অধ্যায় 25

25.1

বৈশংপায়ন উবাচ
ততো ভাগীরথীতীরে মেধ্যে পুণ্যজনোচিতে
নিবাসমকরোদ্রাজা বিদুরস্য মতে স্থিতঃ

তত্রৈনং পর্যুপাতিষ্ঠন্ব্রাহ্মণা রাষ্ট্রবাসিনঃ
ক্ষত্রবিট্শূদ্রসংঘাশ্চ বহবো ভরতর্ষভ

স তৈঃ পরিবৃতো রাজা কথাভিরভিনন্দ্য তান্
অনুজজ্ঞে সশিষ্যান্বৈ বিধিবত্প্রতিপূজ্য চ

সায়াহ্নে স মহীপালস্ততো গঙ্গামুপেত্য হ
চকার বিধিবচ্ছৌচং গান্ধারী চ যশস্বিনী

তথৈবান্যে পৃথক্সর্বে তীর্থেষ্বাপ্লুত্য ভারত
চক্রুঃ সর্বাঃ ক্রিয়াস্তত্র পুরুষা বিদুরাদয়ঃ

কৃতশৌচং ততো বৃদ্ধং শ্বশুরং কুন্তিভোজজা
গান্ধারীং চ পৃথা রাজন্গঙ্গাতীরমুপানয়ৎ

রাজ্ঞস্তু যাজকৈস্তত্র কৃতো বেদীপরিস্তরঃ
জুহাব তত্র বহ্নিং স নৃপতিঃ সত্যসংগরঃ

ততো ভাগীরথীতীরাত্কুরুক্ষেত্রং জগাম সঃ
সানুগো নৃপতির্বিদ্বান্নিয়তঃ সংয়তেন্দ্রিয়ঃ

তত্রাশ্রমপদং ধীমানভিগম্য স পার্থিবঃ
আসসাদাথ রাজর্ষিঃ শতয়ূপং মনীষিণম্

স হি রাজা মহানাসীত্কেকয়েষু পরংতপঃ
স পুত্রং মনুজৈশ্বর্যে নিবেশ্য বনমাবিশৎ

তেনাসৌ সহিতো রাজা যয়ৌ ব্যাসাশ্রমং তদা
তত্রৈনং বিধিবদ্রাজন্প্রত্যগৃহ্ণাত্কুরূদ্বহম্

স দীক্ষাং তত্র সংপ্রাপ্য রাজা কৌরবনন্দনঃ
শতয়ূপাশ্রমে তস্মিন্নিবাসমকরোত্তদা

তস্মৈ সর্বং বিধিং রাজন্রাজাচখ্যৌ মহামতিঃ
আরণ্যকং মহারাজ ব্যাসস্যানুমতে তদা

এবং স তপসা রাজা ধৃতরাষ্ট্রো মহামনাঃ
যোজয়ামাস চাত্মানং তাংশ্চাপ্যনুচরাংস্তদা

তথৈব দেবী গান্ধারী বল্কলাজিনবাসিনী
কুন্ত্যা সহ মহারাজ সমানব্রতচারিণী

কর্মণা মনসা বাচা চক্ষুষা চাপি তে নৃপ
সংনিয়ম্যেন্দ্রিয়গ্রামমাস্থিতাঃ পরমং তপঃ

ত্বগস্থিভূতঃ পরিশুষ্কমাংসো; জটাজিনী বল্কলসংবৃতাঙ্গঃ
স পার্থিবস্তত্র তপশ্চচার; মহর্ষিবত্তীব্রমপেতদোষঃ

ক্ষত্তা চ ধর্মার্থবিদগ্র্যবুদ্ধিঃ; সসংজয়স্তং নৃপতিং সদারম্
উপাচরদ্ঘোরতপো জিতাত্মা; তদা কৃশো বল্কলচীরবাসাঃ