অধ্যায় 13

13.1

যুধিষ্ঠির উবাচ
এবমেতত্করিষ্যামি যথাত্থ পৃথিবীপতে
ভূয়শ্চৈবানুশাস্যোঽহং ভবতা পার্থিবর্ষভ

ভীষ্মে স্বর্গমনুপ্রাপ্তে গতে চ মধুসূদনে
বিদুরে সংজয়ে চৈব কোঽন্যো মাং বক্তুমর্হতি

যত্তু মামনুশাস্তীহ ভবানদ্য হিতে স্থিতঃ
কর্তাস্ম্যেতন্মহীপাল নির্বৃতো ভব ভারত

বৈশংপায়ন উবাচ
এবমুক্তঃ স রাজর্ষির্ধর্মরাজেন ধীমতা
কৌন্তেয়ং সমনুজ্ঞাতুমিয়েষ ভরতর্ষভ

পুত্র বিশ্রম্যতাং তাবন্মমাপি বলবাঞ্শ্রমঃ
ইত্যুক্ত্বা প্রাবিশদ্রাজা গান্ধার্যা ভবনং তদা

তমাসনগতং দেবী গান্ধারী ধর্মচারিণী
উবাচ কালে কালজ্ঞা প্রজাপতিসমং পতিম্

অনুজ্ঞাতঃ স্বয়ং তেন ব্যাসেনাপি মহর্ষিণা
যুধিষ্ঠিরস্যানুমতে কদারণ্যং গমিষ্যসি

ধৃতরাষ্ট্র উবাচ
গান্ধার্যহমনুজ্ঞাতঃ স্বয়ং পিত্রা মহাত্মনা
যুধিষ্ঠিরস্যানুমতে গন্তাস্মি নচিরাদ্বনম্

অহং হি নাম সর্বেষাং তেষাং দুর্দ্যূতদেবিনাম্
পুত্রাণাং দাতুমিচ্ছামি প্রেত্যভাবানুগং বসু
সর্বপ্রকৃতিসাংনিধ্যং কারয়িত্বা স্ববেশ্মনি

বৈশংপায়ন উবাচ
ইত্যুক্ত্বা ধর্মরাজায় প্রেষয়ামাস পার্থিবঃ
স চ তদ্বচনাত্সর্বং সমানিন্যে মহীপতিঃ

ততো নিষ্ক্রম্য নৃপতিস্তস্মাদন্তঃপুরাত্তদা
সর্বং সুহৃজ্জনং চৈব সর্বাশ্চ প্রকৃতীস্তথা
সমবেতাংশ্চ তান্সর্বান্পৌরজানপদানথ

ব্রাহ্মণাংশ্চ মহীপালান্নানাদেশসমাগতান্
ততঃ প্রাহ মহাতেজা ধৃতরাষ্ট্রো মহীপতিঃ

শৃণ্বন্ত্যেকাগ্রমনসো ব্রাহ্মণাঃ কুরুজাঙ্গলাঃ
ক্ষত্রিয়াশ্চৈব বৈশ্যাশ্চ শূদ্রাশ্চৈব সমাগতাঃ

ভবন্তঃ কুরবশ্চৈব বহুকালং সহোষিতাঃ
পরস্পরস্য সুহৃদঃ পরস্পরহিতে রতাঃ

যদিদানীমহং ব্রূয়ামস্মিন্কাল উপস্থিতে
তথা ভবদ্ভিঃ কর্তব্যমবিচার্য বচো মম

অরণ্যগমনে বুদ্ধির্গান্ধারীসহিতস্য মে
ব্যাসস্যানুমতে রাজ্ঞস্তথা কুন্তীসুতস্য চ
ভবন্তোঽপ্যনুজানন্তু মা বোঽন্যা ভূদ্বিচারণা

অস্মাকং ভবতাং চৈব যেয়ং প্রীতির্হি শাশ্বতী
ন চান্যেষ্বস্তি দেশেষু রাজ্ঞামিতি মতির্মম

শ্রান্তোঽস্মি বয়সানেন তথা পুত্রবিনাকৃতঃ
উপবাসকৃশশ্চাস্মি গান্ধারীসহিতোঽনঘাঃ

যুধিষ্ঠিরগতে রাজ্যে প্রাপ্তশ্চাস্মি সুখং মহৎ
মন্যে দুর্যোধনৈশ্বর্যাদ্বিশিষ্টমিতি সত্তমাঃ

মম ত্বন্ধস্য বৃদ্ধস্য হতপুত্রস্য কা গতিঃ
ঋতে বনং মহাভাগাস্তন্মানুজ্ঞাতুমর্হথ

তস্য তদ্বচনং শ্রুত্বা সর্বে তে কুরুজাঙ্গলাঃ
বাষ্পসংদিগ্ধয়া বাচা রুরুদুর্ভরতর্ষভ

তানবিব্রুবতঃ কিংচিদ্দুঃখশোকপরায়ণান্
পুনরেব মহাতেজা ধৃতরাষ্ট্রোঽব্রবীদিদম্