UtshovChapter 30
30.1
वैशंपायन उवाच
आज्ञापयामास ततः सेनां भरतसत्तमः
अर्जुनप्रमुखैर्गुप्तां लोकपालोपमैर्नरैः
Vaishampayana uvacha
Agyapayamasa tatah senam bharatasattamah
Arjunapramukhairguptam lokapalopamairnaraih
30.2
योगो योग इति प्रीत्या ततः शब्दो महानभूत्
क्रोशतां सादिनां तत्र युज्यतां युज्यतामिति
Yogo yoga iti pritya tatah shabdo mahanabhut
Kroshatam sadinam tatra yujyatam yujyatamiti
30.3
केचिद्यानैर्नरा जग्मुः केचिदश्वैर्मनोजवैः
रथैश्च नगराकारैः प्रदीप्तज्वलनोपमैः
Kechidyanairnara jagmuh kechidashvairmanojavaih
Rathaishcha nagarakaraih pradiptajvalanopamaih
30.4
गजेन्द्रैश्च तथैवान्ये केचिदुष्ट्रैर्नराधिप
पदातिनस्तथैवान्ये नखरप्रासयोधिनः
Gajendraishcha tathaivanye kechidushtrairnaradhipa
Padatinastathaivanye nakharaprasayodhinah
30.5
पौरजानपदाश्चैव यानैर्बहुविधैस्तथा
अन्वयुः कुरुराजानं धृतराष्ट्रदिदृक्षया
Paurajanapadashchaiva yanairbahuvidhaistatha
Anvayuh kururajanam dhritarashtradidrikshaya
30.6
स चापि राजवचनादाचार्यो गौतमः कृपः
सेनामादाय सेनानी प्रययावाश्रमं प्रति
Sa chapi rajavachanadacharyo gautamah kripah
Senamadaya senani prayayavashramam prati
30.7
ततो द्विजैर्वृतः श्रीमान्कुरुराजो युधिष्ठिरः
संस्तूयमानो बहुभिः सूतमागधबन्दिभिः
Tato dvijairvritah shrimankururajo yudhishthirah
Sanstuyamano bahubhih sutamagadhabandibhih
30.8
पाण्डुरेणातपत्रेण ध्रियमाणेन मूर्धनि
रथानीकेन महता निर्ययौ कुरुनन्दनः
Pandurenatapatrena dhriyamanena murdhani
Rathanikena mahata niryayau kurunandanah
30.9
गजैश्चाचलसंकाशैर्भीमकर्मा वृकोदरः
सज्जयन्त्रायुधोपेतैः प्रययौ मारुतात्मजः
Gajaishchachalasankashairbhimakarma vrikodarah
Sajjayantrayudhopetaih prayayau marutatmajah
30.10
माद्रीपुत्रावपि तथा हयारोहैः सुसंवृतौ
जग्मतुः प्रीतिजननौ संनद्धकवचध्वजौ
Madriputravapi tatha hayarohaih susanvritau
Jagmatuh pritijananau sannaddhakavachadhvajau
30.11
अर्जुनश्च महातेजा रथेनादित्यवर्चसा
वशी श्वेतैर्हयैर्दिव्यैर्युक्तेनान्वगमन्नृपम्
Arjunashcha mahateja rathenadityavarchasa
Vashi shvetairhayairdivyairyuktenanvagamannripam
30.12
द्रौपदीप्रमुखाश्चापि स्त्रीसंघाः शिबिकागताः
स्त्र्यध्यक्षयुक्ताः प्रययुर्विसृजन्तोऽमितं वसु
Draupadipramukhashchapi strisanghah shibikagatah
Stryadhyakshayuktah prayayurvisrijantomitam vasu
30.13
समृद्धनरनागाश्वं वेणुवीणानिनादितम्
शुशुभे पाण्डवं सैन्यं तत्तदा भरतर्षभ
Samriddhanaranagashvam venuvinaninaditam
Shushubhe pandavam sainyam tattada bharatarshabha
30.14
नदीतीरेषु रम्येषु सरत्सु च विशां पते
वासान्कृत्वा क्रमेणाथ जग्मुस्ते कुरुपुंगवाः
Naditireshu ramyeshu saratsu cha visham pate
Vasankritva kramenatha jagmuste kurupungavah
30.15
युयुत्सुश्च महातेजा धौम्यश्चैव पुरोहितः
युधिष्ठिरस्य वचनात्पुरगुप्तिं प्रचक्रतुः
Yuyutsushcha mahateja dhaumyashchaiva purohitah
Yudhishthirasya vachanatpuraguptim prachakratuh
30.16
ततो युधिष्ठिरो राजा कुरुक्षेत्रमवातरत्
क्रमेणोत्तीर्य यमुनां नदीं परमपावनीम्
Tato yudhishthiro raja kurukshetramavatarat
Kramenottirya yamunam nadim paramapavanim
30.17
स ददर्शाश्रमं दूराद्राजर्षेस्तस्य धीमतः
शतयूपस्य कौरव्य धृतराष्ट्रस्य चैव ह
Sa dadarshashramam duradrajarshestasya dhimatah
Shatayupasya kauravya dhritarashtrasya chaiva ha
30.18
ततः प्रमुदितः सर्वो जनस्तद्वनमञ्जसा
विवेश सुमहानादैरापूर्य भरतर्षभ
Tatah pramuditah sarvo janastadvanamanjasa
Vivesha sumahanadairapurya bharatarshabha