অধ্যায় 17

17.1

বৈশংপায়ন উবাচ
ব্যুষিতায়াং রজন্যাং তু ধৃতরাষ্ট্রোঽম্বিকাসুতঃ
বিদুরং প্রেষয়ামাস যুধিষ্ঠিরনিবেশনম্

স গত্বা রাজবচনাদুবাচাচ্যুতমীশ্বরম্
যুধিষ্ঠিরং মহাতেজাঃ সর্ববুদ্ধিমতাং বরঃ

ধৃতরাষ্ট্রো মহারাজ বনবাসায় দীক্ষিতঃ
গমিষ্যতি বনং রাজন্কার্ত্তিকীমাগতামিমাম্

স ত্বা কুরুকুলশ্রেষ্ঠ কিংচিদর্থমভীপ্সতি
শ্রাদ্ধমিচ্ছতি দাতুং স গাঙ্গেয়স্য মহাত্মনঃ

দ্রোণস্য সোমদত্তস্য বাহ্লীকস্য চ ধীমতঃ
পুত্রাণাং চৈব সর্বেষাং যে চাস্য সুহৃদো হতাঃ
যদি চাভ্যনুজানীষে সৈন্ধবাপসদস্য চ

এতচ্ছ্রুত্বা তু বচনং বিদুরস্য যুধিষ্ঠিরঃ
হৃষ্টঃ সংপূজয়ামাস গুডাকেশশ্চ পাণ্ডবঃ

ন তু ভীমো দৃঢক্রোধস্তদ্বচো জগৃহে তদা
বিদুরস্য মহাতেজা দুর্যোধনকৃতং স্মরন্

অভিপ্রায়ং বিদিত্বা তু ভীমসেনস্য ফল্গুনঃ
কিরীটী কিংচিদানম্য ভীমং বচনমব্রবীৎ

ভীম রাজা পিতা বৃদ্ধো বনবাসায় দীক্ষিতঃ
দাতুমিচ্ছতি সর্বেষাং সুহৃদামৌর্ধ্বদেহিকম্

ভবতা নির্জিতং বিত্তং দাতুমিচ্ছতি কৌরবঃ
ভীষ্মাদীনাং মহাবাহো তদনুজ্ঞাতুমর্হসি

দিষ্ট্যা ত্বদ্য মহাবাহো ধৃতরাষ্ট্রঃ প্রয়াচতি
যাচিতো যঃ পুরাস্মাভিঃ পশ্য কালস্য পর্যয়ম্

যোঽসৌ পৃথিব্যাঃ কৃত্স্নায়া ভর্তা ভূত্বা নরাধিপঃ
পরৈর্বিনিহতাপত্যো বনং গন্তুমভীপ্সতি

মা তেঽন্যত্পুরুষব্যাঘ্র দানাদ্ভবতু দর্শনম্
অয়শস্যমতোঽন্যত্স্যাদধর্ম্যং চ মহাভুজ

রাজানমুপতিষ্ঠস্ব জ্যেষ্ঠং ভ্রাতরমীশ্বরম্
অর্হস্ত্বমসি দাতুং বৈ নাদাতুং ভরতর্ষভ
এবং ব্রুবাণং কৌন্তেয়ং ধর্মরাজোঽভ্যপূজয়ৎ

ভীমসেনস্তু সক্রোধঃ প্রোবাচেদং বচস্তদা
বয়ং ভীষ্মস্য কুর্মেহ প্রেতকার্যাণি ফল্গুন

সোমদত্তস্য নৃপতের্ভূরিশ্রবস এব চ
বাহ্লীকস্য চ রাজর্ষের্দ্রোণস্য চ মহাত্মনঃ

অন্যেষাং চৈব সুহৃদাং কুন্তী কর্ণায় দাস্যতি
শ্রাদ্ধানি পুরুষব্যাঘ্র মাদাত্কৌরবকো নৃপঃ

ইতি মে বর্ততে বুদ্ধির্মা বো নন্দন্তু শত্রবঃ
কষ্টাত্কষ্টতরং যান্তু সর্বে দুর্যোধনাদয়ঃ
যৈরিয়ং পৃথিবী সর্বা ঘাতিতা কুলপাংসনৈঃ

কুতস্ত্বমদ্য বিস্মৃত্য বৈরং দ্বাদশবার্ষিকম্
অজ্ঞাতবাসগমনং দ্রৌপদীশোকবর্ধনম্
ক্ব তদা ধৃতরাষ্ট্রস্য স্নেহোঽস্মাস্বভবত্তদা

কৃষ্ণাজিনোপসংবীতো হৃতাভরণভূষণঃ
সার্ধং পাঞ্চালপুত্র্যা ত্বং রাজানমুপজগ্মিবান্
ক্ব তদা দ্রোণভীষ্মৌ তৌ সোমদত্তোঽপি বাভবৎ

যত্র ত্রয়োদশ সমা বনে বন্যেন জীবসি
ন তদা ত্বা পিতা জ্যেষ্ঠঃ পিতৃত্বেনাভিবীক্ষতে

কিং তে তদ্বিস্মৃতং পার্থ যদেষ কুলপাংসনঃ
দুর্বৃত্তো বিদুরং প্রাহ দ্যূতে কিং জিতমিত্যুত

তমেবংবাদিনং রাজা কুন্তীপুত্রো যুধিষ্ঠিরঃ
উবাচ ভ্রাতরং ধীমাঞ্জোষমাস্বেতি ভর্ত্সয়ন্