Utshovঅধ্যায় 33
33.1
ধৃতরাষ্ট্র উবাচ
যুধিষ্ঠির মহাবাহো কচ্চিত্তাত কুশল্যসি
সহিতো ভ্রাতৃভিঃ সর্বৈঃ পৌরজানপদৈস্তথা
33.2
যে চ ত্বামুপজীবন্তি কচ্চিত্তেঽপি নিরাময়াঃ
সচিবা ভৃত্যবর্গাশ্চ গুরবশ্চৈব তে বিভো
33.3
কচ্চিদ্বর্তসি পৌরাণীং বৃত্তিং রাজর্ষিসেবিতাম্
কচ্চিদ্দায়াননুচ্ছিদ্য কোশস্তেঽভিপ্রপূর্যতে
33.4
অরিমধ্যস্থমিত্রেষু বর্তসে চানুরূপতঃ
ব্রাহ্মণানগ্রহারৈর্বা যথাবদনুপশ্যসি
33.5
কচ্চিত্তে পরিতুষ্যন্তি শীলেন ভরতর্ষভ
শত্রবো গুরবঃ পৌরা ভৃত্যা বা স্বজনোঽপি বা
33.6
কচ্চিদ্যজসি রাজেন্দ্র শ্রদ্ধাবান্পিতৃদেবতাঃ
অতিথীংশ্চান্নপানেন কচ্চিদর্চসি ভারত
33.7
কচ্চিচ্চ বিষয়ে বিপ্রাঃ স্বকর্মনিরতাস্তব
ক্ষত্রিয়া বৈশ্যবর্গা বা শূদ্রা বাপি কুটুম্বিনঃ
33.8
কচ্চিত্স্ত্রীবালবৃদ্ধং তে ন শোচতি ন যাচতে
জাময়ঃ পূজিতাঃ কচ্চিত্তব গেহে নরর্ষভ
33.9
কচ্চিদ্রাজর্ষিবংশোঽয়ং ত্বামাসাদ্য মহীপতিম্
যথোচিতং মহারাজ যশসা নাবসীদতি
33.10
বৈশংপায়ন উবাচ
ইত্যেবংবাদিনং তং স ন্যায়বিত্প্রত্যভাষত
কুশলপ্রশ্নসংয়ুক্তং কুশলো বাক্যকর্মণি
33.11
কচ্চিত্তে বর্ধতে রাজংস্তপো মন্দশ্রমস্য তে
অপি মে জননী চেয়ং শুশ্রূষুর্বিগতক্লমা
অপ্যস্যাঃ সফলো রাজন্বনবাসো ভবিষ্যতি
33.12
ইয়ং চ মাতা জ্যেষ্ঠা মে শীতবাতাধ্বকর্শিতা
ঘোরেণ তপসা যুক্তা দেবী কচ্চিন্ন শোচতি
33.13
হতান্পুত্রান্মহাবীর্যান্ক্ষত্রধর্মপরায়ণান্
নাপধ্যায়তি বা কচ্চিদস্মান্পাপকৃতঃ সদা
33.14
ক্ব চাসৌ বিদুরো রাজন্নৈনং পশ্যামহে বয়ম্
সংজয়ঃ কুশলী চায়ং কচ্চিন্নু তপসি স্থিতঃ
33.15
ইত্যুক্তঃ প্রত্যুবাচেদং ধৃতরাষ্ট্রো জনাধিপম্
কুশলী বিদুরঃ পুত্র তপো ঘোরং সমাস্থিতঃ
33.16
বায়ুভক্ষো নিরাহারঃ কৃশো ধমনিসংততঃ
কদাচিদ্দৃশ্যতে বিপ্রৈঃ শূন্যেঽস্মিন্কাননে ক্বচিৎ
33.17
ইত্যেবং বদতস্তস্য জটী বীটামুখঃ কৃশঃ
দিগ্বাসা মলদিগ্ধাঙ্গো বনরেণুসমুক্ষিতঃ
33.18
দূরাদালক্ষিতঃ ক্ষত্তা তত্রাখ্যাতো মহীপতেঃ
নিবর্তমানঃ সহসা জনং দৃষ্ট্বাশ্রমং প্রতি
33.19
তমন্বধাবন্নৃপতিরেক এব যুধিষ্ঠিরঃ
প্রবিশন্তং বনং ঘোরং লক্ষ্যালক্ষ্যং ক্বচিত্ক্বচিৎ
33.20
ভো ভো বিদুর রাজাহং দয়িতস্তে যুধিষ্ঠিরঃ
ইতি ব্রুবন্নরপতিস্তং যত্নাদভ্যধাবত
33.21
ততো বিবিক্ত একান্তে তস্থৌ বুদ্ধিমতাং বরঃ
বিদুরো বৃক্ষমাশ্রিত্য কংচিত্তত্র বনান্তরে
33.22
তং রাজা ক্ষীণভূয়িষ্ঠমাকৃতীমাত্রসূচিতম্
অভিজজ্ঞে মহাবুদ্ধিং মহাবুদ্ধির্যুধিষ্ঠিরঃ
33.23
যুধিষ্ঠিরোঽহমস্মীতি বাক্যমুক্ত্বাগ্রতঃ স্থিতঃ
বিদুরস্যাশ্রবে রাজা স চ প্রত্যাহ সংজ্ঞয়া
33.24
ততঃ সোঽনিমিষো ভূত্বা রাজানং সমুদৈক্ষত
সংয়োজ্য বিদুরস্তস্মিন্দৃষ্টিং দৃষ্ট্যা সমাহিতঃ
33.25
বিবেশ বিদুরো ধীমান্গাত্রৈর্গাত্রাণি চৈব হ
প্রাণান্প্রাণেষু চ দধদিন্দ্রিয়াণীন্দ্রিয়েষু চ
33.26
স যোগবলমাস্থায় বিবেশ নৃপতেস্তনুম্
বিদুরো ধর্মরাজস্য তেজসা প্রজ্বলন্নিব
33.27
বিদুরস্য শরীরং তত্তথৈব স্তব্ধলোচনম্
বৃক্ষাশ্রিতং তদা রাজা দদর্শ গতচেতনম্
33.28
বলবন্তং তথাত্মানং মেনে বহুগুণং তদা
ধর্মরাজো মহাতেজাস্তচ্চ সস্মার পাণ্ডবঃ
33.29
পৌরাণমাত্মনঃ সর্বং বিদ্যাবান্স বিশাং পতে
যোগধর্মং মহাতেজা ব্যাসেন কথিতং যথা
33.30
ধর্মরাজস্তু তত্রৈনং সংচস্কারয়িষুস্তদা
দগ্ধুকামোঽভবদ্বিদ্বানথ বৈ বাগভাষত
33.31
ভো ভো রাজন্ন দগ্ধব্যমেতদ্বিদুরসংজ্ঞকম্
কলেবরমিহৈতত্তে ধর্ম এষ সনাতনঃ
33.32
লোকাঃ সংতানকা নাম ভবিষ্যন্ত্যস্য পার্থিব
যতিধর্মমবাপ্তোঽসৌ নৈব শোচ্যঃ পরংতপ
33.33
ইত্যুক্তো ধর্মরাজঃ স বিনিবৃত্য ততঃ পুনঃ
রাজ্ঞো বৈচিত্রবীর্যস্য তত্সর্বং প্রত্যবেদয়ৎ
33.34
ততঃ স রাজা দ্যুতিমান্স চ সর্বো জনস্তদা
ভীমসেনাদয়শ্চৈব পরং বিস্ময়মাগতাঃ
33.35
তচ্ছ্রুত্বা প্রীতিমান্রাজা ভূত্বা ধর্মজমব্রবীৎ
আপো মূলং ফলং চৈব মমেদং প্রতিগৃহ্যতাম্
33.36
যদন্নো হি নরো রাজংস্তদন্নোঽস্যাতিথিঃ স্মৃতঃ
ইত্যুক্তঃ স তথেত্যেব প্রাহ ধর্মাত্মজো নৃপম্
ফলং মূলং চ বুভুজে রাজ্ঞা দত্তং সহানুজঃ
33.37
ততস্তে বৃক্ষমূলেষু কৃতবাসপরিগ্রহাঃ
তাং রাত্রিং ন্যবসন্সর্বে ফলমূলজলাশনাঃ