UtshovChapter 41
41.1
वैशंपायन उवाच
ततस्ते भरतश्रेष्ठाः समाजग्मुः परस्परम्
विगतक्रोधमात्सर्याः सर्वे विगतकल्मषाः
Vaishampayana uvacha
Tataste bharatashreshthah samajagmuh parasparam
Vigatakrodhamatsaryah sarve vigatakalmashah
41.2
विधिं परममास्थाय ब्रह्मर्षिविहितं शुभम्
संप्रीतमनसः सर्वे देवलोक इवामराः
Vidhim paramamasthaya brahmarshivihitam shubham
Sampritamanasah sarve devaloka ivamarah
41.3
पुत्रः पित्रा च मात्रा च भार्या च पतिना सह
भ्राता भ्रात्रा सखा चैव सख्या राजन्समागताः
Putrah pitra cha matra cha bharya cha patina saha
Bhrata bhratra sakha chaiva sakhya rajansamagatah
41.4
पाण्डवास्तु महेष्वासं कर्णं सौभद्रमेव च
संप्रहर्षात्समाजग्मुर्द्रौपदेयांश्च सर्वशः
Pandavastu maheshvasam karnam saubhadrameva cha
Sampraharshatsamajagmurdraupadeyanshcha sarvashah
41.5
ततस्ते प्रीयमाणा वै कर्णेन सह पाण्डवाः
समेत्य पृथिवीपालाः सौहृदेऽवस्थिताभवन्
Tataste priyamana vai karnena saha pandavah
Sametya prithivipalah sauhridevasthitabhavan
41.6
ऋषिप्रसादात्तेऽन्ये च क्षत्रिया नष्टमन्यवः
असौहृदं परित्यज्य सौहृदे पर्यवस्थिताः
Rishiprasadattenye cha kshatriya nashtamanyavah
Asauhridam parityajya sauhride paryavasthitah
41.7
एवं समागताः सर्वे गुरुभिर्बान्धवैस्तथा
पुत्रैश्च पुरुषव्याघ्राः कुरवोऽन्ये च मानवाः
Evam samagatah sarve gurubhirbandhavaistatha
Putraishcha purushavyaghrah kuravonye cha manavah
41.8
तां रात्रिमेकां कृत्स्नां ते विहृत्य प्रीतमानसाः
मेनिरे परितोषेण नृपाः स्वर्गसदो यथा
Tam ratrimekam kritsnam te vihritya pritamanasah
Menire paritoshena nripah svargasado yatha
41.9
नात्र शोको भयं त्रासो नारतिर्नायशोऽभवत्
परस्परं समागम्य योधानां भरतर्षभ
Natra shoko bhayam traso naratirnayashobhavat
Parasparam samagamya yodhanam bharatarshabha
41.10
समागतास्ताः पितृभिर्भ्रातृभिः पतिभिः सुतैः
मुदं परमिकां प्राप्य नार्यो दुःखमथात्यजन्
Samagatastah pitribhirbhratribhih patibhih sutaih
Mudam paramikam prapya naryo duhkhamathatyajan
41.11
एकां रात्रिं विहृत्यैवं ते वीरास्ताश्च योषितः
आमन्त्र्यान्योन्यमाश्लिष्य ततो जग्मुर्यथागतम्
Ekam ratrim vihrityaivam te virastashcha yoshitah
Amantryanyonyamashlishya tato jagmuryathagatam
41.12
ततो विसर्जयामास लोकांस्तान्मुनिपुंगवः
क्षणेनान्तर्हिताश्चैव प्रेक्षतामेव तेऽभवन्
Tato visarjayamasa lokanstanmunipungavah
Kshanenantarhitashchaiva prekshatameva tebhavan
41.13
अवगाह्य महात्मानः पुण्यां त्रिपथगां नदीम्
सरथाः सध्वजाश्चैव स्वानि स्थानानि भेजिरे
Avagahya mahatmanah punyam tripathagam nadim
Sarathah sadhvajashchaiva svani sthanani bhejire
41.14
देवलोकं ययुः केचित्केचिद्ब्रह्मसदस्तथा
केचिच्च वारुणं लोकं केचित्कौबेरमाप्नुवन्
Devalokam yayuh kechitkechidbrahmasadastatha
Kechichcha varunam lokam kechitkauberamapnuvan
41.15
तथा वैवस्वतं लोकं केचिच्चैवाप्नुवन्नृपाः
राक्षसानां पिशाचानां केचिच्चाप्युत्तरान्कुरून्
Tatha vaivasvatam lokam kechichchaivapnuvannripah
Rakshasanam pishachanam kechichchapyuttarankurun
41.16
विचित्रगतयः सर्वे या अवाप्यामरैः सह
आजग्मुस्ते महात्मानः सवाहाः सपदानुगाः
Vichitragatayah sarve ya avapyamaraih saha
Ajagmuste mahatmanah savahah sapadanugah
41.17
गतेषु तेषु सर्वेषु सलिलस्थो महामुनिः
धर्मशीलो महातेजाः कुरूणां हितकृत्सदा
ततः प्रोवाच ताः सर्वाः क्षत्रिया निहतेश्वराः
Gateshu teshu sarveshu salilastho mahamunih
Dharmashilo mahatejah kurunam hitakritsada
Tatah provacha tah sarvah kshatriya nihateshvarah
41.18
या याः पतिकृताँल्लोकानिच्छन्ति परमस्त्रियः
ता जाह्नवीजलं क्षिप्रमवगाहन्त्वतन्द्रिताः
Ya yah patikritanllokanichchhanti paramastriyah
Ta jahnavijalam kshipramavagahantvatandritah
41.19
ततस्तस्य वचः श्रुत्वा श्रद्दधाना वराङ्गनाः
श्वशुरं समनुज्ञाप्य विविशुर्जाह्नवीजलम्
Tatastasya vachah shrutva shraddadhana varanganah
Shvashuram samanugyapya vivishurjahnavijalam
41.20
विमुक्ता मानुषैर्देहैस्ततस्ता भर्तृभिः सह
समाजग्मुस्तदा साध्व्यः सर्वा एव विशां पते
Vimukta manushairdehaistatasta bhartribhih saha
Samajagmustada sadhvyah sarva eva visham pate
41.21
एवं क्रमेण सर्वास्ताः शीलवत्यः कुलस्त्रियः
प्रविश्य तोयं निर्मुक्ता जग्मुर्भर्तृसलोकताम्
Evam kramena sarvastah shilavatyah kulastriyah
Pravishya toyam nirmukta jagmurbhartrisalokatam
41.22
दिव्यरूपसमायुक्ता दिव्याभरणभूषिताः
दिव्यमाल्याम्बरधरा यथासां पतयस्तथा
Divyarupasamayukta divyabharanabhushitah
Divyamalyambaradhara yathasam patayastatha
41.23
ताः शीलसत्त्वसंपन्ना वितमस्का गतक्लमाः
सर्वाः सर्वगुणैर्युक्ताः स्वं स्वं स्थानं प्रपेदिरे
Tah shilasattvasampanna vitamaska gataklamah
Sarvah sarvagunairyuktah svam svam sthanam prapedire
41.24
यस्य यस्य च यः कामस्तस्मिन्कालेऽभवत्तदा
तं तं विसृष्टवान्व्यासो वरदो धर्मवत्सलः
Yasya yasya cha yah kamastasminkalebhavattada
Tam tam visrishtavanvyaso varado dharmavatsalah
41.25
तच्छ्रुत्वा नरदेवानां पुनरागमनं नराः
जहृषुर्मुदिताश्चासन्नन्यदेहगता अपि
Tachchhrutva naradevanam punaragamanam narah
Jahrishurmuditashchasannanyadehagata api
41.26
प्रियैः समागमं तेषां य इमं शृणुयान्नरः
प्रियाणि लभते नित्यमिह च प्रेत्य चैव ह
Priyaih samagamam tesham ya imam shrinuyannarah
Priyani labhate nityamiha cha pretya chaiva ha
41.27
इष्टबान्धवसंयोगमनायासमनामयम्
य इमं श्रावयेद्विद्वान्संसिद्धिं प्राप्नुयात्पराम्
Ishtabandhavasanyogamanayasamanamayam
Ya imam shravayedvidvansansiddhim prapnuyatparam
41.28
स्वाध्याययुक्ताः पुरुषाः क्रियायुक्ताश्च भारत
अध्यात्मयोगयुक्ताश्च धृतिमन्तश्च मानवाः
श्रुत्वा पर्व त्विदं नित्यमवाप्स्यन्ति परां गतिम्
Svadhyayayuktah purushah kriyayuktashcha bharata
Adhyatmayogayuktashcha dhritimantashcha manavah
Shrutva parva tvidam nityamavapsyanti param gatim