UtshovChapter 40
40.1
वैशंपायन उवाच
ततो निशायां प्राप्तायां कृतसायाह्निकक्रियाः
व्यासमभ्यगमन्सर्वे ये तत्रासन्समागताः
Vaishampayana uvacha
Tato nishayam praptayam kritasayahnikakriyah
Vyasamabhyagamansarve ye tatrasansamagatah
40.2
धृतराष्ट्रस्तु धर्मात्मा पाण्डवैः सहितस्तदा
शुचिरेकमनाः सार्धमृषिभिस्तैरुपाविशत्
Dhritarashtrastu dharmatma pandavaih sahitastada
Shuchirekamanah sardhamrishibhistairupavishat
40.3
गान्धार्या सह नार्यस्तु सहिताः समुपाविशन्
पौरजानपदश्चापि जनः सर्वो यथावयः
Gandharya saha naryastu sahitah samupavishan
Paurajanapadashchapi janah sarvo yathavayah
40.4
ततो व्यासो महातेजाः पुण्यं भागीरथीजलम्
अवगाह्याजुहावाथ सर्वाँल्लोकान्महामुनिः
Tato vyaso mahatejah punyam bhagirathijalam
Avagahyajuhavatha sarvanllokanmahamunih
40.5
पाण्डवानां च ये योधाः कौरवाणां च सर्वशः
राजानश्च महाभागा नानादेशनिवासिनः
Pandavanam cha ye yodhah kauravanam cha sarvashah
Rajanashcha mahabhaga nanadeshanivasinah
40.6
ततः सुतुमुलः शब्दो जलान्तर्जनमेजय
प्रादुरासीद्यथा पूर्वं कुरुपाण्डवसेनयोः
Tatah sutumulah shabdo jalantarjanamejaya
Pradurasidyatha purvam kurupandavasenayoh
40.7
ततस्ते पार्थिवाः सर्वे भीष्मद्रोणपुरोगमाः
ससैन्याः सलिलात्तस्मात्समुत्तस्थुः सहस्रशः
Tataste parthivah sarve bhishmadronapurogamah
Sasainyah salilattasmatsamuttasthuh sahasrashah
40.8
विराटद्रुपदौ चोभौ सपुत्रौ सहसैनिकौ
द्रौपदेयाश्च सौभद्रो राक्षसश्च घटोत्कचः
Viratadrupadau chobhau saputrau sahasainikau
Draupadeyashcha saubhadro rakshasashcha ghatotkachah
40.9
कर्णदुर्योधनौ चोभौ शकुनिश्च महारथः
दुःशासनादयश्चैव धार्तराष्ट्रा महारथाः
Karnaduryodhanau chobhau shakunishcha maharathah
Duhshasanadayashchaiva dhartarashtra maharathah
40.10
जारासंधिर्भगदत्तो जलसंधश्च पार्थिवः
भूरिश्रवाः शलः शल्यो वृषसेनश्च सानुजः
Jarasandhirbhagadatto jalasandhashcha parthivah
Bhurishravah shalah shalyo vrishasenashcha sanujah
40.11
लक्ष्मणो राजपुत्रश्च धृष्टद्युम्नस्य चात्मजाः
शिखण्डिपुत्राः सर्वे च धृष्टकेतुश्च सानुजः
Lakshmano rajaputrashcha dhrishtadyumnasya chatmajah
Shikhandiputrah sarve cha dhrishtaketushcha sanujah
40.12
अचलो वृषकश्चैव राक्षसश्चाप्यलायुधः
बाह्लीकः सोमदत्तश्च चेकितानश्च पार्थिवः
Achalo vrishakashchaiva rakshasashchapyalayudhah
Bahlikah somadattashcha chekitanashcha parthivah
40.13
एते चान्ये च बहवो बहुत्वाद्ये न कीर्तिताः
सर्वे भासुरदेहास्ते समुत्तस्थुर्जलात्ततः
Ete chanye cha bahavo bahutvadye na kirtitah
Sarve bhasuradehaste samuttasthurjalattatah
40.14
यस्य वीरस्य यो वेषो यो ध्वजो यच्च वाहनम्
तेन तेन व्यदृश्यन्त समुपेता नराधिपाः
Yasya virasya yo vesho yo dhvajo yachcha vahanam
Tena tena vyadrishyanta samupeta naradhipah
40.15
दिव्याम्बरधराः सर्वे सर्वे भ्राजिष्णुकुण्डलाः
निर्वैरा निरहंकारा विगतक्रोधमन्यवः
Divyambaradharah sarve sarve bhrajishnukundalah
Nirvaira nirahankara vigatakrodhamanyavah
40.16
गन्धर्वैरुपगीयन्तः स्तूयमानाश्च बन्दिभिः
दिव्यमाल्याम्बरधरा वृताश्चाप्सरसां गणैः
Gandharvairupagiyantah stuyamanashcha bandibhih
Divyamalyambaradhara vritashchapsarasam ganaih
40.17
धृतराष्ट्रस्य च तदा दिव्यं चक्षुर्नराधिप
मुनिः सत्यवतीपुत्रः प्रीतः प्रादात्तपोबलात्
Dhritarashtrasya cha tada divyam chakshurnaradhipa
Munih satyavatiputrah pritah pradattapobalat
40.18
दिव्यज्ञानबलोपेता गान्धारी च यशस्विनी
ददर्श पुत्रांस्तान्सर्वान्ये चान्येऽपि रणे हताः
Divyagyanabalopeta gandhari cha yashasvini
Dadarsha putranstansarvanye chanyepi rane hatah
40.19
तदद्भुतमचिन्त्यं च सुमहद्रोमहर्षणम्
विस्मितः स जनः सर्वो ददर्शानिमिषेक्षणः
Tadadbhutamachintyam cha sumahadromaharshanam
Vismitah sa janah sarvo dadarshanimishekshanah
40.20
तदुत्सवमदोदग्रं हृष्टनारीनराकुलम्
ददृशे बलमायान्तं चित्रं पटगतं यथा
Tadutsavamadodagram hrishtanarinarakulam
Dadrishe balamayantam chitram patagatam yatha
40.21
धृतराष्ट्रस्तु तान्सर्वान्पश्यन्दिव्येन चक्षुषा
मुमुदे भरतश्रेष्ठ प्रसादात्तस्य वै मुनेः
Dhritarashtrastu tansarvanpashyandivyena chakshusha
Mumude bharatashreshtha prasadattasya vai muneh