অধ্যায় 20

20.1

বৈশংপায়ন উবাচ
বিদুরেণৈবমুক্তস্তু ধৃতরাষ্ট্রো জনাধিপঃ
প্রীতিমানভবদ্রাজা রাজ্ঞো জিষ্ণোশ্চ কর্মণা

ততোঽভিরূপান্ভীষ্মায় ব্রাহ্মণানৃষিসত্তমান্
পুত্রার্থে সুহৃদাং চৈব স সমীক্ষ্য সহস্রশঃ

কারয়িত্বান্নপানানি যানান্যাচ্ছাদনানি চ
সুবর্ণমণিরত্নানি দাসীদাসপরিচ্ছদান্

কম্বলাজিনরত্নানি গ্রামান্ক্ষেত্রানজাবিকম্
অলংকারান্গজানশ্বান্কন্যাশ্চৈব বরস্ত্রিয়ঃ
আদিশ্যাদিশ্য বিপ্রেভ্যো দদৌ স নৃপসত্তমঃ

দ্রোণং সংকীর্ত্য ভীষ্মং চ সোমদত্তং চ বাহ্লিকম্
দুর্যোধনং চ রাজানং পুত্রাংশ্চৈব পৃথক্পৃথক্
জয়দ্রথপুরোগাংশ্চ সুহৃদশ্চৈব সর্বশঃ

স শ্রাদ্ধয়জ্ঞো ববৃধে বহুগোধনদক্ষিণঃ
অনেকধনরত্নৌঘো যুধিষ্ঠিরমতে তদা

অনিশং যত্র পুরুষা গণকা লেখকাস্তথা
যুধিষ্ঠিরস্য বচনাত্তদাপৃচ্ছন্তি তং নৃপম্

আজ্ঞাপয় কিমেতেভ্যঃ প্রদেয়ং দীয়তামিতি
তদুপস্থিতমেবাত্র বচনান্তে প্রদৃশ্যতে

শতে দেয়ে দশশতং সহস্রে চায়ুতং তথা
দীয়তে বচনাদ্রাজ্ঞঃ কুন্তীপুত্রস্য ধীমতঃ

এবং স বসুধারাভির্বর্ষমাণো নৃপাম্বুদঃ
তর্পয়ামাস বিপ্রাংস্তান্বর্ষন্ভূমিমিবাম্বুদঃ

ততোঽনন্তরমেবাত্র সর্ববর্ণান্মহীপতিঃ
অন্নপানরসৌঘেন প্লাবয়ামাস পার্থিবঃ

সবস্ত্রফেনরত্নৌঘো মৃদঙ্গনিনদস্বনঃ
গবাশ্বমকরাবর্তো নারীরত্নমহাকরঃ

গ্রামাগ্রহারকুল্যাঢ্যো মণিহেমজলার্ণবঃ
জগত্সংপ্লাবয়ামাস ধৃতরাষ্ট্রদয়াম্বুধিঃ

এবং স পুত্রপৌত্রাণাং পিতৄণামাত্মনস্তথা
গান্ধার্যাশ্চ মহারাজ প্রদদাবৌর্ধ্বদেহিকম্

পরিশ্রান্তো যদাসীত্স দদদ্দানান্যনেকশঃ
ততো নির্বর্তয়ামাস দানয়জ্ঞং কুরূদ্বহঃ

এবং স রাজা কৌরব্যশ্চক্রে দানমহোত্সবম্
নটনর্তকলাস্যাঢ্যং বহ্বন্নরসদক্ষিণম্

দশাহমেবং দানানি দত্ত্বা রাজাম্বিকাসুতঃ
বভূব পুত্রপৌত্রাণামনৃণো ভরতর্ষভ