অধ্যায় 23

23.1

কুন্ত্যুবাচ
এবমেতন্মহাবাহো যথা বদসি পাণ্ডব
কৃতমুদ্ধর্ষণং পূর্বং ময়া বঃ সীদতাং নৃপ

দ্যূতাপহৃতরাজ্যানাং পতিতানাং সুখাদপি
জ্ঞাতিভিঃ পরিভূতানাং কৃতমুদ্ধর্ষণং ময়া

কথং পাণ্ডোর্ন নশ্যেত সংততিঃ পুরুষর্ষভাঃ
যশশ্চ বো ন নশ্যেত ইতি চোদ্ধর্ষণং কৃতম্

যূয়মিন্দ্রসমাঃ সর্বে দেবতুল্যপরাক্রমাঃ
মা পরেষাং মুখপ্রেক্ষাঃ স্থেত্যেবং তত্কৃতং ময়া

কথং ধর্মভৃতাং শ্রেষ্ঠো রাজা ত্বং বাসবোপমঃ
পুনর্বনে ন দুঃখী স্যা ইতি চোদ্ধর্ষণং কৃতম্

নাগায়ুতসমপ্রাণঃ খ্যাতবিক্রমপৌরুষঃ
নায়ং ভীমোঽত্যয়ং গচ্ছেদিতি চোদ্ধর্ষণং কৃতম্

ভীমসেনাদবরজস্তথায়ং বাসবোপমঃ
বিজয়ো নাবসীদেত ইতি চোদ্ধর্ষণং কৃতম্

নকুলঃ সহদেবশ্চ তথেমৌ গুরুবর্তিনৌ
ক্ষুধা কথং ন সীদেতামিতি চোদ্ধর্ষণং কৃতম্

ইয়ং চ বৃহতী শ্যামা শ্রীমত্যায়তলোচনা
বৃথা সভাতলে ক্লিষ্টা মা ভূদিতি চ তত্কৃতম্

প্রেক্ষন্ত্যা মে তদা হীমাং বেপন্তীং কদলীমিব
স্ত্রীধর্মিণীমনিন্দ্যাঙ্গীং তথা দ্যূতপরাজিতাম্

দুঃশাসনো যদা মৌঢ্যাদ্দাসীবত্পর্যকর্ষত
তদৈব বিদিতং মহ্যং পরাভূতমিদং কুলম্

বিষণ্ণাঃ কুরবশ্চৈব তদা মে শ্বশুরাদয়ঃ
যদৈষা নাথমিচ্ছন্তী ব্যলপত্কুররী যথা

কেশপক্ষে পরামৃষ্টা পাপেন হতবুদ্ধিনা
যদা দুঃশাসনেনৈষা তদা মুহ্যাম্যহং নৃপ

যুষ্মত্তেজোবিবৃদ্ধ্যর্থং ময়া হ্যুদ্ধর্ষণং কৃতম্
তদানীং বিদুরাবাক্যৈরিতি তদ্বিত্ত পুত্রকাঃ

কথং ন রাজবংশোঽয়ং নশ্যেত্প্রাপ্য সুতান্মম
পাণ্ডোরিতি ময়া পুত্র তস্মাদুদ্ধর্ষণং কৃতম্

ন তস্য পুত্রঃ পৌত্রৌ বা কুত এব স পার্থিব
লভতে সুকৃতাঁল্লোকান্যস্মাদ্বংশঃ প্রণশ্যতি

ভুক্তং রাজ্যফলং পুত্রা ভর্তুর্মে বিপুলং পুরা
মহাদানানি দত্তানি পীতঃ সোমো যথাবিধি

সাহং নাত্মফলার্থং বৈ বাসুদেবমচূচুদম্
বিদুরায়াঃ প্রলাপৈস্তৈঃ প্লাবনার্থং তু তত্কৃতম্

নাহং রাজ্যফলং পুত্র কাময়ে পুত্রনির্জিতম্
পতিলোকানহং পুণ্যান্কাময়ে তপসা বিভো

শ্বশ্রূশ্বশুরয়োঃ কৃত্বা শুশ্রূষাং বনবাসিনোঃ
তপসা শোষয়িষ্যামি যুধিষ্ঠির কলেবরম্

নিবর্তস্ব কুরুশ্রেষ্ঠ ভীমসেনাদিভিঃ সহ
ধর্মে তে ধীয়তাং বুদ্ধির্মনস্তে মহদস্তু চ