Utshovঅধ্যায় 34
34.1
বৈশংপায়ন উবাচ
এবং সা রজনী তেষামাশ্রমে পুণ্যকর্মণাম্
শিবা নক্ষত্রসংপন্না সা ব্যতীয়ায় ভারত
34.2
তত্র তত্র কথাশ্চাসংস্তেষাং ধর্মার্থলক্ষণাঃ
বিচিত্রপদসংচারা নানাশ্রুতিভিরন্বিতাঃ
34.3
পাণ্ডবাস্ত্বভিতো মাতুর্ধরণ্যাং সুষুপুস্তদা
উত্সৃজ্য সুমহার্হাণি শয়নানি নরাধিপ
34.4
যদাহারোঽভবদ্রাজা ধৃতরাষ্ট্রো মহামনাঃ
তদাহারা নৃবীরাস্তে ন্যবসংস্তাং নিশাং তদা
34.5
ব্যতীতায়াং তু শর্বর্যাং কৃতপূর্বাহ্ণিকক্রিয়ঃ
ভ্রাতৃভিঃ সহ কৌন্তেয়ো দদর্শাশ্রমমণ্ডলম্
34.6
সান্তঃপুরপরীবারঃ সভৃত্যঃ সপুরোহিতঃ
যথাসুখং যথোদ্দেশং ধৃতরাষ্ট্রাভ্যনুজ্ঞয়া
34.7
দদর্শ তত্র বেদীশ্চ সংপ্রজ্বলিতপাবকাঃ
কৃতাভিষেকৈর্মুনিভির্হুতাগ্নিভিরুপস্থিতাঃ
34.8
বানেয়পুষ্পনিকরৈরাজ্যধূমোদ্গমৈরপি
ব্রাহ্মেণ বপুষা যুক্তা যুক্তা মুনিগণৈশ্চ তাঃ
34.9
মৃগয়ূথৈরনুদ্বিগ্নৈস্তত্র তত্র সমাশ্রিতৈঃ
অশঙ্কিতৈঃ পক্ষিগণৈঃ প্রগীতৈরিব চ প্রভো
34.10
কেকাভির্নীলকণ্ঠানাং দাত্যূহানাং চ কূজিতৈঃ
কোকিলানাং চ কুহরৈঃ শুভৈঃ শ্রুতিমনোহরৈঃ
34.11
প্রাধীতদ্বিজঘোষৈশ্চ ক্বচিত্ক্বচিদলংকৃতম্
ফলমূলসমুদ্বাহৈর্মহদ্ভিশ্চোপশোভিতম্
34.12
ততঃ স রাজা প্রদদৌ তাপসার্থমুপাহৃতান্
কলশান্কাঞ্চনান্রাজংস্তথৈবৌদুম্বরানপি
34.13
অজিনানি প্রবেণীশ্চ স্রুক্স্রুবং চ মহীপতিঃ
কমণ্ডলূংস্তথা স্থালীঃ পিঠরাণি চ ভারত
34.14
ভাজনানি চ লৌহানি পাত্রীশ্চ বিবিধা নৃপ
যদ্যদিচ্ছতি যাবচ্চ যদন্যদপি কাঙ্ক্ষিতম্
34.15
এবং স রাজা ধর্মাত্মা পরীত্যাশ্রমমণ্ডলম্
বসু বিশ্রাণ্য তত্সর্বং পুনরায়ান্মহীপতিঃ
34.16
কৃতাহ্নিকং চ রাজানং ধৃতরাষ্ট্রং মনীষিণম্
দদর্শাসীনমব্যগ্রং গান্ধারীসহিতং তদা
34.17
মাতরং চাবিদূরস্থাং শিষ্যবত্প্রণতাং স্থিতাম্
কুন্তীং দদর্শ ধর্মাত্মা সততং ধর্মচারিণীম্
34.18
স তমভ্যর্চ্য রাজানং নাম সংশ্রাব্য চাত্মনঃ
নিষীদেত্যভ্যনুজ্ঞাতো বৃস্যামুপবিবেশ হ
34.19
ভীমসেনাদয়শ্চৈব পাণ্ডবাঃ কৌরবর্ষভম্
অভিবাদ্যোপসংগৃহ্য নিষেদুঃ পার্থিবাজ্ঞয়া
34.20
স তৈঃ পরিবৃতো রাজা শুশুভেঽতীব কৌরবঃ
বিভ্রদ্ব্রাহ্মীং শ্রিয়ং দীপ্তাং দেবৈরিব বৃহস্পতিঃ
34.21
তথা তেষূপবিষ্টেষু সমাজগ্মুর্মহর্ষয়ঃ
শতয়ূপপ্রভৃতয়ঃ কুরুক্ষেত্রনিবাসিনঃ
34.22
ব্যাসশ্চ ভগবান্বিপ্রো দেবর্ষিগণপূজিতঃ
বৃতঃ শিষ্যৈর্মহাতেজা দর্শয়ামাস তং নৃপম্
34.23
ততঃ স রাজা কৌরব্যঃ কুন্তীপুত্রশ্চ বীর্যবান্
ভীমসেনাদয়শ্চৈব সমুত্থায়াভ্যপূজয়ন্
34.24
সমাগতস্ততো ব্যাসঃ শতয়ূপাদিভির্বৃতঃ
ধৃতরাষ্ট্রং মহীপালমাস্যতামিত্যভাষত
34.25
নবং তু বিষ্টরং কৌশ্যং কৃষ্ণাজিনকুশোত্তরম্
প্রতিপেদে তদা ব্যাসস্তদর্থমুপকল্পিতম্
34.26
তে চ সর্বে দ্বিজশ্রেষ্ঠা বিষ্টরেষু সমন্ততঃ
দ্বৈপায়নাভ্যনুজ্ঞাতা নিষেদুর্বিপুলৌজসঃ