অধ্যায় 14

14.1

ধৃতরাষ্ট্র উবাচ
শংতনুঃ পালয়ামাস যথাবত্পৃথিবীমিমাম্
তথা বিচিত্রবীর্যশ্চ ভীষ্মেণ পরিপালিতঃ
পালয়ামাস বস্তাতো বিদিতং বো নসংশয়ঃ

যথা চ পাণ্ডুর্ভ্রাতা মে দয়িতো ভবতামভূৎ
স চাপি পালয়ামাস যথাবত্তচ্চ বেত্থ হ

ময়া চ ভবতাং সম্যক্ছুশ্রূষা যা কৃতানঘাঃ
অসম্যগ্বা মহাভাগাস্তত্ক্ষন্তব্যমতন্দ্রিতৈঃ

যচ্চ দুর্যোধনেনেদং রাজ্যং ভুক্তমকণ্টকম্
অপি তত্র ন বো মন্দো দুর্বুদ্ধিরপরাদ্ধবান্

তস্যাপরাধাদ্দুর্বুদ্ধেরভিমানান্মহীক্ষিতাম্
বিমর্দঃ সুমহানাসীদনয়ান্মত্কৃতাদথ

তন্ময়া সাধু বাপীদং যদি বাসাধু বৈ কৃতম্
তদ্বো হৃদি ন কর্তব্যং মামনুজ্ঞাতুমর্হথ

বৃদ্ধোঽয়ং হতপুত্রোঽয়ং দুঃখিতোঽয়ং জনাধিপঃ
পূর্বরাজ্ঞাং চ পুত্রোঽয়মিতি কৃত্বানুজানত

ইয়ং চ কৃপণা বৃদ্ধা হতপুত্রা তপস্বিনী
গান্ধারী পুত্রশোকার্তা তুল্যং যাচতি বো ময়া

হতপুত্রাবিমৌ বৃদ্ধৌ বিদিত্বা দুঃখিতৌ তথা
অনুজানীত ভদ্রং বো ব্রজাবঃ শরণং চ বঃ

অয়ং চ কৌরবো রাজা কুন্তীপুত্রো যুধিষ্ঠিরঃ
সর্বৈর্ভবদ্ভির্দ্রষ্টব্যঃ সমেষু বিষমেষু চ
ন জাতু বিষমং চৈব গমিষ্যতি কদাচন

চত্বারঃ সচিবা যস্য ভ্রাতরো বিপুলৌজসঃ
লোকপালোপমা হ্যেতে সর্বে ধর্মার্থদর্শিনঃ

ব্রহ্মেব ভগবানেষ সর্বভূতজগত্পতিঃ
যুধিষ্ঠিরো মহাতেজা ভবতঃ পালয়িষ্যতি

অবশ্যমেব বক্তব্যমিতি কৃত্বা ব্রবীমি বঃ
এষ ন্যাসো ময়া দত্তঃ সর্বেষাং বো যুধিষ্ঠিরঃ
ভবন্তোঽস্য চ বীরস্য ন্যাসভূতা ময়া কৃতাঃ

যদ্যেব তৈঃ কৃতং কিংচিদ্ব্যলীকং বা সুতৈর্মম
যদ্যন্যেন মদীয়েন তদনুজ্ঞাতুমর্হথ

ভবদ্ভির্হি ন মে মন্যুঃ কৃতপূর্বঃ কথংচন
অত্যন্তগুরুভক্তানামেষোঽঞ্জলিরিদং নমঃ

তেষামস্থিরবুদ্ধীনাং লুব্ধানাং কামচারিণাম্
কৃতে যাচামি বঃ সর্বান্গান্ধারীসহিতোঽনঘাঃ

ইত্যুক্তাস্তেন তে রাজ্ঞা পৌরজানপদা জনাঃ
নোচুর্বাষ্পকলাঃ কিংচিদ্বীক্ষাং চক্রুঃ পরস্পরম্