Utshovঅধ্যায় 15
15.1
বৈশংপায়ন উবাচ
এবমুক্তাস্তু তে তেন পৌরজানপদা জনাঃ
বৃদ্ধেন রাজ্ঞা কৌরব্য নষ্টসংজ্ঞা ইবাভবন্
15.2
তূষ্ণীংভূতাংস্ততস্তাংস্তু বাষ্পকণ্ঠান্মহীপতিঃ
ধৃতরাষ্ট্রো মহীপালঃ পুনরেবাভ্যভাষত
15.3
বৃদ্ধং মাং হতপুত্রং চ ধর্মপত্ন্যা সহানয়া
বিলপন্তং বহুবিধং কৃপণং চৈব সত্তমাঃ
15.4
পিত্রা স্বয়মনুজ্ঞাতং কৃষ্ণদ্বৈপায়নেন বৈ
বনবাসায় ধর্মজ্ঞা ধর্মজ্ঞেন নৃপেণ চ
15.5
সোঽহং পুনঃ পুনর্যাচে শিরসাবনতোঽনঘাঃ
গান্ধার্যা সহিতং তন্মাং সমনুজ্ঞাতুমর্হথ
15.6
শ্রুত্বা তু কুরুরাজস্য বাক্যানি করুণানি তে
রুরুদুঃ সর্বতো রাজন্সমেতাঃ কুরুজাঙ্গলাঃ
15.7
উত্তরীয়ৈঃ করৈশ্চাপি সংছাদ্য বদনানি তে
রুরুদুঃ শোকসংতপ্তা মুহূর্তং পিতৃমাতৃবৎ
15.8
হৃদয়ৈঃ শূন্যভূতৈস্তে ধৃতরাষ্ট্রপ্রবাসজম্
দুঃখং সংধারয়ন্তঃ স্ম নষ্টসংজ্ঞা ইবাভবন্
15.9
তে বিনীয় তমায়াসং কুরুরাজবিয়োগজম্
শনৈঃ শনৈস্তদান্যোন্যমব্রুবন্স্বমতান্যুত
15.10
ততঃ সংধায় তে সর্বে বাক্যান্যথ সমাসতঃ
একস্মিন্ব্রাহ্মণে রাজন্নাবেশ্যোচুর্নরাধিপম্
15.11
ততঃ স্বচরণে বৃদ্ধঃ সংমতোঽর্থবিশারদঃ
সাম্বাখ্যো বহ্বৃচো রাজন্বক্তুং সমুপচক্রমে
15.12
অনুমান্য মহারাজং তত্সদঃ সংপ্রভাষ্য চ
বিপ্রঃ প্রগল্ভো মেধাবী স রাজানমুবাচ হ
15.13
রাজন্বাক্যং জনস্যাস্য ময়ি সর্বং সমর্পিতম্
বক্ষ্যামি তদহং বীর তজ্জুষস্ব নরাধিপ
15.14
যথা বদসি রাজেন্দ্র সর্বমেতত্তথা বিভো
নাত্র মিথ্যা বচঃ কিংচিত্সুহৃত্ত্বং নঃ পরস্পরম্
15.15
ন জাত্বস্য তু বংশস্য রাজ্ঞাং কশ্চিত্কদাচন
রাজাসীদ্যঃ প্রজাপালঃ প্রজানামপ্রিয়ো ভবেৎ
15.16
পিতৃবদ্ভ্রাতৃবচ্চৈব ভবন্তঃ পালয়ন্তি নঃ
ন চ দুর্যোধনঃ কিংচিদয়ুক্তং কৃতবান্নৃপ
15.17
যথা ব্রবীতি ধর্মজ্ঞো মুনিঃ সত্যবতীসুতঃ
তথা কুরু মহারাজ স হি নঃ পরমো গুরুঃ
15.18
ত্যক্তা বয়ং তু ভবতা দুঃখশোকপরায়ণাঃ
ভবিষ্যামশ্চিরং রাজন্ভবদ্গুণশতৈর্হৃতাঃ
15.19
যথা শংতনুনা গুপ্তা রাজ্ঞা চিত্রাঙ্গদেন চ
ভীষ্মবীর্যোপগূঢেন পিত্রা চ তব পার্থিব
15.20
ভবদ্বুদ্ধিয়ুজা চৈব পাণ্ডুনা পৃথিবীক্ষিতা
তথা দুর্যোধনেনাপি রাজ্ঞা সুপরিপালিতাঃ
15.21
ন স্বল্পমপি পুত্রস্তে ব্যলীকং কৃতবান্নৃপ
পিতরীব সুবিশ্বস্তাস্তস্মিন্নপি নরাধিপে
বয়মাস্ম যথা সম্যগ্ভবতো বিদিতং তথা
15.22
তথা বর্ষসহস্রায় কুন্তীপুত্রেণ ধীমতা
পাল্যমানা ধৃতিমতা সুখং বিন্দামহে নৃপ
15.23
রাজর্ষীণাং পুরাণানাং ভবতাং বংশধারিণাম্
কুরুসংবরণাদীনাং ভরতস্য চ ধীমতঃ
15.24
বৃত্তং সমনুয়াত্যেষ ধর্মাত্মা ভূরিদক্ষিণঃ
নাত্র বাচ্যং মহারাজ সুসূক্ষ্মমপি বিদ্যতে
15.25
উষিতাঃ স্ম সুখং নিত্যং ভবতা পরিপালিতাঃ
সুসূক্ষ্মং চ ব্যলীকং তে সপুত্রস্য ন বিদ্যতে
15.26
যত্তু জ্ঞাতিবিমর্দেঽস্মিন্নাত্থ দুর্যোধনং প্রতি
ভবন্তমনুনেষ্যামি তত্রাপি কুরুনন্দন