অধ্যায় 37

37.1

বৈশংপায়ন উবাচ
তচ্ছ্রুত্বা বিবিধং তস্য রাজর্ষেঃ পরিদেবিতম্
পুনর্নবীকৃতঃ শোকো গান্ধার্যা জনমেজয়

কুন্ত্যা দ্রুপদপুত্র্যাশ্চ সুভদ্রায়াস্তথৈব চ
তাসাং চ বরনারীণাং বধূনাং কৌরবস্য হ

পুত্রশোকসমাবিষ্টা গান্ধারী ত্বিদমব্রবীৎ
শ্বশুরং বদ্ধনয়না দেবী প্রাঞ্জলিরুত্থিতা

ষোডশেমানি বর্ষাণি গতানি মুনিপুংগব
অস্য রাজ্ঞো হতান্পুত্রাঞ্শোচতো ন শমো বিভো

পুত্রশোকসমাবিষ্টো নিঃশ্বসন্হ্যেষ ভূমিপঃ
ন শেতে বসতীঃ সর্বা ধৃতরাষ্ট্রো মহামুনে

লোকানন্যান্সমর্থোঽসি স্রষ্টুং সর্বাংস্তপোবলাৎ
কিমু লোকান্তরগতান্রাজ্ঞো দর্শয়িতুং সুতান্

ইয়ং চ দ্রৌপদী কৃষ্ণা হতজ্ঞাতিসুতা ভৃশম্
শোচত্যতীব সাধ্বী তে স্নুষাণাং দয়িতা স্নুষা

তথা কৃষ্ণস্য ভগিনী সুভদ্রা ভদ্রভাষিণী
সৌভদ্রবধসংতপ্তা ভৃশং শোচতি ভামিনী

ইয়ং চ ভূরিশ্রবসো ভার্যা পরমদুঃখিতা
ভর্তৃব্যসনশোকার্তা ন শেতে বসতীঃ প্রভো

যস্যাস্তু শ্বশুরো ধীমান্বাহ্লীকঃ স কুরূদ্বহঃ
নিহতঃ সোমদত্তশ্চ পিত্রা সহ মহারণে

শ্রীমচ্চাস্য মহাবুদ্ধেঃ সংগ্রামেষ্বপলায়িনঃ
পুত্রস্য তে পুত্রশতং নিহতং যদ্রণাজিরে

তস্য ভার্যাশতমিদং পুত্রশোকসমাহতম্
পুনঃ পুনর্বর্ধয়ানং শোকং রাজ্ঞো মমৈব চ
তেনারম্ভেণ মহতা মামুপাস্তে মহামুনে

যে চ শূরা মহাত্মানঃ শ্বশুরা মে মহারথাঃ
সোমদত্তপ্রভৃতয়ঃ কা নু তেষাং গতিঃ প্রভো

তব প্রসাদাদ্ভগবন্বিশোকোঽয়ং মহীপতিঃ
কুর্যাত্কালমহং চৈব কুন্তী চেয়ং বধূস্তব

ইত্যুক্তবত্যাং গান্ধার্যাং কুন্তী ব্রতকৃশাননা
প্রচ্ছন্নজাতং পুত্রং তং সস্মারাদিত্যসংভবম্

তামৃষির্বরদো ব্যাসো দূরশ্রবণদর্শনঃ
অপশ্যদ্দুঃখিতাং দেবীং মাতরং সব্যসাচিনঃ

তামুবাচ ততো ব্যাসো যত্তে কার্যং বিবক্ষিতম্
তদ্ব্রূহি ত্বং মহাপ্রাজ্ঞে যত্তে মনসি বর্ততে

ততঃ কুন্তী শ্বশুরয়োঃ প্রণম্য শিরসা তদা
উবাচ বাক্যং সব্রীডং বিবৃণ্বানা পুরাতনম্