অধ্যায় 26

26.1

বৈশংপায়ন উবাচ
ততস্তস্মিন্মুনিশ্রেষ্ঠা রাজানং দ্রষ্টুমভ্যয়ুঃ
নারদঃ পর্বতশ্চৈব দেবলশ্চ মহাতপাঃ

দ্বৈপায়নঃ সশিষ্যশ্চ সিদ্ধাশ্চান্যে মনীষিণঃ
শতয়ূপশ্চ রাজর্ষির্বৃদ্ধঃ পরমধার্মিকঃ

তেষাং কুন্তী মহারাজ পূজাং চক্রে যথাবিধি
তে চাপি তুতুষুস্তস্যাস্তাপসাঃ পরিচর্যয়া

তত্র ধর্ম্যাঃ কথাস্তাত চক্রুস্তে পরমর্ষয়ঃ
রময়ন্তো মহাত্মানং ধৃতরাষ্ট্রং জনাধিপম্

কথান্তরে তু কস্মিংশ্চিদ্দেবর্ষির্নারদস্তদা
কথামিমামকথয়ত্সর্বপ্রত্যক্ষদর্শিবান্

পুরা প্রজাপতিসমো রাজাসীদকুতোভয়ঃ
সহস্রচিত্য ইত্যুক্তঃ শতয়ূপপিতামহঃ

স পুত্রে রাজ্যমাসজ্য জ্যেষ্ঠে পরমধার্মিকে
সহস্রচিত্যো ধর্মাত্মা প্রবিবেশ বনং নৃপঃ

স গত্বা তপসঃ পারং দীপ্তস্য স নরাধিপঃ
পুরংদরস্য সংস্থানং প্রতিপেদে মহামনাঃ

দৃষ্টপূর্বঃ স বহুশো রাজন্সংপততা ময়া
মহেন্দ্রসদনে রাজা তপসা দগ্ধকিল্বিষঃ

তথা শৈলালয়ো রাজা ভগদত্তপিতামহঃ
তপোবলেনৈব নৃপো মহেন্দ্রসদনং গতঃ

তথা পৃষধ্রো নামাসীদ্রাজা বজ্রধরোপমঃ
স চাপি তপসা লেভে নাকপৃষ্ঠমিতো নৃপঃ

অস্মিন্নরণ্যে নৃপতে মান্ধাতুরপি চাত্মজঃ
পুরুকুত্সো নৃপঃ সিদ্ধিং মহতীং সমবাপ্তবান্

ভার্যা সমভবদ্যস্য নর্মদা সরিতাং বরা
সোঽস্মিন্নরণ্যে নৃপতিস্তপস্তপ্ত্বা দিবং গতঃ

শশলোমা চ নামাসীদ্রাজা পরমধার্মিকঃ
স চাপ্যস্মিন্বনে তপ্ত্বা তপো দিবমবাপ্তবান্

দ্বৈপায়নপ্রসাদাচ্চ ত্বমপীদং তপোবনম্
রাজন্নবাপ্য দুষ্প্রাপাং সিদ্ধিমগ্র্যাং গমিষ্যসি

ত্বং চাপি রাজশার্দূল তপসোঽন্তে শ্রিয়া বৃতঃ
গান্ধারীসহিতো গন্তা গতিং তেষাং মহাত্মনাম্

পাণ্ডুঃ স্মরতি নিত্যং চ বলহন্তুঃ সমীপতঃ
ত্বাং সদৈব মহীপাল স ত্বাং শ্রেয়সি যোক্ষ্যতি

তব শুশ্রূষয়া চৈব গান্ধার্যাশ্চ যশস্বিনী
ভর্তুঃ সলোকতাং কুন্তী গমিষ্যতি বধূস্তব

যুধিষ্ঠিরস্য জননী স হি ধর্মঃ সনাতনঃ
বয়মেতত্প্রপশ্যামো নৃপতে দিব্যচক্ষুষা

প্রবেক্ষ্যতি মহাত্মানং বিদুরশ্চ যুধিষ্ঠিরম্
সংজয়স্ত্বদনুধ্যানাত্পূতঃ স্বর্গমবাপ্স্যতি

এতচ্ছ্রুত্বা কৌরবেন্দ্রো মহাত্মা; সহৈব পত্ন্যা প্রীতিমান্প্রত্যগৃহ্ণাৎ
বিদ্বান্বাক্যং নারদস্য প্রশস্য; চক্রে পূজাং চাতুলাং নারদায়

তথা সর্বে নারদং বিপ্রসংঘাঃ; সংপূজয়ামাসুরতীব রাজন্
রাজ্ঞঃ প্রীত্যা ধৃতরাষ্ট্রস্য তে বৈ; পুনঃ পুনঃ সমহৃষ্টাস্তদানীম্