Utshovঅধ্যায় 39
39.1
ব্যাস উবাচ
ভদ্রে দ্রক্ষ্যসি গান্ধারি পুত্রান্ভ্রাতৄন্সখীংস্তথা
বধূশ্চ পতিভিঃ সার্ধং নিশি সুপ্তোত্থিতা ইব
39.2
কর্ণং দ্রক্ষ্যতি কুন্তী চ সৌভদ্রং চাপি যাদবী
দ্রৌপদী পঞ্চ পুত্রাংশ্চ পিতৄন্ভ্রাতৄংস্তথৈব চ
39.3
পূর্বমেবৈষ হৃদয়ে ব্যবসায়োঽভবন্মম
যথাস্মি চোদিতো রাজ্ঞা ভবত্যা পৃথয়ৈব চ
39.4
ন তে শোচ্যা মহাত্মানঃ সর্ব এব নরর্ষভাঃ
ক্ষত্রধর্মপরাঃ সন্তস্তথা হি নিধনং গতাঃ
39.5
ভবিতব্যমবশ্যং তত্সুরকার্যমনিন্দিতে
অবতেরুস্ততঃ সর্বে দেবভাগৈর্মহীতলম্
39.6
গন্ধর্বাপ্সরসশ্চৈব পিশাচা গুহ্যরাক্ষসাঃ
তথা পুণ্যজনাশ্চৈব সিদ্ধা দেবর্ষয়োঽপি চ
39.7
দেবাশ্চ দানবাশ্চৈব তথা ব্রহ্মর্ষয়োঽমলাঃ
ত এতে নিধনং প্রাপ্তাঃ কুরুক্ষেত্রে রণাজিরে
39.8
গন্ধর্বরাজো যো ধীমান্ধৃতরাষ্ট্র ইতি শ্রুতঃ
স এব মানুষে লোকে ধৃতরাষ্ট্রঃ পতিস্তব
39.9
পাণ্ডুং মরুদ্গণং বিদ্ধি বিশিষ্টতমমচ্যুতম্
ধর্মস্যাংশোঽভবত্ক্ষত্তা রাজা চায়ং যুধিষ্ঠিরঃ
39.10
কলিং দুর্যোধনং বিদ্ধি শকুনিং দ্বাপরং তথা
দুঃশাসনাদীন্বিদ্ধি ত্বং রাক্ষসাঞ্শুভদর্শনে
39.11
মরুদ্গণাদ্ভীমসেনং বলবন্তমরিংদমম্
বিদ্ধি চ ত্বং নরমৃষিমিমং পার্থং ধনংজয়ম্
নারায়ণং হৃষীকেশমশ্বিনৌ যমজাবুভৌ
39.12
দ্বিধা কৃত্বাত্মনো দেহমাদিত্যং তপতাং বরম্
লোকাংশ্চ তাপয়ানং বৈ বিদ্ধি কর্ণং চ শোভনে
যশ্চ বৈরার্থমুদ্ভূতঃ সংঘর্ষজননস্তথা
39.13
যশ্চ পাণ্ডবদায়াদো হতঃ ষড্ভির্মহারথৈঃ
স সোম ইহ সৌভদ্রো যোগাদেবাভবদ্দ্বিধা
39.14
দ্রৌপদ্যা সহ সংভূতং ধৃষ্টদ্যুম্নং চ পাবকাৎ
অগ্নের্ভাগং শুভং বিদ্ধি রাক্ষসং তু শিখণ্ডিনম্
39.15
দ্রোণং বৃহস্পতের্ভাগং বিদ্ধি দ্রৌণিং চ রুদ্রজম্
ভীষ্মং চ বিদ্ধি গাঙ্গেয়ং বসুং মানুষতাং গতম্
39.16
এবমেতে মহাপ্রাজ্ঞে দেবা মানুষ্যমেত্য হি
ততঃ পুনর্গতাঃ স্বর্গং কৃতে কর্মণি শোভনে
39.17
যচ্চ বো হৃদি সর্বেষাং দুঃখমেনচ্চিরং স্থিতম্
তদদ্য ব্যপনেষ্যামি পরলোককৃতাদ্ভয়াৎ
39.18
সর্বে ভবন্তো গচ্ছন্তু নদীং ভাগীরথীং প্রতি
তত্র দ্রক্ষ্যথ তান্সর্বান্যে হতাস্মিন্রণাজিরে
39.19
বৈশংপায়ন উবাচ
ইতি ব্যাসস্য বচনং শ্রুত্বা সর্বো জনস্তদা
মহতা সিংহনাদেন গঙ্গামভিমুখো যয়ৌ
39.20
ধৃতরাষ্ট্রশ্চ সামাত্যঃ প্রয়য়ৌ সহ পাণ্ডবৈঃ
সহিতো মুনিশার্দূলৈর্গন্ধর্বৈশ্চ সমাগতৈঃ
39.21
ততো গঙ্গাং সমাসাদ্য ক্রমেণ স জনার্ণবঃ
নিবাসমকরোত্সর্বো যথাপ্রীতি যথাসুখম্
39.22
রাজা চ পাণ্ডবৈঃ সার্ধমিষ্টে দেশে সহানুগঃ
নিবাসমকরোদ্ধীমান্সস্ত্রীবৃদ্ধপুরঃসরঃ
39.23
জগাম তদহশ্চাপি তেষাং বর্ষশতং যথা
নিশাং প্রতীক্ষমাণানাং দিদৃক্ষূণাং মৃতান্নৃপান্
39.24
অথ পুণ্যং গিরিবরমস্তমভ্যগমদ্রবিঃ
ততঃ কৃতাভিষেকাস্তে নৈশং কর্ম সমাচরন্