অধ্যায় 27

27.1

বৈশংপায়ন উবাচ
নারদস্য তু তদ্বাক্যং প্রশশংসুর্দ্বিজোত্তমাঃ
শতয়ূপস্তু রাজর্ষির্নারদং বাক্যমব্রবীৎ

অহো ভগবতা শ্রদ্ধা কুরুরাজস্য বর্ধিতা
সর্বস্য চ জনস্যাস্য মম চৈব মহাদ্যুতে

অস্তি কাচিদ্বিবক্ষা তু মম তাং গদতঃ শৃণু
ধৃতরাষ্ট্রং প্রতি নৃপং দেবর্ষে লোকপূজিত

সর্ববৃত্তান্ততত্ত্বজ্ঞো ভবান্দিব্যেন চক্ষুষা
যুক্তঃ পশ্যসি দেবর্ষে গতীর্বৈ বিবিধা নৃণাম্

উক্তবান্নৃপতীনাং ত্বং মহেন্দ্রস্য সলোকতাম্
ন ত্বস্য নৃপতের্লোকাঃ কথিতাস্তে মহামুনে

স্থানমস্য ক্ষিতিপতেঃ শ্রোতুমিচ্ছাম্যহং বিভো
ত্বত্তঃ কীদৃক্কদা বেতি তন্মমাচক্ষ্ব পৃচ্ছতঃ

ইত্যুক্তো নারদস্তেন বাক্যং সর্বমনোনুগম্
ব্যাজহার সতাং মধ্যে দিব্যদর্শী মহাতপাঃ

যদৃচ্ছয়া শক্রসদো গত্বা শক্রং শচীপতিম্
দৃষ্টবানস্মি রাজর্ষে তত্র পাণ্ডুং নরাধিপম্

তত্রেয়ং ধৃতরাষ্ট্রস্য কথা সমভবন্নৃপ
তপসো দুশ্চরস্যাস্য যদয়ং তপ্যতে নৃপঃ

তত্রাহমিদমশ্রৌষং শক্রস্য বদতো নৃপ
বর্ষাণি ত্রীণি শিষ্টানি রাজ্ঞোঽস্য পরমায়ুষঃ

ততঃ কুবেরভবনং গান্ধারীসহিতো নৃপঃ
বিহর্তা ধৃতরাষ্ট্রোঽয়ং রাজরাজাভিপূজিতঃ

কামগেন বিমানেন দিব্যাভরণভূষিতঃ
ঋষিপুত্রো মহাভাগস্তপসা দগ্ধকিল্বিষঃ

সংচরিষ্যতি লোকাংশ্চ দেবগন্ধর্বরক্ষসাম্
স্বচ্ছন্দেনেতি ধর্মাত্মা যন্মাং ত্বং পরিপৃচ্ছসি

দেবগুহ্যমিদং প্রীত্যা ময়া বঃ কথিতং মহৎ
ভবন্তো হি শ্রুতধনাস্তপসা দগ্ধকিল্বিষাঃ

ইতি তে তস্য তচ্ছ্রুত্বা দেবর্ষের্মধুরং বচঃ
সর্বে সুমনসঃ প্রীতা বভূবুঃ স চ পার্থিবঃ

এবং কথাভিরন্বাস্য ধৃতরাষ্ট্রং মনীষিণঃ
বিপ্রজগ্মুর্যথাকামং তে সিদ্ধগতিমাস্থিতাঃ