অধ্যায় 19

19.1

বৈশংপায়ন উবাচ
এবমুক্তস্তু রাজ্ঞা স বিদুরো বুদ্ধিসত্তমঃ
ধৃতরাষ্ট্রমুপেত্যেদং বাক্যমাহ মহার্থবৎ

উক্তো যুধিষ্ঠিরো রাজা ভবদ্বচনমাদিতঃ
স চ সংশ্রুত্য বাক্যং তে প্রশশংস মহাদ্যুতিঃ

বীভত্সুশ্চ মহাতেজা নিবেদয়তি তে গৃহান্
বসু তস্য গৃহে যচ্চ প্রাণানপি চ কেবলান্

ধর্মরাজশ্চ পুত্রস্তে রাজ্যং প্রাণান্ধনানি চ
অনুজানাতি রাজর্ষে যচ্চান্যদপি কিংচন

ভীমস্তু সর্বদুঃখানি সংস্মৃত্য বহুলান্যুত
কৃচ্ছ্রাদিব মহাবাহুরনুমন্যে বিনিঃশ্বসন্

স রাজ্ঞা ধর্মশীলেন ভ্রাত্রা বীভত্সুনা তথা
অনুনীতো মহাবাহুঃ সৌহৃদে স্থাপিতোঽপি চ

ন চ মন্যুস্ত্বয়া কার্য ইতি ত্বাং প্রাহ ধর্মরাট্
সংস্মৃত্য ভীমস্তদ্বৈরং যদন্যায়বদাচরেৎ

এবংপ্রায়ো হি ধর্মোঽয়ং ক্ষত্রিয়াণাং নরাধিপ
যুদ্ধে ক্ষত্রিয়ধর্মে চ নিরতোঽয়ং বৃকোদরঃ

বৃকোদরকৃতে চাহমর্জুনশ্চ পুনঃ পুনঃ
প্রসাদয়াব নৃপতে ভবান্প্রভুরিহাস্তি যৎ

প্রদদাতু ভবান্বিত্তং যাবদিচ্ছসি পার্থিব
ত্বমীশ্বরো নো রাজ্যস্য প্রাণানাং চেতি ভারত

ব্রহ্মদেয়াগ্রহারাংশ্চ পুত্রাণাং চৌর্ধ্বদেহিকম্
ইতো রত্নানি গাশ্চৈব দাসীদাসমজাবিকম্

আনয়িত্বা কুরুশ্রেষ্ঠো ব্রাহ্মণেভ্যঃ প্রয়চ্ছতু
দীনান্ধকৃপণেভ্যশ্চ তত্র তত্র নৃপাজ্ঞয়া

বহ্বন্নরসপানাঢ্যাঃ সভা বিদুর কারয়
গবাং নিপানান্যন্যচ্চ বিবিধং পুণ্যকর্ম যৎ

ইতি মামব্রবীদ্রাজা পার্থশ্চৈব ধনংজয়ঃ
যদত্রানন্তরং কার্যং তদ্ভবান্বক্তুমর্হতি

ইত্যুক্তো বিদুরেণাথ ধৃতরাষ্ট্রোঽভিনন্দ্য তৎ
মনশ্চক্রে মহাদানে কার্ত্তিক্যাং জনমেজয়