অধ্যায় 40

40.1

বৈশংপায়ন উবাচ
ততো নিশায়াং প্রাপ্তায়াং কৃতসায়াহ্নিকক্রিয়াঃ
ব্যাসমভ্যগমন্সর্বে যে তত্রাসন্সমাগতাঃ

ধৃতরাষ্ট্রস্তু ধর্মাত্মা পাণ্ডবৈঃ সহিতস্তদা
শুচিরেকমনাঃ সার্ধমৃষিভিস্তৈরুপাবিশৎ

গান্ধার্যা সহ নার্যস্তু সহিতাঃ সমুপাবিশন্
পৌরজানপদশ্চাপি জনঃ সর্বো যথাবয়ঃ

ততো ব্যাসো মহাতেজাঃ পুণ্যং ভাগীরথীজলম্
অবগাহ্যাজুহাবাথ সর্বাঁল্লোকান্মহামুনিঃ

পাণ্ডবানাং চ যে যোধাঃ কৌরবাণাং চ সর্বশঃ
রাজানশ্চ মহাভাগা নানাদেশনিবাসিনঃ

ততঃ সুতুমুলঃ শব্দো জলান্তর্জনমেজয়
প্রাদুরাসীদ্যথা পূর্বং কুরুপাণ্ডবসেনয়োঃ

ততস্তে পার্থিবাঃ সর্বে ভীষ্মদ্রোণপুরোগমাঃ
সসৈন্যাঃ সলিলাত্তস্মাত্সমুত্তস্থুঃ সহস্রশঃ

বিরাটদ্রুপদৌ চোভৌ সপুত্রৌ সহসৈনিকৌ
দ্রৌপদেয়াশ্চ সৌভদ্রো রাক্ষসশ্চ ঘটোত্কচঃ

কর্ণদুর্যোধনৌ চোভৌ শকুনিশ্চ মহারথঃ
দুঃশাসনাদয়শ্চৈব ধার্তরাষ্ট্রা মহারথাঃ

জারাসংধির্ভগদত্তো জলসংধশ্চ পার্থিবঃ
ভূরিশ্রবাঃ শলঃ শল্যো বৃষসেনশ্চ সানুজঃ

লক্ষ্মণো রাজপুত্রশ্চ ধৃষ্টদ্যুম্নস্য চাত্মজাঃ
শিখণ্ডিপুত্রাঃ সর্বে চ ধৃষ্টকেতুশ্চ সানুজঃ

অচলো বৃষকশ্চৈব রাক্ষসশ্চাপ্যলায়ুধঃ
বাহ্লীকঃ সোমদত্তশ্চ চেকিতানশ্চ পার্থিবঃ

এতে চান্যে চ বহবো বহুত্বাদ্যে ন কীর্তিতাঃ
সর্বে ভাসুরদেহাস্তে সমুত্তস্থুর্জলাত্ততঃ

যস্য বীরস্য যো বেষো যো ধ্বজো যচ্চ বাহনম্
তেন তেন ব্যদৃশ্যন্ত সমুপেতা নরাধিপাঃ

দিব্যাম্বরধরাঃ সর্বে সর্বে ভ্রাজিষ্ণুকুণ্ডলাঃ
নির্বৈরা নিরহংকারা বিগতক্রোধমন্যবঃ

গন্ধর্বৈরুপগীয়ন্তঃ স্তূয়মানাশ্চ বন্দিভিঃ
দিব্যমাল্যাম্বরধরা বৃতাশ্চাপ্সরসাং গণৈঃ

ধৃতরাষ্ট্রস্য চ তদা দিব্যং চক্ষুর্নরাধিপ
মুনিঃ সত্যবতীপুত্রঃ প্রীতঃ প্রাদাত্তপোবলাৎ

দিব্যজ্ঞানবলোপেতা গান্ধারী চ যশস্বিনী
দদর্শ পুত্রাংস্তান্সর্বান্যে চান্যেঽপি রণে হতাঃ

তদদ্ভুতমচিন্ত্যং চ সুমহদ্রোমহর্ষণম্
বিস্মিতঃ স জনঃ সর্বো দদর্শানিমিষেক্ষণঃ

তদুত্সবমদোদগ্রং হৃষ্টনারীনরাকুলম্
দদৃশে বলমায়ান্তং চিত্রং পটগতং যথা

ধৃতরাষ্ট্রস্তু তান্সর্বান্পশ্যন্দিব্যেন চক্ষুষা
মুমুদে ভরতশ্রেষ্ঠ প্রসাদাত্তস্য বৈ মুনেঃ