Utshovঅধ্যায় 22
22.1
বৈশংপায়ন উবাচ
ততঃ প্রাসাদহর্ম্যেষু বসুধায়াং চ পার্থিব
স্ত্রীণাং চ পুরুষাণাং চ সুমহান্নিস্বনোঽভবৎ
22.2
স রাজা রাজমার্গেণ নৃনারীসংকুলেন চ
কথংচিন্নির্যয়ৌ ধীমান্বেপমানঃ কৃতাঞ্জলিঃ
22.3
স বর্ধমানদ্বারেণ নির্যয়ৌ গজসাহ্বয়াৎ
বিসর্জয়ামাস চ তং জনৌঘং স মুহুর্মুহুঃ
22.4
বনং গন্তুং চ বিদুরো রাজ্ঞা সহ কৃতক্ষণঃ
সংজয়শ্চ মহামাত্রঃ সূতো গাবল্গণিস্তথা
22.5
কৃপং নিবর্তয়ামাস যুয়ুত্সুং চ মহারথম্
ধৃতরাষ্ট্রো মহীপালঃ পরিদায় যুধিষ্ঠিরে
22.6
নিবৃত্তে পৌরবর্গে তু রাজা সান্তঃপুরস্তদা
ধৃতরাষ্ট্রাভ্যনুজ্ঞাতো নিবর্তিতুমিয়েষ সঃ
22.7
সোঽব্রবীন্মাতরং কুন্তীমুপেত্য ভরতর্ষভ
অহং রাজানমন্বিষ্যে ভবতী বিনিবর্ততাম্
22.8
বধূপরিবৃতা রাজ্ঞি নগরং গন্তুমর্হসি
রাজা যাত্বেষ ধর্মাত্মা তপসে ধৃতনিশ্চয়ঃ
22.9
ইত্যুক্তা ধর্মরাজেন বাষ্পব্যাকুললোচনা
জগাদৈবং তদা কুন্তী গান্ধারীং পরিগৃহ্য হ
22.10
সহদেবে মহারাজ মা প্রমাদং কৃথাঃ ক্বচিৎ
এষ মামনুরক্তো হি রাজংস্ত্বাং চৈব নিত্যদা
22.11
কর্ণং স্মরেথাঃ সততং সংগ্রামেষ্বপলায়িনম্
অবকীর্ণো হি স ময়া বীরো দুষ্প্রজ্ঞয়া তদা
22.12
আয়সং হৃদয়ং নূনং মন্দায়া মম পুত্রক
যত্সূর্যজমপশ্যন্ত্যাঃ শতধা ন বিদীর্যতে
22.13
এবংগতে তু কিং শক্যং ময়া কর্তুমরিংদম
মম দোষোঽয়মত্যর্থং খ্যাপিতো যন্ন সূর্যজঃ
তন্নিমিত্তং মহাবাহো দানং দদ্যাস্ত্বমুত্তমম্
22.14
সদৈব ভ্রাতৃভিঃ সার্ধমগ্রজস্যারিমর্দন
দ্রৌপদ্যাশ্চ প্রিয়ে নিত্যং স্থাতব্যমরিকর্শন
22.15
ভীমসেনার্জুনৌ চৈব নকুলশ্চ কুরূদ্বহ
সমাধেয়াস্ত্বয়া বীর ত্বয্যদ্য কুলধূর্গতা
22.16
শ্বশ্রূশ্বশুরয়োঃ পাদাঞ্শুশ্রূষন্তী বনে ত্বহম্
গান্ধারীসহিতা বত্স্যে তাপসী মলপঙ্কিনী
22.17
এবমুক্তঃ স ধর্মাত্মা ভ্রাতৃভিঃ সহিতো বশী
বিষাদমগমত্তীব্রং ন চ কিংচিদুবাচ হ
22.18
স মুহূর্তমিব ধ্যাত্বা ধর্মপুত্রো যুধিষ্ঠিরঃ
উবাচ মাতরং দীনশ্চিন্তাশোকপরায়ণঃ
22.19
কিমিদং তে ব্যবসিতং নৈবং ত্বং বক্তুমর্হসি
ন ত্বামভ্যনুজানামি প্রসাদং কর্তুমর্হসি
22.20
ব্যরোচয়ঃ পুরা হ্যস্মানুত্সাহ্য প্রিয়দর্শনে
বিদুরায়া বচোভিস্ত্বমস্মান্ন ত্যক্তুমর্হসি
22.21
নিহত্য পৃথিবীপালান্রাজ্যং প্রাপ্তমিদং ময়া
তব প্রজ্ঞামুপশ্রুত্য বাসুদেবান্নরর্ষভাৎ
22.22
ক্ব সা বুদ্ধিরিয়ং চাদ্য ভবত্যা যা শ্রুতা ময়া
ক্ষত্রধর্মে স্থিতিং হ্যুক্ত্বা তস্যাশ্চলিতুমিচ্ছসি
22.23
অস্মানুত্সৃজ্য রাজ্যং চ স্নুষাং চেমাং যশস্বিনীম্
কথং বত্স্যসি শূন্যেষু বনেষ্বম্ব প্রসীদ মে
22.24
ইতি বাষ্পকলাং বাচং কুন্তী পুত্রস্য শৃণ্বতী
জগামৈবাশ্রুপূর্ণাক্ষী ভীমস্তামিদমব্রবীৎ
22.25
যদা রাজ্যমিদং কুন্তি ভোক্তব্যং পুত্রনির্জিতম্
প্রাপ্তব্যা রাজধর্মাশ্চ তদেয়ং তে কুতো মতিঃ
22.26
কিং বয়ং কারিতাঃ পূর্বং ভবত্যা পৃথিবীক্ষয়ম্
কস্য হেতোঃ পরিত্যজ্য বনং গন্তুমভীপ্সসি
22.27
বনাচ্চাপি কিমানীতা ভবত্যা বালকা বয়ম্
দুঃখশোকসমাবিষ্টৌ মাদ্রীপুত্রাবিমৌ তথা
22.28
প্রসীদ মাতর্মা গাস্ত্বং বনমদ্য যশস্বিনি
শ্রিয়ং যৌধিষ্ঠিরীং তাবদ্ভুঙ্ক্ষ্ব পার্থবলার্জিতাম্
22.29
ইতি সা নিশ্চিতৈবাথ বনবাসকৃতক্ষণা
লালপ্যতাং বহুবিধং পুত্রাণাং নাকরোদ্বচঃ
22.30
দ্রৌপদী চান্বয়াচ্ছ্বশ্রূং বিষণ্ণবদনা তদা
বনবাসায় গচ্ছন্তীং রুদতী ভদ্রয়া সহ
22.31
সা পুত্রান্রুদতঃ সর্বান্মুহুর্মুহুরবেক্ষতী
জগামৈব মহাপ্রাজ্ঞা বনায় কৃতনিশ্চয়া
22.32
অন্বয়ুঃ পাণ্ডবাস্তাং তু সভৃত্যান্তঃপুরাস্তদা
ততঃ প্রমৃজ্য সাশ্রূণি পুত্রান্বচনমব্রবীৎ