অধ্যায় 10

10.1

ধৃতরাষ্ট্র উবাচ
ব্যবহারাশ্চ তে তাত নিত্যমাপ্তৈরধিষ্ঠিতাঃ
যোজ্যাস্তুষ্টৈর্হিতৈ রাজন্নিত্যং চারৈরনুষ্ঠিতাঃ

পরিমাণং বিদিত্বা চ দণ্ডং দণ্ড্যেষু ভারত
প্রণয়েয়ুর্যথান্যায়ং পুরুষাস্তে যুধিষ্ঠির

আদানরুচয়শ্চৈব পরদারাভিমর্শকাঃ
উগ্রদণ্ডপ্রধানাশ্চ মিথ্যা ব্যাহারিণস্তথা

আক্রোষ্টারশ্চ লুব্ধাশ্চ হন্তারঃ সাহসপ্রিয়াঃ
সভাবিহারভেত্তারো বর্ণানাং চ প্রদূষকাঃ
হিরণ্যদণ্ড্যা বধ্যাশ্চ কর্তব্যা দেশকালতঃ

প্রাতরেব হি পশ্যেথা যে কুর্যুর্ব্যয়কর্ম তে
অলংকারমথো ভোজ্যমত ঊর্ধ্বং সমাচরেঃ

পশ্যেথাশ্চ ততো যোধান্সদা ত্বং পরিহর্ষয়ন্
দূতানাং চ চরাণাং চ প্রদোষস্তে সদা ভবেৎ

সদা চাপররাত্রং তে ভবেত্কার্যার্থনির্ণয়ে
মধ্যরাত্রে বিহারস্তে মধ্যাহ্নে চ সদা ভবেৎ

সর্বে ত্বাত্যয়িকাঃ কালাঃ কার্যাণাং ভরতর্ষভ
তথৈবালংকৃতঃ কালে তিষ্ঠেথা ভূরিদক্ষিণঃ
চক্রবত্কর্মণাং তাত পর্যায়ো হ্যেষ নিত্যশঃ

কোশস্য সংচয়ে যত্নং কুর্বীথা ন্যায়তঃ সদা
দ্বিবিধস্য মহারাজ বিপরীতং বিবর্জয়েঃ

চারৈর্বিদিত্বা শত্রূংশ্চ যে তে রাজ্যান্তরায়িণঃ
তানাপ্তৈঃ পুরুষৈর্দূরাদ্ঘাতয়েথাঃ পরস্পরম্

কর্মদৃষ্ট্যাথ ভৃত্যাংস্ত্বং বরয়েথাঃ কুরূদ্বহ
কারয়েথাশ্চ কর্মাণি যুক্তায়ুক্তৈরধিষ্ঠিতৈঃ

সেনাপ্রণেতা চ ভবেত্তব তাত দৃঢব্রতঃ
শূরঃ ক্লেশসহশ্চৈব প্রিয়শ্চ তব মানবঃ

সর্বে জানপদাশ্চৈব তব কর্মাণি পাণ্ডব
পৌরোগবাশ্চ সভ্যাশ্চ কুর্যুর্যে ব্যবহারিণঃ

স্বরন্ধ্রং পররন্ধ্রং চ স্বেষু চৈব পরেষু চ
উপলক্ষয়িতব্যং তে নিত্যমেব যুধিষ্ঠির

দেশান্তরস্থাশ্চ নরা বিক্রান্তাঃ সর্বকর্মসু
মাত্রাভিরনুরূপাভিরনুগ্রাহ্যা হিতাস্ত্বয়া

গুণার্থিনাং গুণঃ কার্যো বিদুষাং তে জনাধিপ
অবিচাল্যাশ্চ তে তে স্যুর্যথা মেরুর্মহাগিরিঃ