Utshovঅধ্যায় 29
29.1
বৈশংপায়ন উবাচ
এবং তে পুরুষব্যাঘ্রাঃ পাণ্ডবা মাতৃনন্দনাঃ
স্মরন্তো মাতরং বীরা বভূবুর্ভৃশদুঃখিতাঃ
29.2
যে রাজকার্যেষু পুরা ব্যাসক্তা নিত্যশোঽভবন্
তে রাজকার্যাণি তদা নাকার্ষুঃ সর্বতঃ পুরে
29.3
আবিষ্টা ইব শোকেন নাভ্যনন্দন্ত কিংচন
সংভাষ্যমাণা অপি তে ন কিংচিত্প্রত্যপূজয়ন্
29.4
তে স্ম বীরা দুরাধর্ষা গাম্ভীর্যে সাগরোপমাঃ
শোকোপহতবিজ্ঞানা নষ্টসংজ্ঞা ইবাভবন্
29.5
অনুস্মরন্তো জননীং ততস্তে কুরুনন্দনাঃ
কথং নু বৃদ্ধমিথুনং বহত্যদ্য পৃথা কৃশা
29.6
কথং চ স মহীপালো হতপুত্রো নিরাশ্রয়ঃ
পত্ন্যা সহ বসত্যেকো বনে শ্বাপদসেবিতে
29.7
সা চ দেবী মহাভাগা গান্ধারী হতবান্ধবা
পতিমন্ধং কথং বৃদ্ধমন্বেতি বিজনে বনে
29.8
এবং তেষাং কথয়তামৌত্সুক্যমভবত্তদা
গমনে চাভবদ্বুদ্ধির্ধৃতরাষ্ট্রদিদৃক্ষয়া
29.9
সহদেবস্তু রাজানং প্রণিপত্যেদমব্রবীৎ
অহো মে ভবতো দৃষ্টং হৃদয়ং গমনং প্রতি
29.10
ন হি ত্বা গৌরবেণাহমশকং বক্তুমাত্মনা
গমনং প্রতি রাজেন্দ্র তদিদং সমুপস্থিতম্
29.11
দিষ্ট্যা দ্রক্ষ্যামি তাং কুন্তীং বর্তয়ন্তীং তপস্বিনীম্
জটিলাং তাপসীং বৃদ্ধাং কুশকাশপরিক্ষতাম্
29.12
প্রাসাদহর্ম্যসংবৃদ্ধামত্যন্তসুখভাগিনীম্
কদা নু জননীং শ্রান্তাং দ্রক্ষ্যামি ভৃশদুঃখিতাম্
29.13
অনিত্যাঃ খলু মর্ত্যানাং গতয়ো ভরতর্ষভ
কুন্তী রাজসুতা যত্র বসত্যসুখিনী বনে
29.14
সহদেববচঃ শ্রুত্বা দ্রৌপদী যোষিতাং বরা
উবাচ দেবী রাজানমভিপূজ্যাভিনন্দ্য চ
29.15
কদা দ্রক্ষ্যামি তাং দেবীং যদি জীবতি সা পৃথা
জীবন্ত্যা হ্যদ্য নঃ প্রীতির্ভবিষ্যতি নরাধিপ
29.16
এষা তেঽস্তু মতির্নিত্যং ধর্মে তে রমতাং মনঃ
যোঽদ্য ত্বমস্মান্রাজেন্দ্র শ্রেয়সা যোজয়িষ্যসি
29.17
অগ্রপাদস্থিতং চেমং বিদ্ধি রাজন্বধূজনম্
কাঙ্ক্ষন্তং দর্শনং কুন্ত্যা গান্ধার্যাঃ শ্বশুরস্য চ
29.18
ইত্যুক্তঃ স নৃপো দেব্যা পাঞ্চাল্যা ভরতর্ষভ
সেনাধ্যক্ষান্সমানায্য সর্বানিদমথাব্রবীৎ
29.19
নির্যাতয়ত মে সেনাং প্রভূতরথকুঞ্জরাম্
দ্রক্ষ্যামি বনসংস্থং চ ধৃতরাষ্ট্রং মহীপতিম্
29.20
স্ত্র্যধ্যক্ষাংশ্চাব্রবীদ্রাজা যানানি বিবিধানি মে
সজ্জীক্রিয়ন্তাং সর্বাণি শিবিকাশ্চ সহস্রশঃ
29.21
শকটাপণবেশাশ্চ কোশশিল্পিন এব চ
নির্যান্তু কোশপালাশ্চ কুরুক্ষেত্রাশ্রমং প্রতি
29.22
যশ্চ পৌরজনঃ কশ্চিদ্দ্রষ্টুমিচ্ছতি পার্থিবম্
অনাবৃতঃ সুবিহিতঃ স চ যাতু সুরক্ষিতঃ
29.23
সূদাঃ পৌরোগবাশ্চৈব সর্বং চৈব মহানসম্
বিবিধং ভক্ষ্যভোজ্যং চ শকটৈরুহ্যতাং মম
29.24
প্রয়াণং ঘুষ্যতাং চৈব শ্বোভূত ইতি মা চিরম্
ক্রিয়ন্তাং পথি চাপ্যদ্য বেশ্মানি বিবিধানি চ
29.25
এবমাজ্ঞাপ্য রাজা স ভ্রাতৃভিঃ সহ পাণ্ডবঃ
শ্বোভূতে নির্যয়ৌ রাজা সস্ত্রীবালপুরস্কৃতঃ
29.26
স বহির্দিবসানেবং জনৌঘং পরিপালয়ন্
ন্যবসন্নৃপতিঃ পঞ্চ ততোঽগচ্ছদ্বনং প্রতি