অধ্যায় 32

32.1

বৈশংপায়ন উবাচ
স তৈঃ সহ নরব্যাঘ্রৈর্ভ্রাতৃভির্ভরতর্ষভ
রাজা রুচিরপদ্মাক্ষৈরাসাং চক্রে তদাশ্রমে

তাপসৈশ্চ মহাভাগৈর্নানাদেশসমাগতৈঃ
দ্রষ্টুং কুরুপতেঃ পুত্রান্পাণ্ডবান্পৃথুবক্ষসঃ

তেঽব্রুবঞ্জ্ঞাতুমিচ্ছামঃ কতমোঽত্র যুধিষ্ঠিরঃ
ভীমার্জুনয়মাশ্চৈব দ্রৌপদী চ যশস্বিনী

তানাচখ্যৌ তদা সূতঃ সর্বান্নামাভিনামতঃ
সংজয়ো দ্রৌপদীং চৈব সর্বাশ্চান্যাঃ কুরুস্ত্রিয়ঃ

য এষ জাম্বূনদশুদ্ধগৌর;তনুর্মহাসিংহ ইব প্রবৃদ্ধঃ
প্রচণ্ডঘোণঃ পৃথুদীর্ঘনেত্র;স্তাম্রায়তাস্যঃ কুরুরাজ এষঃ

অয়ং পুনর্মত্তগজেন্দ্রগামী; প্রতপ্তচামীকরশুদ্ধগৌরঃ
পৃথ্বায়তাংসঃ পৃথুদীর্ঘবাহু;র্বৃকোদরঃ পশ্যত পশ্যতৈনম্

যস্ত্বেষ পার্শ্বেঽস্য মহাধনুষ্মা;ঞ্শ্যামো যুবা বারণয়ূথপাভঃ
সিংহোন্নতাংসো গজখেলগামী; পদ্মায়তাক্ষোঽর্জুন এষ বীরঃ

কুন্তীসমীপে পুরুষোত্তমৌ তু; যমাবিমৌ বিষ্ণুমহেন্দ্রকল্পৌ
মনুষ্যলোকে সকলে সমোঽস্তি; যয়োর্ন রূপে ন বলে ন শীলে

ইয়ং পুনঃ পদ্মদলায়তাক্ষী; মধ্যং বয়ঃ কিংচিদিব স্পৃশন্তী
নীলোত্পলাভা পুরদেবতেব; কৃষ্ণা স্থিতা মূর্তিমতীব লক্ষ্মীঃ

অস্যাস্তু পার্শ্বে কনকোত্তমাভা; যৈষা প্রভা মূর্তিমতীব গৌরী
মধ্যে স্থিতৈষা ভগিনী দ্বিজাগ্র্যা; চক্রায়ুধস্যাপ্রতিমস্য তস্য

ইয়ং স্বসা রাজচমূপতেস্তু; প্রবৃদ্ধনীলোত্পলদামবর্ণা
পস্পর্ধ কৃষ্ণেন নৃপঃ সদা যো; বৃকোদরস্যৈষ পরিগ্রহোঽগ্র্যঃ

ইয়ং চ রাজ্ঞো মগধাধিপস্য; সুতা জরাসংধ ইতি শ্রুতস্য
যবীয়সো মাদ্রবতীসুতস্য; ভার্যা মতা চম্পকদামগৌরী

ইন্দীবরশ্যামতনুঃ স্থিতা তু; যৈষাপরাসন্নমহীতলে চ
ভার্যা মতা মাদ্রবতীসুতস্য; জ্যেষ্ঠস্য সেয়ং কমলায়তাক্ষী

ইয়ং তু নিষ্টপ্তসুবর্ণগৌরী; রাজ্ঞো বিরাটস্য সুতা সপুত্রা
ভার্যাভিমন্যোর্নিহতো রণে যো; দ্রোণাদিভিস্তৈর্বিরথো রথস্থৈঃ

এতাস্তু সীমন্তশিরোরুহা যাঃ; শুক্লোত্তরীয়া নররাজপত্ন্যঃ
রাজ্ঞোঽস্য বৃদ্ধস্য পরংশতাখ্যাঃ; স্নুষা বিবীরা হতপুত্রনাথাঃ

এতা যথামুখ্যমুদাহৃতা বো; ব্রাহ্মণ্যভাবাদৃজুবুদ্ধিসত্ত্বাঃ
সর্বা ভবদ্ভিঃ পরিপৃচ্ছ্যমানা; নরেন্দ্রপত্ন্যঃ সুবিশুদ্ধসত্ত্বাঃ

এবং স রাজা কুরুবৃদ্ধবর্যঃ; সমাগতস্তৈর্নরদেবপুত্রৈঃ
পপ্রচ্ছ সর্বান্কুশলং তদানীং; গতেষু সর্বেষ্বথ তাপসেষু

যোধেষু চাপ্যাশ্রমমণ্ডলং তং; মুক্ত্বা নিবিষ্টেষু বিমুচ্য পত্রম্
স্ত্রীবৃদ্ধবালে চ সুসংনিবিষ্টে; যথার্হতঃ কুশলং পর্যপৃচ্ছৎ