অধ্যায় 28

28.1

বৈশংপায়ন উবাচ
বনং গতে কৌরবেন্দ্রে দুঃখশোকসমাহতাঃ
বভূবুঃ পাণ্ডবা রাজন্মাতৃশোকেন চার্দিতাঃ

তথা পৌরজনঃ সর্বঃ শোচন্নাস্তে জনাধিপম্
কুর্বাণাশ্চ কথাস্তত্র ব্রাহ্মণা নৃপতিং প্রতি

কথং নু রাজা বৃদ্ধঃ স বনে বসতি নির্জনে
গান্ধারী চ মহাভাগা সা চ কুন্তী পৃথা কথম্

সুখার্হঃ স হি রাজর্ষির্ন সুখং তন্মহাবনম্
কিমবস্থঃ সমাসাদ্য প্রজ্ঞাচক্ষুর্হতাত্মজঃ

সুদুষ্করং কৃতবতী কুন্তী পুত্রানপশ্যতী
রাজ্যশ্রিয়ং পরিত্যজ্য বনবাসমরোচয়ৎ

বিদুরঃ কিমবস্থশ্চ ভ্রাতুঃ শুশ্রূষুরাত্মবান্
স চ গাবল্গণির্ধীমান্ভর্তৃপিণ্ডানুপালকঃ

আকুমারং চ পৌরাস্তে চিন্তাশোকসমাহতাঃ
তত্র তত্র কথাশ্চক্রুঃ সমাসাদ্য পরস্পরম্

পাণ্ডবাশ্চৈব তে সর্বে ভৃশং শোকপরায়ণাঃ
শোচন্তো মাতরং বৃদ্ধামূষুর্নাতিচিরং পুরে

তথৈব পিতরং বৃদ্ধং হতপুত্রং জনেশ্বরম্
গান্ধারীং চ মহাভাগাং বিদুরং চ মহামতিম্

নৈষাং বভূব সংপ্রীতিস্তান্বিচিন্তয়তাং তদা
ন রাজ্যে ন চ নারীষু ন বেদাধ্যয়নে তথা

পরং নির্বেদমগমংশ্চিন্তয়ন্তো নরাধিপম্
তচ্চ জ্ঞাতিবধং ঘোরং সংস্মরন্তঃ পুনঃ পুনঃ

অভিমন্যোশ্চ বালস্য বিনাশং রণমূর্ধনি
কর্ণস্য চ মহাবাহোঃ সংগ্রামেষ্বপলায়িনঃ

তথৈব দ্রৌপদেয়ানামন্যেষাং সুহৃদামপি
বধং সংস্মৃত্য তে বীরা নাতিপ্রমনসোঽভবন্

হতপ্রবীরাং পৃথিবীং হতরত্নাং চ ভারত
সদৈব চিন্তয়ন্তস্তে ন নিদ্রামুপলেভিরে

দ্রৌপদী হতপুত্রা চ সুভদ্রা চৈব ভামিনী
নাতিপ্রীতিয়ুতে দেব্যৌ তদাস্তামপ্রহৃষ্টবৎ

বৈরাট্যাস্তু সুতং দৃষ্ট্বা পিতরং তে পরিক্ষিতম্
ধারয়ন্তি স্ম তে প্রাণাংস্তব পূর্বপিতামহাঃ