Utshovঅধ্যায় 36
36.1
জনমেজয় উবাচ
বনবাসং গতে বিপ্র ধৃতরাষ্ট্রে মহীপতৌ
সভার্যে নৃপশার্দূলে বধ্বা কুন্ত্যা সমন্বিতে
36.2
বিদুরে চাপি সংসিদ্ধে ধর্মরাজং ব্যপাশ্রিতে
বসত্সু পাণ্ডুপুত্রেষু সর্বেষ্বাশ্রমমণ্ডলে
36.3
যত্তদাশ্চর্যমিতি বৈ করিষ্যামীত্যুবাচ হ
ব্যাসঃ পরমতেজস্বী মহর্ষিস্তদ্বদস্ব মে
36.4
বনবাসে চ কৌরব্যঃ কিয়ন্তং কালমচ্যুতঃ
যুধিষ্ঠিরো নরপতির্ন্যবসত্সজনো দ্বিজ
36.5
কিমাহারাশ্চ তে তত্র সসৈন্যা ন্যবসন্প্রভো
সান্তঃপুরা মহাত্মান ইতি তদ্ব্রূহি মেঽনঘ
36.6
বৈশংপায়ন উবাচ
তেঽনুজ্ঞাতাস্তদা রাজন্কুরুরাজেন পাণ্ডবাঃ
বিবিধান্যন্নপানানি বিশ্রাম্যানুভবন্তি তে
36.7
মাসমেকং বিজহ্রুস্তে সসৈন্যান্তঃপুরা বনে
অথ তত্রাগমদ্ব্যাসো যথোক্তং তে ময়ানঘ
36.8
তথা তু তেষাং সর্বেষাং কথাভির্নৃপসংনিধৌ
ব্যাসমন্বাসতাং রাজন্নাজগ্মুর্মুনয়োঽপরে
36.9
নারদঃ পর্বতশ্চৈব দেবলশ্চ মহাতপাঃ
বিশ্বাবসুস্তুম্বুরুশ্চ চিত্রসেনশ্চ ভারত
36.10
তেষামপি যথান্যায়ং পূজাং চক্রে মহামনাঃ
ধৃতরাষ্ট্রাভ্যনুজ্ঞাতঃ কুরুরাজো যুধিষ্ঠিরঃ
36.11
নিষেদুস্তে ততঃ সর্বে পূজাং প্রাপ্য যুধিষ্ঠিরাৎ
আসনেষ্বথ পুণ্যেষু বর্হিষ্কেষু বরেষু চ
36.12
তেষু তত্রোপবিষ্টেষু স তু রাজা মহামতিঃ
পাণ্ডুপুত্রৈঃ পরিবৃতো নিষসাদ কুরূদ্বহঃ
36.13
গান্ধারী চৈব কুন্তী চ দ্রৌপদী সাত্বতী তথা
স্ত্রিয়শ্চান্যাস্তথান্যাভিঃ সহোপবিবিশুস্ততঃ
36.14
তেষাং তত্র কথা দিব্যা ধর্মিষ্ঠাশ্চাভবন্নৃপ
ঋষীণাং চ পুরাণানাং দেবাসুরবিমিশ্রিতাঃ
36.15
ততঃ কথান্তে ব্যাসস্তং প্রজ্ঞাচক্ষুষমীশ্বরম্
প্রোবাচ বদতাং শ্রেষ্ঠঃ পুনরেব স তদ্বচঃ
প্রীয়মাণো মহাতেজাঃ সর্ববেদবিদাং বরঃ
36.16
বিদিতং মম রাজেন্দ্র যত্তে হৃদি বিবক্ষিতম্
দহ্যমানস্য শোকেন তব পুত্রকৃতেন বৈ
36.17
গান্ধার্যাশ্চৈব যদ্দুঃখং হৃদি তিষ্ঠতি পার্থিব
কুন্ত্যাশ্চ যন্মহারাজ দ্রৌপদ্যাশ্চ হৃদি স্থিতম্
36.18
যচ্চ ধারয়তে তীব্রং দুঃখং পুত্রবিনাশজম্
সুভদ্রা কৃষ্ণভগিনী তচ্চাপি বিদিতং মম
36.19
শ্রুত্বা সমাগমমিমং সর্বেষাং বস্ততো নৃপ
সংশয়চ্ছেদনায়াহং প্রাপ্তঃ কৌরবনন্দন
36.20
ইমে চ দেবগন্ধর্বাঃ সর্বে চৈব মহর্ষয়ঃ
পশ্যন্তু তপসো বীর্যমদ্য মে চিরসংভৃতম্
36.21
তদুচ্যতাং মহাবাহো কং কামং প্রদিশামি তে
প্রবণোঽস্মি বরং দাতুং পশ্য মে তপসো বলম্
36.22
এবমুক্তঃ স রাজেন্দ্রো ব্যাসেনামিতবুদ্ধিনা
মুহূর্তমিব সংচিন্ত্য বচনায়োপচক্রমে
36.23
ধন্যোঽস্ম্যনুগৃহীতোঽস্মি সফলং জীবিতং চ মে
যন্মে সমাগমোঽদ্যেহ ভবদ্ভিঃ সহ সাধুভিঃ
36.24
অদ্য চাপ্যবগচ্ছামি গতিমিষ্টামিহাত্মনঃ
ভবদ্ভির্ব্রহ্মকল্পৈর্যত্সমেতোঽহং তপোধনাঃ
36.25
দর্শনাদেব ভবতাং পূতোঽহং নাত্র সংশয়ঃ
বিদ্যতে ন ভয়ং চাপি পরলোকান্মমানঘাঃ
36.26
কিং তু তস্য সুদুর্বুদ্ধের্মন্দস্যাপনয়ৈর্ভৃশম্
দূয়তে মে মনো নিত্যং স্মরতঃ পুত্রগৃদ্ধিনঃ
36.27
অপাপাঃ পাণ্ডবা যেন নিকৃতাঃ পাপবুদ্ধিনা
ঘাতিতা পৃথিবী চেয়ং সহসা সনরদ্বিপা
36.28
রাজানশ্চ মহাত্মানো নানাজনপদেশ্বরাঃ
আগম্য মম পুত্রার্থে সর্বে মৃত্যুবশং গতাঃ
36.29
যে তে পুত্রাংশ্চ দারাশ্চ প্রাণাংশ্চ মনসঃ প্রিয়ান্
পরিত্যজ্য গতাঃ শূরাঃ প্রেতরাজনিবেশনম্
36.30
কা নু তেষাং গতির্ব্রহ্মন্মিত্রার্থে যে হতা মৃধে
তথৈব পুত্রপৌত্রাণাং মম যে নিহতা যুধি
36.31
দূয়তে মে মনোঽভীক্ষ্ণং ঘাতয়িত্বা মহাবলম্
ভীষ্মং শাংতনবং বৃদ্ধং দ্রোণং চ দ্বিজসত্তমম্
36.32
মম পুত্রেণ মূঢেন পাপেন সুহৃদদ্বিষা
ক্ষয়ং নীতং কুলং দীপ্তং পৃথিবীরাজ্যমিচ্ছতা
36.33
এতত্সর্বমনুস্মৃত্য দহ্যমানো দিবানিশম্
ন শান্তিমধিগচ্ছামি দুঃখশোকসমাহতঃ
ইতি মে চিন্তয়ানস্য পিতঃ শর্ম ন বিদ্যতে