UtshovChapter 22
22.1
वैशंपायन उवाच
ततः प्रासादहर्म्येषु वसुधायां च पार्थिव
स्त्रीणां च पुरुषाणां च सुमहान्निस्वनोऽभवत्
Vaishampayana uvacha
Tatah prasadaharmyeshu vasudhayam cha parthiva
Strinam cha purushanam cha sumahannisvanobhavat
22.2
स राजा राजमार्गेण नृनारीसंकुलेन च
कथंचिन्निर्ययौ धीमान्वेपमानः कृताञ्जलिः
Sa raja rajamargena nrinarisankulena cha
Kathanchinniryayau dhimanvepamanah kritanjalih
22.3
स वर्धमानद्वारेण निर्ययौ गजसाह्वयात्
विसर्जयामास च तं जनौघं स मुहुर्मुहुः
Sa vardhamanadvarena niryayau gajasahvayat
Visarjayamasa cha tam janaugham sa muhurmuhuh
22.4
वनं गन्तुं च विदुरो राज्ञा सह कृतक्षणः
संजयश्च महामात्रः सूतो गावल्गणिस्तथा
Vanam gantum cha viduro ragya saha kritakshanah
Sanjayashcha mahamatrah suto gavalganistatha
22.5
कृपं निवर्तयामास युयुत्सुं च महारथम्
धृतराष्ट्रो महीपालः परिदाय युधिष्ठिरे
Kripam nivartayamasa yuyutsum cha maharatham
Dhritarashtro mahipalah paridaya yudhishthire
22.6
निवृत्ते पौरवर्गे तु राजा सान्तःपुरस्तदा
धृतराष्ट्राभ्यनुज्ञातो निवर्तितुमियेष सः
Nivritte pauravarge tu raja santahpurastada
Dhritarashtrabhyanugyato nivartitumiyesha sah
22.7
सोऽब्रवीन्मातरं कुन्तीमुपेत्य भरतर्षभ
अहं राजानमन्विष्ये भवती विनिवर्तताम्
Sobravinmataram kuntimupetya bharatarshabha
Aham rajanamanvishye bhavati vinivartatam
22.8
वधूपरिवृता राज्ञि नगरं गन्तुमर्हसि
राजा यात्वेष धर्मात्मा तपसे धृतनिश्चयः
Vadhuparivrita ragyi nagaram gantumarhasi
Raja yatvesha dharmatma tapase dhritanishchayah
22.9
इत्युक्ता धर्मराजेन बाष्पव्याकुललोचना
जगादैवं तदा कुन्ती गान्धारीं परिगृह्य ह
Ityukta dharmarajena bashpavyakulalochana
Jagadaivam tada kunti gandharim parigrihya ha
22.10
सहदेवे महाराज मा प्रमादं कृथाः क्वचित्
एष मामनुरक्तो हि राजंस्त्वां चैव नित्यदा
Sahadeve maharaja ma pramadam krithah kvachit
Esha mamanurakto hi rajanstvam chaiva nityada
22.11
कर्णं स्मरेथाः सततं संग्रामेष्वपलायिनम्
अवकीर्णो हि स मया वीरो दुष्प्रज्ञया तदा
Karnam smarethah satatam sangrameshvapalayinam
Avakirno hi sa maya viro dushpragyaya tada
22.12
आयसं हृदयं नूनं मन्दाया मम पुत्रक
यत्सूर्यजमपश्यन्त्याः शतधा न विदीर्यते
Ayasam hridayam nunam mandaya mama putraka
Yatsuryajamapashyantyah shatadha na vidiryate
22.13
एवंगते तु किं शक्यं मया कर्तुमरिंदम
मम दोषोऽयमत्यर्थं ख्यापितो यन्न सूर्यजः
तन्निमित्तं महाबाहो दानं दद्यास्त्वमुत्तमम्
Evangate tu kim shakyam maya kartumarindama
Mama doshoyamatyartham khyapito yanna suryajah
Tannimittam mahabaho danam dadyastvamuttamam
22.14
सदैव भ्रातृभिः सार्धमग्रजस्यारिमर्दन
द्रौपद्याश्च प्रिये नित्यं स्थातव्यमरिकर्शन
Sadaiva bhratribhih sardhamagrajasyarimardana
Draupadyashcha priye nityam sthatavyamarikarshana
22.15
भीमसेनार्जुनौ चैव नकुलश्च कुरूद्वह
समाधेयास्त्वया वीर त्वय्यद्य कुलधूर्गता
Bhimasenarjunau chaiva nakulashcha kurudvaha
Samadheyastvaya vira tvayyadya kuladhurgata
22.16
श्वश्रूश्वशुरयोः पादाञ्शुश्रूषन्ती वने त्वहम्
गान्धारीसहिता वत्स्ये तापसी मलपङ्किनी
Shvashrushvashurayoh padanshushrushanti vane tvaham
Gandharisahita vatsye tapasi malapankini
22.17
एवमुक्तः स धर्मात्मा भ्रातृभिः सहितो वशी
विषादमगमत्तीव्रं न च किंचिदुवाच ह
Evamuktah sa dharmatma bhratribhih sahito vashi
Vishadamagamattivram na cha kinchiduvacha ha
22.18
स मुहूर्तमिव ध्यात्वा धर्मपुत्रो युधिष्ठिरः
उवाच मातरं दीनश्चिन्ताशोकपरायणः
Sa muhurtamiva dhyatva dharmaputro yudhishthirah
Uvacha mataram dinashchintashokaparayanah
22.19
किमिदं ते व्यवसितं नैवं त्वं वक्तुमर्हसि
न त्वामभ्यनुजानामि प्रसादं कर्तुमर्हसि
Kimidam te vyavasitam naivam tvam vaktumarhasi
Na tvamabhyanujanami prasadam kartumarhasi
22.20
व्यरोचयः पुरा ह्यस्मानुत्साह्य प्रियदर्शने
विदुराया वचोभिस्त्वमस्मान्न त्यक्तुमर्हसि
Vyarochayah pura hyasmanutsahya priyadarshane
Viduraya vachobhistvamasmanna tyaktumarhasi
22.21
निहत्य पृथिवीपालान्राज्यं प्राप्तमिदं मया
तव प्रज्ञामुपश्रुत्य वासुदेवान्नरर्षभात्
Nihatya prithivipalanrajyam praptamidam maya
Tava pragyamupashrutya vasudevannararshabhat
22.22
क्व सा बुद्धिरियं चाद्य भवत्या या श्रुता मया
क्षत्रधर्मे स्थितिं ह्युक्त्वा तस्याश्चलितुमिच्छसि
Kva sa buddhiriyam chadya bhavatya ya shruta maya
Kshatradharme sthitim hyuktva tasyashchalitumichchhasi
22.23
अस्मानुत्सृज्य राज्यं च स्नुषां चेमां यशस्विनीम्
कथं वत्स्यसि शून्येषु वनेष्वम्ब प्रसीद मे
Asmanutsrijya rajyam cha snusham chemam yashasvinim
Katham vatsyasi shunyeshu vaneshvamba prasida me
22.24
इति बाष्पकलां वाचं कुन्ती पुत्रस्य शृण्वती
जगामैवाश्रुपूर्णाक्षी भीमस्तामिदमब्रवीत्
Iti bashpakalam vacham kunti putrasya shrinvati
Jagamaivashrupurnakshi bhimastamidamabravit
22.25
यदा राज्यमिदं कुन्ति भोक्तव्यं पुत्रनिर्जितम्
प्राप्तव्या राजधर्माश्च तदेयं ते कुतो मतिः
Yada rajyamidam kunti bhoktavyam putranirjitam
Praptavya rajadharmashcha tadeyam te kuto matih
22.26
किं वयं कारिताः पूर्वं भवत्या पृथिवीक्षयम्
कस्य हेतोः परित्यज्य वनं गन्तुमभीप्ससि
Kim vayam karitah purvam bhavatya prithivikshayam
Kasya hetoh parityajya vanam gantumabhipsasi
22.27
वनाच्चापि किमानीता भवत्या बालका वयम्
दुःखशोकसमाविष्टौ माद्रीपुत्राविमौ तथा
Vanachchapi kimanita bhavatya balaka vayam
Duhkhashokasamavishtau madriputravimau tatha
22.28
प्रसीद मातर्मा गास्त्वं वनमद्य यशस्विनि
श्रियं यौधिष्ठिरीं तावद्भुङ्क्ष्व पार्थबलार्जिताम्
Prasida matarma gastvam vanamadya yashasvini
Shriyam yaudhishthirim tavadbhunkshva parthabalarjitam
22.29
इति सा निश्चितैवाथ वनवासकृतक्षणा
लालप्यतां बहुविधं पुत्राणां नाकरोद्वचः
Iti sa nishchitaivatha vanavasakritakshana
Lalapyatam bahuvidham putranam nakarodvachah
22.30
द्रौपदी चान्वयाच्छ्वश्रूं विषण्णवदना तदा
वनवासाय गच्छन्तीं रुदती भद्रया सह
Draupadi chanvayachchhvashrum vishannavadana tada
Vanavasaya gachchhantim rudati bhadraya saha
22.31
सा पुत्रान्रुदतः सर्वान्मुहुर्मुहुरवेक्षती
जगामैव महाप्राज्ञा वनाय कृतनिश्चया
Sa putranrudatah sarvanmuhurmuhuravekshati
Jagamaiva mahapragya vanaya kritanishchaya
22.32
अन्वयुः पाण्डवास्तां तु सभृत्यान्तःपुरास्तदा
ततः प्रमृज्य साश्रूणि पुत्रान्वचनमब्रवीत्
Anvayuh pandavastam tu sabhrityantahpurastada
Tatah pramrijya sashruni putranvachanamabravit