Utshovঅধ্যায় 16
16.1
ব্রাহ্মণ উবাচ
ন তদ্দুর্যোধনকৃতং ন চ তদ্ভবতা কৃতম্
ন কর্ণসৌবলাভ্যাং চ কুরবো যত্ক্ষয়ং গতাঃ
16.2
দৈবং তত্তু বিজানীমো যন্ন শক্যং প্রবাধিতুম্
দৈবং পুরুষকারেণ ন শক্যমতিবর্তিতুম্
16.3
অক্ষৌহিণ্যো মহারাজ দশাষ্টৌ চ সমাগতাঃ
অষ্টাদশাহেন হতা দশভির্যোধপুংগবৈঃ
16.4
ভীষ্মদ্রোণকৃপাদ্যৈশ্চ কর্ণেন চ মহাত্মনা
যুয়ুধানেন বীরেণ ধৃষ্টদ্যুম্নেন চৈব হ
16.5
চতুর্ভিঃ পাণ্ডুপুত্রৈশ্চ ভীমার্জুনয়মৈর্নৃপ
জনক্ষয়োঽয়ং নৃপতে কৃতো দৈববলাত্কৃতৈঃ
16.6
অবশ্যমেব সংগ্রামে ক্ষত্রিয়েণ বিশেষতঃ
কর্তব্যং নিধনং লোকে শস্ত্রেণ ক্ষত্রবন্ধুনা
16.7
তৈরিয়ং পুরুষব্যাঘ্রৈর্বিদ্যাবাহুবলান্বিতৈঃ
পৃথিবী নিহতা সর্বা সহয়া সরথদ্বিপা
16.8
ন স রাজাপরাধ্নোতি পুত্রস্তব মহামনাঃ
ন ভবান্ন চ তে ভৃত্যা ন কর্ণো ন চ সৌবলঃ
16.9
যদ্বিনষ্টাঃ কুরুশ্রেষ্ঠা রাজানশ্চ সহস্রশঃ
সর্বং দৈবকৃতং তদ্বৈ কোঽত্র কিং বক্তুমর্হতি
16.10
গুরুর্মতো ভবানস্য কৃত্স্নস্য জগতঃ প্রভুঃ
ধর্মাত্মানমতস্তুভ্যমনুজানীমহে সুতম্
16.11
লভতাং বীরলোকান্স সসহায়ো নরাধিপঃ
দ্বিজাগ্র্যৈঃ সমনুজ্ঞাতস্ত্রিদিবে মোদতাং সুখী
16.12
প্রাপ্স্যতে চ ভবান্পুণ্যং ধর্মে চ পরমাং স্থিতিম্
বেদ পুণ্যং চ কার্ত্স্ন্যেন সম্যগ্ভরতসত্তম
16.13
দৃষ্টাপদানাশ্চাস্মাভিঃ পাণ্ডবাঃ পুরুষর্ষভাঃ
সমর্থাস্ত্রিদিবস্যাপি পালনে কিং পুনঃ ক্ষিতেঃ
16.14
অনুবত্স্যন্তি চাপীমাঃ সমেষু বিষমেষু চ
প্রজাঃ কুরুকুলশ্রেষ্ঠ পাণ্ডবাঞ্শীলভূষণান্
16.15
ব্রহ্মদেয়াগ্রহারাংশ্চ পরিহারাংশ্চ পার্থিব
পূর্বরাজাতিসর্গাংশ্চ পালয়ত্যেব পাণ্ডবঃ
16.16
দীর্ঘদর্শী কৃতপ্রজ্ঞঃ সদা বৈশ্রবণো যথা
অক্ষুদ্রসচিবশ্চায়ং কুন্তীপুত্রো মহামনাঃ
16.17
অপ্যমিত্রে দয়াবাংশ্চ শুচিশ্চ ভরতর্ষভ
ঋজু পশ্যতি মেধাবী পুত্রবত্পাতি নঃ সদা
16.18
বিপ্রিয়ং চ জনস্যাস্য সংসর্গাদ্ধর্মজস্য বৈ
ন করিষ্যন্তি রাজর্ষে তথা ভীমার্জুনাদয়ঃ
16.19
মন্দা মৃদুষু কৌরব্যাস্তীক্ষ্ণেষ্বাশীবিষোপমাঃ
বীর্যবন্তো মহাত্মানঃ পৌরাণাং চ হিতে রতাঃ
16.20
ন কুন্তী ন চ পাঞ্চালী ন চোলূপী ন সাত্বতী
অস্মিঞ্জনে করিষ্যন্তি প্রতিকূলানি কর্হিচিৎ
16.21
ভবত্কৃতমিমং স্নেহং যুধিষ্ঠিরবিবর্ধিতম্
ন পৃষ্ঠতঃ করিষ্যন্তি পৌরজানপদা জনাঃ
16.22
অধর্মিষ্ঠানপি সতঃ কুন্তীপুত্রা মহারথাঃ
মানবান্পালয়িষ্যন্তি ভূত্বা ধর্মপরায়ণাঃ
16.23
স রাজন্মানসং দুঃখমপনীয় যুধিষ্ঠিরাৎ
কুরু কার্যাণি ধর্ম্যাণি নমস্তে ভরতর্ষভ
16.24
বৈশংপায়ন উবাচ
তস্য তদ্বচনং ধর্ম্যমনুবন্ধগুণোত্তরম্
সাধু সাধ্বিতি সর্বঃ স জনঃ প্রতিগৃহীতবান্
16.25
ধৃতরাষ্ট্রশ্চ তদ্বাক্যমভিপূজ্য পুনঃ পুনঃ
বিসর্জয়ামাস তদা সর্বাস্তু প্রকৃতীঃ শনৈঃ
16.26
স তৈঃ সংপূজিতো রাজা শিবেনাবেক্ষিতস্তদা
প্রাঞ্জলিঃ পূজয়ামাস তং জনং ভরতর্ষভ
16.27
ততো বিবেশ ভুবনং গান্ধার্যা সহিতো নৃপঃ
ব্যুষ্টায়াং চৈব শর্বর্যাং যচ্চকার নিবোধ তৎ