অধ্যায় 30

30.1

বৈশংপায়ন উবাচ
আজ্ঞাপয়ামাস ততঃ সেনাং ভরতসত্তমঃ
অর্জুনপ্রমুখৈর্গুপ্তাং লোকপালোপমৈর্নরৈঃ

যোগো যোগ ইতি প্রীত্যা ততঃ শব্দো মহানভূৎ
ক্রোশতাং সাদিনাং তত্র যুজ্যতাং যুজ্যতামিতি

কেচিদ্যানৈর্নরা জগ্মুঃ কেচিদশ্বৈর্মনোজবৈঃ
রথৈশ্চ নগরাকারৈঃ প্রদীপ্তজ্বলনোপমৈঃ

গজেন্দ্রৈশ্চ তথৈবান্যে কেচিদুষ্ট্রৈর্নরাধিপ
পদাতিনস্তথৈবান্যে নখরপ্রাসয়োধিনঃ

পৌরজানপদাশ্চৈব যানৈর্বহুবিধৈস্তথা
অন্বয়ুঃ কুরুরাজানং ধৃতরাষ্ট্রদিদৃক্ষয়া

স চাপি রাজবচনাদাচার্যো গৌতমঃ কৃপঃ
সেনামাদায় সেনানী প্রয়য়াবাশ্রমং প্রতি

ততো দ্বিজৈর্বৃতঃ শ্রীমান্কুরুরাজো যুধিষ্ঠিরঃ
সংস্তূয়মানো বহুভিঃ সূতমাগধবন্দিভিঃ

পাণ্ডুরেণাতপত্রেণ ধ্রিয়মাণেন মূর্ধনি
রথানীকেন মহতা নির্যয়ৌ কুরুনন্দনঃ

গজৈশ্চাচলসংকাশৈর্ভীমকর্মা বৃকোদরঃ
সজ্জয়ন্ত্রায়ুধোপেতৈঃ প্রয়য়ৌ মারুতাত্মজঃ

মাদ্রীপুত্রাবপি তথা হয়ারোহৈঃ সুসংবৃতৌ
জগ্মতুঃ প্রীতিজননৌ সংনদ্ধকবচধ্বজৌ

অর্জুনশ্চ মহাতেজা রথেনাদিত্যবর্চসা
বশী শ্বেতৈর্হয়ৈর্দিব্যৈর্যুক্তেনান্বগমন্নৃপম্

দ্রৌপদীপ্রমুখাশ্চাপি স্ত্রীসংঘাঃ শিবিকাগতাঃ
স্ত্র্যধ্যক্ষয়ুক্তাঃ প্রয়য়ুর্বিসৃজন্তোঽমিতং বসু

সমৃদ্ধনরনাগাশ্বং বেণুবীণানিনাদিতম্
শুশুভে পাণ্ডবং সৈন্যং তত্তদা ভরতর্ষভ

নদীতীরেষু রম্যেষু সরত্সু চ বিশাং পতে
বাসান্কৃত্বা ক্রমেণাথ জগ্মুস্তে কুরুপুংগবাঃ

যুয়ুত্সুশ্চ মহাতেজা ধৌম্যশ্চৈব পুরোহিতঃ
যুধিষ্ঠিরস্য বচনাত্পুরগুপ্তিং প্রচক্রতুঃ

ততো যুধিষ্ঠিরো রাজা কুরুক্ষেত্রমবাতরৎ
ক্রমেণোত্তীর্য যমুনাং নদীং পরমপাবনীম্

স দদর্শাশ্রমং দূরাদ্রাজর্ষেস্তস্য ধীমতঃ
শতয়ূপস্য কৌরব্য ধৃতরাষ্ট্রস্য চৈব হ

ততঃ প্রমুদিতঃ সর্বো জনস্তদ্বনমঞ্জসা
বিবেশ সুমহানাদৈরাপূর্য ভরতর্ষভ