UtshovChapter 25
25.1
वैशंपायन उवाच
ततो भागीरथीतीरे मेध्ये पुण्यजनोचिते
निवासमकरोद्राजा विदुरस्य मते स्थितः
Vaishampayana uvacha
Tato bhagirathitire medhye punyajanochite
Nivasamakarodraja vidurasya mate sthitah
25.2
तत्रैनं पर्युपातिष्ठन्ब्राह्मणा राष्ट्रवासिनः
क्षत्रविट्शूद्रसंघाश्च बहवो भरतर्षभ
Tatrainam paryupatishthanbrahmana rashtravasinah
Kshatravitshudrasanghashcha bahavo bharatarshabha
25.3
स तैः परिवृतो राजा कथाभिरभिनन्द्य तान्
अनुजज्ञे सशिष्यान्वै विधिवत्प्रतिपूज्य च
Sa taih parivrito raja kathabhirabhinandya tan
Anujagye sashishyanvai vidhivatpratipujya cha
25.4
सायाह्ने स महीपालस्ततो गङ्गामुपेत्य ह
चकार विधिवच्छौचं गान्धारी च यशस्विनी
Sayahne sa mahipalastato gangamupetya ha
Chakara vidhivachchhaucham gandhari cha yashasvini
25.5
तथैवान्ये पृथक्सर्वे तीर्थेष्वाप्लुत्य भारत
चक्रुः सर्वाः क्रियास्तत्र पुरुषा विदुरादयः
Tathaivanye prithaksarve tirtheshvaplutya bharata
Chakruh sarvah kriyastatra purusha viduradayah
25.6
कृतशौचं ततो वृद्धं श्वशुरं कुन्तिभोजजा
गान्धारीं च पृथा राजन्गङ्गातीरमुपानयत्
Kritashaucham tato vriddham shvashuram kuntibhojaja
Gandharim cha pritha rajangangatiramupanayat
25.7
राज्ञस्तु याजकैस्तत्र कृतो वेदीपरिस्तरः
जुहाव तत्र वह्निं स नृपतिः सत्यसंगरः
Ragyastu yajakaistatra krito vediparistarah
Juhava tatra vahnim sa nripatih satyasangarah
25.8
ततो भागीरथीतीरात्कुरुक्षेत्रं जगाम सः
सानुगो नृपतिर्विद्वान्नियतः संयतेन्द्रियः
Tato bhagirathitiratkurukshetram jagama sah
Sanugo nripatirvidvanniyatah sanyatendriyah
25.9
तत्राश्रमपदं धीमानभिगम्य स पार्थिवः
आससादाथ राजर्षिः शतयूपं मनीषिणम्
Tatrashramapadam dhimanabhigamya sa parthivah
Asasadatha rajarshih shatayupam manishinam
25.10
स हि राजा महानासीत्केकयेषु परंतपः
स पुत्रं मनुजैश्वर्ये निवेश्य वनमाविशत्
Sa hi raja mahanasitkekayeshu parantapah
Sa putram manujaishvarye niveshya vanamavishat
25.11
तेनासौ सहितो राजा ययौ व्यासाश्रमं तदा
तत्रैनं विधिवद्राजन्प्रत्यगृह्णात्कुरूद्वहम्
Tenasau sahito raja yayau vyasashramam tada
Tatrainam vidhivadrajanpratyagrihnatkurudvaham
25.12
स दीक्षां तत्र संप्राप्य राजा कौरवनन्दनः
शतयूपाश्रमे तस्मिन्निवासमकरोत्तदा
Sa diksham tatra samprapya raja kauravanandanah
Shatayupashrame tasminnivasamakarottada
25.13
तस्मै सर्वं विधिं राजन्राजाचख्यौ महामतिः
आरण्यकं महाराज व्यासस्यानुमते तदा
Tasmai sarvam vidhim rajanrajachakhyau mahamatih
Aranyakam maharaja vyasasyanumate tada
25.14
एवं स तपसा राजा धृतराष्ट्रो महामनाः
योजयामास चात्मानं तांश्चाप्यनुचरांस्तदा
Evam sa tapasa raja dhritarashtro mahamanah
Yojayamasa chatmanam tanshchapyanucharanstada
25.15
तथैव देवी गान्धारी वल्कलाजिनवासिनी
कुन्त्या सह महाराज समानव्रतचारिणी
Tathaiva devi gandhari valkalajinavasini
Kuntya saha maharaja samanavratacharini
25.16
कर्मणा मनसा वाचा चक्षुषा चापि ते नृप
संनियम्येन्द्रियग्राममास्थिताः परमं तपः
Karmana manasa vacha chakshusha chapi te nripa
Sanniyamyendriyagramamasthitah paramam tapah
25.17
त्वगस्थिभूतः परिशुष्कमांसो; जटाजिनी वल्कलसंवृताङ्गः
स पार्थिवस्तत्र तपश्चचार; महर्षिवत्तीव्रमपेतदोषः
Tvagasthibhutah parishushkamanso; jatajini valkalasanvritangah
Sa parthivastatra tapashchachara; maharshivattivramapetadoshah
25.18
क्षत्ता च धर्मार्थविदग्र्यबुद्धिः; ससंजयस्तं नृपतिं सदारम्
उपाचरद्घोरतपो जितात्मा; तदा कृशो वल्कलचीरवासाः
Kshatta cha dharmarthavidagryabuddhih; sasanjayastam nripatim sadaram
Upacharadghoratapo jitatma; tada krisho valkalachiravasah