অধ্যায় 11

11.1

ধৃতরাষ্ট্র উবাচ
মণ্ডলানি চ বুধ্যেথাঃ পরেষামাত্মনস্তথা
উদাসীনগুণানাং চ মধ্যমানাং তথৈব চ

চতুর্ণাং শত্রুজাতানাং সর্বেষামাততায়িনাম্
মিত্রং চামিত্রমিত্রং চ বোদ্ধব্যং তেঽরিকর্শন

তথামাত্যা জনপদা দুর্গাণি বিষমাণি চ
বলানি চ কুরুশ্রেষ্ঠ ভবন্ত্যেষাং যথেচ্ছকম্

তে চ দ্বাদশ কৌন্তেয় রাজ্ঞাং বৈ বিবিধাত্মকাঃ
মন্ত্রিপ্রধানাশ্চ গুণাঃ ষষ্টির্দ্বাদশ চ প্রভো

এতন্মণ্ডলমিত্যাহুরাচার্যা নীতিকোবিদাঃ
অত্র ষাড্গুণ্যমায়ত্তং যুধিষ্ঠির নিবোধ তৎ

বৃদ্ধিক্ষয়ৌ চ বিজ্ঞেয়ৌ স্থানং চ কুরুনন্দন
দ্বিসপ্তত্যা মহাবাহো ততঃ ষাড্গুণ্যচারিণঃ

যদা স্বপক্ষো বলবান্পরপক্ষস্তথাবলঃ
বিগৃহ্য শত্রূন্কৌন্তেয় যায়াত্ক্ষিতিপতিস্তদা
যদা স্বপক্ষোঽবলবাংস্তদা সংধিং সমাশ্রয়েৎ

দ্রব্যাণাং সংচয়শ্চৈব কর্তব্যঃ স্যান্মহাংস্তথা
যদা সমর্থো যানায় নচিরেণৈব ভারত

তদা সর্বং বিধেয়ং স্যাত্স্থানং চ ন বিভাজয়েৎ
ভূমিরল্পফলা দেয়া বিপরীতস্য ভারত

হিরণ্যং কুপ্যভূয়িষ্ঠং মিত্রং ক্ষীণমকোশবৎ
বিপরীতান্ন গৃহ্ণীয়াত্স্বয়ং সংধিবিশারদঃ

সংধ্যর্থং রাজপুত্রং চ লিপ্সেথা ভরতর্ষভ
বিপরীতস্তু তেঽদেয়ঃ পুত্র কস্যাংচিদাপদি
তস্য প্রমোক্ষে যত্নং চ কুর্যাঃ সোপায়মন্ত্রবিৎ

প্রকৃতীনাং চ কৌন্তেয় রাজা দীনাং বিভাবয়েৎ
ক্রমেণ যুগপদ্দ্বংদ্বং ব্যসনানাং বলাবলম্

পীডনং স্তম্ভনং চৈব কোশভঙ্গস্তথৈব চ
কার্যং যত্নেন শত্রূণাং স্বরাষ্ট্রং রক্ষতা স্বয়ম্

ন চ হিংস্যোঽভ্যুপগতঃ সামন্তো বৃদ্ধিমিচ্ছতা
কৌন্তেয় তং ন হিংসেত যো মহীং বিজিগীষতে

গণানাং ভেদনে যোগং গচ্ছেথাঃ সহ মন্ত্রিভিঃ
সাধুসংগ্রহণাচ্চৈব পাপনিগ্রহণাত্তথা

দুর্বলাশ্চাপি সততং নাবষ্টভ্যা বলীয়সা
তিষ্ঠেথা রাজশার্দূল বৈতসীং বৃত্তিমাস্থিতঃ

যদ্যেবমভিয়ায়াচ্চ দুর্বলং বলবান্নৃপঃ
সামাদিভিরুপায়ৈস্তং ক্রমেণ বিনিবর্তয়েৎ

অশক্নুবংস্তু যুদ্ধায় নিষ্পতেত্সহ মন্ত্রিভিঃ
কোশেন পৌরৈর্দণ্ডেন যে চান্যে প্রিয়কারিণঃ

অসংভবে তু সর্বস্য যথামুখ্যেন নিষ্পতেৎ
ক্রমেণানেন মোক্ষঃ স্যাচ্ছরীরমপি কেবলম্