অধ্যায় 21

21.1

বৈশংপায়ন উবাচ
ততঃ প্রভাতে রাজা স ধৃতরাষ্ট্রোঽম্বিকাসুতঃ
আহূয় পাণ্ডবান্বীরান্বনবাসকৃতক্ষণঃ

গান্ধারীসহিতো ধীমানভিনন্দ্য যথাবিধি
কার্ত্তিক্যাং কারয়িত্বেষ্টিং ব্রাহ্মণৈর্বেদপারগৈঃ

অগ্নিহোত্রং পুরস্কৃত্য বল্কলাজিনসংবৃতঃ
বধূপরিবৃতো রাজা নির্যয়ৌ ভবনাত্ততঃ

ততঃ স্ত্রিয়ঃ কৌরবপাণ্ডবানাং; যাশ্চাপ্যন্যাঃ কৌরবরাজবংশ্যাঃ
তাসাং নাদঃ প্রাদুরাসীত্তদানীং; বৈচিত্রবীর্যে নৃপতৌ প্রয়াতে

ততো লাজৈঃ সুমনোভিশ্চ রাজা; বিচিত্রাভিস্তদ্গৃহং পূজয়িত্বা
সংয়োজ্যার্থৈর্ভৃত্যজনং চ সর্বং; ততঃ সমুত্সৃজ্য যয়ৌ নরেন্দ্রঃ

ততো রাজা প্রাঞ্জলির্বেপমানো; যুধিষ্ঠিরঃ সস্বনং বাষ্পকণ্ঠঃ
বিলপ্যোচ্চৈর্হা মহারাজ সাধো; ক্ব গন্তাসীত্যপতত্তাত ভূমৌ

তথার্জুনস্তীব্রদুঃখাভিতপ্তো; মুহুর্মুহুর্নিঃশ্বসন্ভারতাগ্র্যঃ
যুধিষ্ঠিরং মৈবমিত্যেবমুক্ত্বা; নিগৃহ্যাথোদীধরত্সীদমানঃ

বৃকোদরঃ ফল্গুনশ্চৈব বীরৌ; মাদ্রীপুত্রৌ বিদুরঃ সংজয়শ্চ
বৈশ্যাপুত্রঃ সহিতো গৌতমেন; ধৌম্যো বিপ্রাশ্চান্বয়ুর্বাষ্পকণ্ঠাঃ

কুন্তী গান্ধারীং বদ্ধনেত্রাং ব্রজন্তীং; স্কন্ধাসক্তং হস্তমথোদ্বহন্তী
রাজা গান্ধার্যাঃ স্কন্ধদেশেঽবসজ্য; পাণিং যয়ৌ ধৃতরাষ্ট্রঃ প্রতীতঃ

তথা কৃষ্ণা দ্রৌপদী যাদবী চ; বালাপত্যা চোত্তরা কৌরবী চ
চিত্রাঙ্গদা যাশ্চ কাশ্চিত্স্ত্রিয়োঽন্যাঃ; সার্ধং রাজ্ঞা প্রস্থিতাস্তা বধূভিঃ

তাসাং নাদো রুদতীনাং তদাসী;দ্রাজন্দুঃখাত্কুররীণামিবোচ্চৈঃ
ততো নিষ্পেতুর্ব্রাহ্মণক্ষত্রিয়াণাং; বিট্শূদ্রাণাং চৈব নার্যঃ সমন্তাৎ

তন্নির্যাণে দুঃখিতঃ পৌরবর্গো; গজাহ্বয়েঽতীব বভূব রাজন্
যথা পূর্বং গচ্ছতাং পাণ্ডবানাং; দ্যূতে রাজন্কৌরবাণাং সভায়াম্

যা নাপশ্যচ্চন্দ্রমা নৈব সূর্যো; রামাঃ কদাচিদপি তস্মিন্নরেন্দ্রে
মহাবনং গচ্ছতি কৌরবেন্দ্রে; শোকেনার্তা রাজমার্গং প্রপেদুঃ