অধ্যায় 38

38.1

কুন্ত্যুবাচ
ভগবঞ্শ্বশুরো মেঽসি দৈবতস্যাপি দৈবতম্
স মে দেবাতিদেবস্ত্বং শৃণু সত্যাং গিরং মম

তপস্বী কোপনো বিপ্রো দুর্বাসা নাম মে পিতুঃ
ভিক্ষামুপাগতো ভোক্তুং তমহং পর্যতোষয়ম্

শৌচেন ত্বাগসস্ত্যাগৈঃ শুদ্ধেন মনসা তথা
কোপস্থানেষ্বপি মহত্স্বকুপ্যং ন কদাচন

স মে বরমদাত্প্রীতঃ কৃতমিত্যহমব্রুবম্
অবশ্যং তে গ্রহীতব্যমিতি মাং সোঽব্রবীদ্বচঃ

ততঃ শাপভয়াদ্বিপ্রমবোচং পুনরেব তম্
এবমস্ত্বিতি চ প্রাহ পুনরেব স মাং দ্বিজঃ

ধর্মস্য জননী ভদ্রে ভবিত্রী ত্বং বরাননে
বশে স্থাস্যন্তি তে দেবা যাংস্ত্বমাবাহয়িষ্যসি

ইত্যুক্ত্বান্তর্হিতো বিপ্রস্ততোঽহং বিস্মিতাভবম্
ন চ সর্বাস্ববস্থাসু স্মৃতির্মে বিপ্রণশ্যতি

অথ হর্ম্যতলস্থাহং রবিমুদ্যন্তমীক্ষতী
সংস্মৃত্য তদৃষের্বাক্যং স্পৃহয়ন্তী দিবাকরম্
স্থিতাহং বালভাবেন তত্র দোষমবুধ্যতী

অথ দেবঃ সহস্রাংশুর্মত্সমীপগতোঽভবৎ
দ্বিধা কৃত্বাত্মনো দেহং ভূমৌ চ গগনেঽপি চ
ততাপ লোকানেকেন দ্বিতীয়েনাগমচ্চ মাম্

স মামুবাচ বেপন্তীং বরং মত্তো বৃণীষ্ব হ
গম্যতামিতি তং চাহং প্রণম্য শিরসাবদম্

স মামুবাচ তিগ্মাংশুর্বৃথাহ্বানং ন তে ক্ষমম্
ধক্ষ্যামি ত্বাং চ বিপ্রং চ যেন দত্তো বরস্তব

তমহং রক্ষতী বিপ্রং শাপাদনপরাধিনম্
পুত্রো মে ত্বত্সমো দেব ভবেদিতি ততোঽব্রুবম্

ততো মাং তেজসাবিশ্য মোহয়িত্বা চ ভানুমান্
উবাচ ভবিতা পুত্রস্তবেত্যভ্যগমদ্দিবম্

ততোঽহমন্তর্ভবনে পিতুর্বৃত্তান্তরক্ষিণী
গূঢোত্পন্নং সুতং বালং জলে কর্ণমবাসৃজম্

নূনং তস্যৈব দেবস্য প্রসাদাত্পুনরেব তু
কন্যাহমভবং বিপ্র যথা প্রাহ স মামৃষিঃ

স ময়া মূঢয়া পুত্রো জ্ঞায়মানোঽপ্যুপেক্ষিতঃ
তন্মাং দহতি বিপ্রর্ষে যথা সুবিদিতং তব

যদি পাপমপাপং বা তদেতদ্বিবৃতং ময়া
তন্মে ভয়ং ত্বং ভগবন্ব্যপনেতুমিহার্হসি

যচ্চাস্য রাজ্ঞো বিদিতং হৃদিস্থং ভবতোঽনঘ
তং চায়ং লভতাং কামমদ্যৈব মুনিসত্তম

ইত্যুক্তঃ প্রত্যুবাচেদং ব্যাসো বেদবিদাং বরঃ
সাধু সর্বমিদং তথ্যমেবমেব যথাত্থ মাম্

অপরাধশ্চ তে নাস্তি কন্যাভাবং গতা হ্যসি
দেবাশ্চৈশ্বর্যবন্তো বৈ শরীরাণ্যাবিশন্তি বৈ

সন্তি দেবনিকায়াশ্চ সংকল্পাজ্জনয়ন্তি যে
বাচা দৃষ্ট্যা তথা স্পর্শাত্সংঘর্ষেণেতি পঞ্চধা

মনুষ্যধর্মো দৈবেন ধর্মেণ ন হি যুজ্যতে
ইতি কুন্তি ব্যজানীহি ব্যেতু তে মানসো জ্বরঃ

সর্বং বলবতাং পথ্যং সর্বং বলবতাং শুচি
সর্বং বলবতাং ধর্মঃ সর্বং বলবতাং স্বকম্