Utshovঅধ্যায় 24
24.1
বৈশংপায়ন উবাচ
কুন্ত্যাস্তু বচনং শ্রুত্বা পাণ্ডবা রাজসত্তম
ব্রীডিতাঃ সংন্যবর্তন্ত পাঞ্চাল্যা সহিতানঘাঃ
24.2
ততঃ শব্দো মহানাসীত্সর্বেষামেব ভারত
অন্তঃপুরাণাং রুদতাং দৃষ্ট্বা কুন্তীং তথাগতাম্
24.3
প্রদক্ষিণমথাবৃত্য রাজানং পাণ্ডবাস্তদা
অভিবাদ্য ন্যবর্তন্ত পৃথাং তামনিবর্ত্য বৈ
24.4
ততোঽব্রবীন্মহারাজো ধৃতরাষ্ট্রোঽম্বিকাসুতঃ
গান্ধারীং বিদুরং চৈব সমাভাষ্য নিগৃহ্য চ
24.5
যুধিষ্ঠিরস্য জননী দেবী সাধু নিবর্ত্যতাম্
যথা যুধিষ্ঠিরঃ প্রাহ তত্সর্বং সত্যমেব হি
24.6
পুত্রৈশ্বর্যং মহদিদমপাস্য চ মহাফলম্
কা নু গচ্ছেদ্বনং দুর্গং পুত্রানুত্সৃজ্য মূঢবৎ
24.7
রাজ্যস্থয়া তপস্তপ্তং দানং দত্তং ব্রতং কৃতম্
অনয়া শক্যমদ্যেহ শ্রূয়তাং চ বচো মম
24.8
গান্ধারি পরিতুষ্টোঽস্মি বধ্বাঃ শুশ্রূষণেন বৈ
তস্মাত্ত্বমেনাং ধর্মজ্ঞে সমনুজ্ঞাতুমর্হসি
24.9
ইত্যুক্তা সৌবলেয়ী তু রাজ্ঞা কুন্তীমুবাচ হ
তত্সর্বং রাজবচনং স্বং চ বাক্যং বিশেষবৎ
24.10
ন চ সা বনবাসায় দেবীং কৃতমতিং তদা
শক্নোত্যুপাবর্তয়িতুং কুন্তীং ধর্মপরাং সতীম্
24.11
তস্যাস্তু তং স্থিরং জ্ঞাত্বা ব্যবসায়ং কুরুস্ত্রিয়ঃ
নিবৃত্তাংশ্চ কুরুশ্রেষ্ঠান্দৃষ্ট্বা প্ররুরুদুস্তদা
24.12
উপাবৃত্তেষু পার্থেষু সর্বেষ্বন্তঃপুরেষু চ
যয়ৌ রাজা মহাপ্রাজ্ঞো ধৃতরাষ্ট্রো বনং তদা
24.13
পাণ্ডবা অপি দীনাস্তে দুঃখশোকপরায়ণাঃ
যানৈঃ স্ত্রীসহিতাঃ সর্বে পুরং প্রবিবিশুস্তদা
24.14
তদহৃষ্টমিবাকূজং গতোত্সবমিবাভবৎ
নগরং হাস্তিনপুরং সস্ত্রীবৃদ্ধকুমারকম্
24.15
সর্বে চাসন্নিরুত্সাহাঃ পাণ্ডবা জাতমন্যবঃ
কুন্ত্যা হীনাঃ সুদুঃখার্তা বত্সা ইব বিনাকৃতাঃ
24.16
ধৃতরাষ্ট্রস্তু তেনাহ্না গত্বা সুমহদন্তরম্
ততো ভাগীরথীতীরে নিবাসমকরোত্প্রভুঃ
24.17
প্রাদুষ্কৃতা যথান্যায়মগ্নয়ো বেদপারগৈঃ
ব্যরাজন্ত দ্বিজশ্রেষ্ঠৈস্তত্র তত্র তপোধনৈঃ
প্রাদুষ্কৃতাগ্নিরভবত্স চ বৃদ্ধো নরাধিপঃ
24.18
স রাজাগ্নীন্পর্যুপাস্য হুত্বা চ বিধিবত্তদা
সংধ্যাগতং সহস্রাংশুমুপাতিষ্ঠত ভারত
24.19
বিদুরঃ সংজয়শ্চৈব রাজ্ঞঃ শয্যাং কুশৈস্ততঃ
চক্রতুঃ কুরুবীরস্য গান্ধার্যাশ্চাবিদূরতঃ
24.20
গান্ধার্যাঃ সংনিকর্ষে তু নিষসাদ কুশেষ্বথ
যুধিষ্ঠিরস্য জননী কুন্তী সাধুব্রতে স্থিতা
24.21
তেষাং সংশ্রবণে চাপি নিষেদুর্বিদুরাদয়ঃ
যাজকাশ্চ যথোদ্দেশং দ্বিজা যে চানুয়ায়িনঃ
24.22
প্রাধীতদ্বিজমুখ্যা সা সংপ্রজ্বালিতপাবকা
বভূব তেষাং রজনী ব্রাহ্মীব প্রীতিবর্ধনী
24.23
ততো রাত্র্যাং ব্যতীতায়াং কৃতপূর্বাহ্ণিকক্রিয়াঃ
হুত্বাগ্নিং বিধিবত্সর্বে প্রয়য়ুস্তে যথাক্রমম্
উদঙ্মুখা নিরীক্ষন্ত উপবাসপরায়ণাঃ
24.24
স তেষামতিদুঃখোঽভূন্নিবাসঃ প্রথমেঽহনি
শোচতাং শোচ্যমানানাং পৌরজানপদৈর্জনৈঃ