অধ্যায় 35

35.1

বৈশংপায়ন উবাচ
তথা সমুপবিষ্টেষু পাণ্ডবেষু মহাত্মসু
ব্যাসঃ সত্যবতীপুত্রঃ প্রোবাচামন্ত্র্য পার্থিবম্

35.2

ধৃতরাষ্ট্র মহাবাহো কচ্চিত্তে বর্ধতে তপঃ
কচ্চিন্মনস্তে প্রীণাতি বনবাসে নরাধিপ

35.3

কচ্চিদ্ধৃদি ন তে শোকো রাজন্পুত্রবিনাশজঃ
কচ্চিজ্জ্ঞানানি সর্বাণি প্রসন্নানি তবানঘ

35.4

কচ্চিদ্বুদ্ধিং দৃঢাং কৃত্বা চরস্যারণ্যকং বিধিম্
কচ্চিদ্বধূশ্চ গান্ধারী ন শোকেনাভিভূয়তে

35.5

মহাপ্রজ্ঞা বুদ্ধিমতী দেবী ধর্মার্থদর্শিনী
আগমাপায়তত্ত্বজ্ঞা কচ্চিদেষা ন শোচতি

35.6

কচ্চিত্কুন্তী চ রাজংস্ত্বাং শুশ্রূষুরনহংকৃতা
যা পরিত্যজ্য রাজ্যং স্বং গুরুশুশ্রূষণে রতা

35.7

কচ্চিদ্ধর্মসুতো রাজা ত্বয়া প্রীত্যাভিনন্দিতঃ
ভীমার্জুনয়মাশ্চৈব কচ্চিদেতেঽপি সান্ত্বিতাঃ

35.8

কচ্চিন্নন্দসি দৃষ্ট্বৈতান্কচ্চিত্তে নির্মলং মনঃ
কচ্চিদ্বিশুদ্ধভাবোঽসি জাতজ্ঞানো নরাধিপ

35.9

এতদ্ধি ত্রিতয়ং শ্রেষ্ঠং সর্বভূতেষু ভারত
নির্বৈরতা মহারাজ সত্যমদ্রোহ এব চ

35.10

কচ্চিত্তে নানুতাপোঽস্তি বনবাসেন ভারত
স্বদতে বন্যমন্নং বা মুনিবাসাংসি বা বিভো

35.11

বিদিতং চাপি মে রাজন্বিদুরস্য মহাত্মনঃ
গমনং বিধিনা যেন ধর্মস্য সুমহাত্মনঃ

35.12

মাণ্ডব্যশাপাদ্ধি স বৈ ধর্মো বিদুরতাং গতঃ
মহাবুদ্ধির্মহায়োগী মহাত্মা সুমহামনাঃ

35.13

বৃহস্পতির্বা দেবেষু শুক্রো বাপ্যসুরেষু যঃ
ন তথা বুদ্ধিসংপন্নো যথা স পুরুষর্ষভঃ

35.14

তপোবলব্যয়ং কৃত্বা সুমহচ্চিরসংভৃতম্
মাণ্ডব্যেনর্ষিণা ধর্মো হ্যভিভূতঃ সনাতনঃ

35.15

নিয়োগাদ্ব্রহ্মণঃ পূর্বং ময়া স্বেন বলেন চ
বৈচিত্রবীর্যকে ক্ষেত্রে জাতঃ স সুমহামতিঃ

35.16

ভ্রাতা তব মহারাজ দেবদেবঃ সনাতনঃ
ধারণাচ্ছ্রেয়সো ধ্যানাদ্যং ধর্মং কবয়ো বিদুঃ

35.17

সত্যেন সংবর্ধয়তি দমেন নিয়মেন চ
অহিংসয়া চ দানেন তপসা চ সনাতনঃ

35.18

যেন যোগবলাজ্জাতঃ কুরুরাজো যুধিষ্ঠিরঃ
ধর্ম ইত্যেষ নৃপতে প্রাজ্ঞেনামিতবুদ্ধিনা

35.19

যথা হ্যগ্নির্যথা বায়ুর্যথাপঃ পৃথিবী যথা
যথাকাশং তথা ধর্ম ইহ চামুত্র চ স্থিতঃ

35.20

সর্বগশ্চৈব কৌরব্য সর্বং ব্যাপ্য চরাচরম্
দৃশ্যতে দেবদেবঃ স সিদ্ধৈর্নির্দগ্ধকিল্বিষৈঃ

35.21

যো হি ধর্মঃ স বিদুরো বিদুরো যঃ স পাণ্ডবঃ
স এষ রাজন্বশ্যস্তে পাণ্ডবঃ প্রেষ্যবত্স্থিতঃ

35.22

প্রবিষ্টঃ স স্বমাত্মানং ভ্রাতা তে বুদ্ধিসত্তমঃ
দিষ্ট্যা মহাত্মা কৌন্তেয়ং মহায়োগবলান্বিতঃ

35.23

ত্বাং চাপি শ্রেয়সা যোক্ষ্যে নচিরাদ্ভরতর্ষভ
সংশয়চ্ছেদনার্থং হি প্রাপ্তং মাং বিদ্ধি পুত্রক

35.24

ন কৃতং যত্পুরা কৈশ্চিত্কর্ম লোকে মহর্ষিভিঃ
আশ্চর্যভূতং তপসঃ ফলং সংদর্শয়ামি বঃ

35.25

কিমিচ্ছসি মহীপাল মত্তঃ প্রাপ্তুমমানুষম্
দ্রষ্টুং স্প্রষ্টুমথ শ্রোতুং বদ কর্তাস্মি তত্তথা

Contains text from DharmicData, made available under the Open Database License (ODbL). Simple meanings are written by AI and can contain mistakes.