অধ্যায় 18

18.1

অর্জুন উবাচ
ভীম জ্যেষ্ঠো গুরুর্মে ত্বং নাতোঽন্যদ্বক্তুমুত্সহে
ধৃতরাষ্ট্রো হি রাজর্ষিঃ সর্বথা মানমর্হতি

ন স্মরন্ত্যপরাদ্ধানি স্মরন্তি সুকৃতানি চ
অসংভিন্নার্থমর্যাদাঃ সাধবঃ পুরুষোত্তমাঃ

ইদং মদ্বচনাত্ক্ষত্তঃ কৌরবং ব্রূহি পার্থিবম্
যাবদিচ্ছতি পুত্রাণাং দাতুং তাবদ্দদাম্যহম্

ভীষ্মাদীনাং চ সর্বেষাং সুহৃদামুপকারিণাম্
মম কোশাদিতি বিভো মা ভূদ্ভীমঃ সুদুর্মনাঃ

বৈশংপায়ন উবাচ
ইত্যুক্তে ধর্মরাজস্তমর্জুনং প্রত্যপূজয়ৎ
ভীমসেনঃ কটাক্ষেণ বীক্ষাং চক্রে ধনংজয়ম্

ততঃ স বিদুরং ধীমান্বাক্যমাহ যুধিষ্ঠিরঃ
ন ভীমসেনে কোপং স নৃপতিঃ কর্তুমর্হতি

পরিক্লিষ্টো হি ভীমোঽয়ং হিমবৃষ্ট্যাতপাদিভিঃ
দুঃখৈর্বহুবিধৈর্ধীমানরণ্যে বিদিতং তব

কিং তু মদ্বচনাদ্ব্রূহি রাজানং ভরতর্ষভম্
যদ্যদিচ্ছসি যাবচ্চ গৃহ্যতাং মদ্গৃহাদিতি

যন্মাত্সর্যময়ং ভীমঃ করোতি ভৃশদুঃখিতঃ
ন তন্মনসি কর্তব্যমিতি বাচ্যঃ স পার্থিবঃ

যন্মমাস্তি ধনং কিংচিদর্জুনস্য চ বেশ্মনি
তস্য স্বামী মহারাজ ইতি বাচ্যঃ স পার্থিবঃ

দদাতু রাজা বিপ্রেভ্যো যথেষ্টং ক্রিয়তাং ব্যয়ঃ
পুত্রাণাং সুহৃদাং চৈব গচ্ছত্বানৃণ্যমদ্য সঃ

ইদং চাপি শরীরং মে তবায়ত্তং জনাধিপ
ধনানি চেতি বিদ্ধি ত্বং ক্ষত্তর্নাস্ত্যত্র সংশয়ঃ