অধ্যায় 12

12.1

ধৃতরাষ্ট্র উবাচ
সংধিবিগ্রহমপ্যত্র পশ্যেথা রাজসত্তম
দ্বিয়োনিং ত্রিবিধোপায়ং বহুকল্পং যুধিষ্ঠির

রাজেন্দ্র পর্যুপাসীথাশ্ছিত্ত্বা দ্বৈবিধ্যমাত্মনঃ
তুষ্টপুষ্টবলঃ শত্রুরাত্মবানিতি চ স্মরেৎ

পর্যুপাসনকালে তু বিপরীতং বিধীয়তে
আমর্দকালে রাজেন্দ্র ব্যপসর্পস্ততো বরঃ

ব্যসনং ভেদনং চৈব শত্রূণাং কারয়েত্ততঃ
কর্শনং ভীষণং চৈব যুদ্ধে চাপি বহুক্ষয়ম্

প্রয়াস্যমানো নৃপতিস্ত্রিবিধং পরিচিন্তয়েৎ
আত্মনশ্চৈব শত্রোশ্চ শক্তিং শাস্ত্রবিশারদঃ

উত্সাহপ্রভুশক্তিভ্যাং মন্ত্রশক্ত্যা চ ভারত
উপপন্নো নরো যায়াদ্বিপরীতমতোঽন্যথা

আদদীত বলং রাজা মৌলং মিত্রবলং তথা
অটবীবলং ভৃতং চৈব তথা শ্রেণীবলং চ যৎ

তত্র মিত্রবলং রাজন্মৌলেন ন বিশিষ্যতে
শ্রেণীবলং ভৃতং চৈব তুল্য এবেতি মে মতিঃ

তথা চারবলং চৈব পরস্পরসমং নৃপ
বিজ্ঞেয়ং বলকালেষু রাজ্ঞা কাল উপস্থিতে

আপদশ্চাপি বোদ্ধব্যা বহুরূপা নরাধিপ
ভবন্তি রাজ্ঞাং কৌরব্য যাস্তাঃ পৃথগতঃ শৃণু

বিকল্পা বহবো রাজন্নাপদাং পাণ্ডুনন্দন
সামাদিভিরুপন্যস্য শময়েত্তান্নৃপঃ সদা

যাত্রাং যায়াদ্বলৈর্যুক্তো রাজা ষড্ভিঃ পরংতপ
সংয়ুক্তো দেশকালাভ্যাং বলৈরাত্মগুণৈস্তথা

তুষ্টপুষ্টবলো যায়াদ্রাজা বৃদ্ধ্যুদয়ে রতঃ
আহূতশ্চাপ্যথো যায়াদনৃতাবপি পার্থিবঃ

স্থূণাশ্মানং বাজিরথপ্রধানাং; ধ্বজদ্রুমৈঃ সংবৃতকূলরোধসম্
পদাতিনাগৈর্বহুকর্দমাং নদীং; সপত্ননাশে নৃপতিঃ প্রয়ায়াৎ

অথোপপত্ত্যা শকটং পদ্মং বজ্রং চ ভারত
উশনা বেদ যচ্ছাস্ত্রং তত্রৈতদ্বিহিতং বিভো

সাদয়িত্বা পরবলং কৃত্বা চ বলহর্ষণম্
স্বভূমৌ যোজয়েদ্যুদ্ধং পরভূমৌ তথৈব চ

লব্ধং প্রশময়েদ্রাজা নিক্ষিপেদ্ধনিনো নরান্
জ্ঞাত্বা স্ববিষয়ং তং চ সামাদিভিরুপক্রমেৎ

সর্বথৈব মহারাজ শরীরং ধারয়েদিহ
প্রেত্যেহ চৈব কর্তব্যমাত্মনিঃশ্রেয়সং পরম্

এবং কুর্বঞ্শুভা বাচো লোকেঽস্মিঞ্শৃণুতে নৃপঃ
প্রেত্য স্বর্গং তথাপ্নোতি প্রজা ধর্মেণ পালয়ন্

এবং ত্বয়া কুরুশ্রেষ্ঠ বর্তিতব্যং প্রজাহিতম্
উভয়োর্লোকয়োস্তাত প্রাপ্তয়ে নিত্যমেব চ

ভীষ্মেণ পূর্বমুক্তোঽসি কৃষ্ণেন বিদুরেণ চ
ময়াপ্যবশ্যং বক্তব্যং প্রীত্যা তে নৃপসত্তম

এতত্সর্বং যথান্যায়ং কুর্বীথা ভূরিদক্ষিণ
প্রিয়স্তথা প্রজানাং ত্বং স্বর্গে সুখমবাপ্স্যসি

অশ্বমেধসহস্রেণ যো যজেত্পৃথিবীপতিঃ
পালয়েদ্বাপি ধর্মেণ প্রজাস্তুল্যং ফলং লভেৎ