অধ্যায় 31

31.1

বৈশংপায়ন উবাচ
ততস্তে পাণ্ডবা দূরাদবতীর্য পদাতয়ঃ
অভিজগ্মুর্নরপতেরাশ্রমং বিনয়ানতাঃ

স চ পৌরজনঃ সর্বো যে চ রাষ্ট্রনিবাসিনঃ
স্ত্রিয়শ্চ কুরুমুখ্যানাং পদ্ভিরেবান্বয়ুস্তদা

আশ্রমং তে ততো জগ্মুর্ধৃতরাষ্ট্রস্য পাণ্ডবাঃ
শূন্যং মৃগগণাকীর্ণং কদলীবনশোভিতম্

ততস্তত্র সমাজগ্মুস্তাপসা বিবিধব্রতাঃ
পাণ্ডবানাগতান্দ্রষ্টুং কৌতূহলসমন্বিতাঃ

তানপৃচ্ছত্ততো রাজা ক্বাসৌ কৌরববংশভৃৎ
পিতা জ্যেষ্ঠো গতোঽস্মাকমিতি বাষ্পপরিপ্লুতঃ

তমূচুস্তে ততো বাক্যং যমুনামবগাহিতুম্
পুষ্পাণামুদকুম্ভস্য চার্থে গত ইতি প্রভো

তৈরাখ্যাতেন মার্গেণ ততস্তে প্রয়য়ুস্তদা
দদৃশুশ্চাবিদূরে তান্সর্বানথ পদাতয়ঃ

ততস্তে সত্বরা জগ্মুঃ পিতুর্দর্শনকাঙ্ক্ষিণঃ
সহদেবস্তু বেগেন প্রাধাবদ্যেন সা পৃথা

সস্বনং প্ররুদন্ধীমান্মাতুঃ পাদাবুপস্পৃশন্
সা চ বাষ্পাবিলমুখী প্রদদর্শ প্রিয়ং সুতম্

বাহুভ্যাং সংপরিষ্বজ্য সমুন্নাম্য চ পুত্রকম্
গান্ধার্যাঃ কথয়ামাস সহদেবমুপস্থিতম্

অনন্তরং চ রাজানং ভীমসেনমথার্জুনম্
নকুলং চ পৃথা দৃষ্ট্বা ত্বরমাণোপচক্রমে

সা হ্যগ্রেঽগচ্ছত তয়োর্দংপত্যোর্হতপুত্রয়োঃ
কর্ষন্তী তৌ ততস্তে তাং দৃষ্ট্বা সংন্যপতন্ভুবি

তান্রাজা স্বরয়োগেন স্পর্শেন চ মহামনাঃ
প্রত্যভিজ্ঞায় মেধাবী সমাশ্বাসয়ত প্রভুঃ

ততস্তে বাষ্পমুত্সৃজ্য গান্ধারীসহিতং নৃপম্
উপতস্থুর্মহাত্মানো মাতরং চ যথাবিধি

সর্বেষাং তোয়কলশাঞ্জগৃহুস্তে স্বয়ং তদা
পাণ্ডবা লব্ধসংজ্ঞাস্তে মাত্রা চাশ্বাসিতাঃ পুনঃ

ততো নার্যো নৃসিংহানাং স চ যোধজনস্তদা
পৌরজানপদাশ্চৈব দদৃশুস্তং নরাধিপম্

নিবেদয়ামাস তদা জনং তং নামগোত্রতঃ
যুধিষ্ঠিরো নরপতিঃ স চৈনান্প্রত্যপূজয়ৎ

স তৈঃ পরিবৃতো মেনে হর্ষবাষ্পাবিলেক্ষণঃ
রাজাত্মানং গৃহগতং পুরেব গজসাহ্বয়ে

অভিবাদিতো বধূভিশ্চ কৃষ্ণাদ্যাভিঃ স পার্থিবঃ
গান্ধার্যা সহিতো ধীমান্কুন্ত্যা চ প্রত্যনন্দত

ততশ্চাশ্রমমাগচ্ছত্সিদ্ধচারণসেবিতম্
দিদৃক্ষুভিঃ সমাকীর্ণং নভস্তারাগণৈরিব