ধার্যানুগতস্তদা

9.2

মন্দপ্রাণগতির্ধীমান্কৃচ্ছ্রাদিব সমুদ্ধরন্
পদাতিঃ স মহীপালো জীর্ণো গজপতির্যথা

9.3

তমন্বগচ্ছদ্বিদুরো বিদ্বান্সূতশ্চ সংজয়ঃ
স চাপি পরমেষ্বাসঃ কৃপঃ শারদ্বতস্তথা

9.4

স প্রবিশ্য গৃহং রাজা কৃতপূর্বাহ্ণিকক্রিয়ঃ
তর্পয়িত্বা দ্বিজশ্রেষ্ঠানাহারমকরোত্তদা

9.5

গান্ধারী চৈব ধর্মজ্ঞা কুন্ত্যা সহ মনস্বিনী
বধূভিরুপচারেণ পূজিতাভুঙ্ক্ত ভারত

9.6

কৃতাহারং কৃতাহারাঃ সর্বে তে বিদুরাদয়ঃ
পাণ্ডবাশ্চ কুরুশ্রেষ্ঠমুপাতিষ্ঠন্ত তং নৃপম্

9.7

ততোঽব্রবীন্মহারাজ কুন্তীপুত্রমুপহ্বরে
নিষণ্ণং পাণিনা পৃষ্ঠে সংস্পৃশন্নম্বিকাসুতঃ

9.8

অপ্রমাদস্ত্বয়া কার্যঃ সর্বথা কুরুনন্দন
অষ্টাঙ্গে রাজশার্দূল রাজ্যে ধর্মপুরস্কৃতে

9.9

তত্তু শক্যং যথা তাত রক্ষিতুং পাণ্ডুনন্দন
রাজ্যং ধর্মং চ কৌন্তেয় বিদ্বানসি নিবোধ তৎ

9.10

বিদ্যাবৃদ্ধান্সদৈব ত্বমুপাসীথা যুধিষ্ঠির
শৃণুয়াস্তে চ যদ্ব্রূয়ুঃ কুর্যাশ্চৈবাবিচারয়ন্

9.11

প্রাতরুত্থায় তান্রাজন্পূজয়িত্বা যথাবিধি
কৃত্যকালে সমুত্পন্নে পৃচ্ছেথাঃ কার্যমাত্মনঃ

9.12

তে তু সংমানিতা রাজংস্ত্বয়া রাজ্যহিতার্থিনা
প্রবক্ষ্যন্তি হিতং তাত সর্বং কৌরবনন্দন

9.13

ইন্দ্রিয়াণি চ সর্বাণি বাজিবত্পরিপালয়
হিতায় বৈ ভবিষ্যন্তি রক্ষিতং দ্রবিণং যথা

9.14

অমাত্যানুপধাতীতান্পিতৃপৈতামহাঞ্শুচীন্
দান্তান্কর্মসু সর্বেষু মুখ্যান্মুখ্যেষু যোজয়েঃ

9.15

চারয়েথাশ্চ সততং চারৈরবিদিতৈঃ পরান্
পরীক্ষিতৈর্বহুবিধং স্বরাষ্ট্রেষু পরেষু চ

9.16

পুরং চ তে সুগুপ্তং স্যাদ্দৃঢপ্রাকারতোরণম্
অট্টাট্টালকসংবাধং ষট্পথং সর্বতোদিশম্

9.17

তস্য দ্বারাণি কার্যাণি পর্যাপ্তানি বৃহন্তি চ
সর্বতঃ সুবিভক্তানি যন্ত্রৈরারক্ষিতানি চ

9.18

পুরুষৈরলমর্থজ্ঞৈর্বিদিতৈঃ কুলশীলতঃ
আত্মা চ রক্ষ্যঃ সততং ভোজনাদিষু ভারত

9.19

বিহারাহারকালেষু মাল্যশয্যাসনেষু চ
স্ত্রিয়শ্চ তে সুগুপ্তাঃ স্যুর্বৃদ্ধৈরাপ্তৈরধিষ্ঠিতাঃ
শীলবদ্ভিঃ কুলীনৈশ্চ বিদ্বদ্ভিশ্চ যুধিষ্ঠির

9.20

মন্ত্রিণশ্চৈব কুর্বীথা দ্বিজান্বিদ্যাবিশারদান্
বিনীতাংশ্চ কুলীনাংশ্চ ধর্মার্থকুশলানৃজূন্

9.21

তৈঃ সার্ধং মন্ত্রয়েথাস্ত্বং নাত্যর্থং বহুভিঃ সহ
সমস্তৈরপি চ ব্যস্তৈর্ব্যপদেশেন কেনচিৎ

9.22

সুসংবৃতং মন্ত্রগৃহং স্থলং চারুহ্য মন্ত্রয়েঃ
অরণ্যে নিঃশলাকে বা ন চ রাত্রৌ কথংচন

9.23

বানরাঃ পক্ষিণশ্চৈব যে মনুষ্যানুকারিণঃ
সর্বে মন্ত্রগৃহে বর্জ্যা যে চাপি জডপঙ্গুকাঃ

9.24

মন্ত্রভেদে হি যে দোষা ভবন্তি পৃথিবীক্ষিতাম্
ন তে শক্যাঃ সমাধাতুং কথংচিদিতি মে মতিঃ

9.25

দোষাংশ্চ মন্ত্রভেদেষু ব্রূয়াস্ত্বং মন্ত্রিমণ্ডলে
অভেদে চ গুণান্রাজন্পুনঃ পুনররিংদম

9.26

পৌরজানপদানাং চ শৌচাশৌচং যুধিষ্ঠির
যথা স্যাদ্বিদিতং রাজংস্তথা কার্যমরিংদম

Contains text from DharmicData, made available under the Open Database License (ODbL). Simple meanings are written by AI and can contain mistakes.