UtshovChapter 27
27.1
वैशंपायन उवाच
नारदस्य तु तद्वाक्यं प्रशशंसुर्द्विजोत्तमाः
शतयूपस्तु राजर्षिर्नारदं वाक्यमब्रवीत्
Vaishampayana uvacha
Naradasya tu tadvakyam prashashansurdvijottamah
Shatayupastu rajarshirnaradam vakyamabravit
27.2
अहो भगवता श्रद्धा कुरुराजस्य वर्धिता
सर्वस्य च जनस्यास्य मम चैव महाद्युते
Aho bhagavata shraddha kururajasya vardhita
Sarvasya cha janasyasya mama chaiva mahadyute
27.3
अस्ति काचिद्विवक्षा तु मम तां गदतः शृणु
धृतराष्ट्रं प्रति नृपं देवर्षे लोकपूजित
Asti kachidvivaksha tu mama tam gadatah shrinu
Dhritarashtram prati nripam devarshe lokapujita
27.4
सर्ववृत्तान्ततत्त्वज्ञो भवान्दिव्येन चक्षुषा
युक्तः पश्यसि देवर्षे गतीर्वै विविधा नृणाम्
Sarvavrittantatattvagyo bhavandivyena chakshusha
Yuktah pashyasi devarshe gatirvai vividha nrinam
27.5
उक्तवान्नृपतीनां त्वं महेन्द्रस्य सलोकताम्
न त्वस्य नृपतेर्लोकाः कथितास्ते महामुने
Uktavannripatinam tvam mahendrasya salokatam
Na tvasya nripaterlokah kathitaste mahamune
27.6
स्थानमस्य क्षितिपतेः श्रोतुमिच्छाम्यहं विभो
त्वत्तः कीदृक्कदा वेति तन्ममाचक्ष्व पृच्छतः
Sthanamasya kshitipateh shrotumichchhamyaham vibho
Tvattah kidrikkada veti tanmamachakshva prichchhatah
27.7
इत्युक्तो नारदस्तेन वाक्यं सर्वमनोनुगम्
व्याजहार सतां मध्ये दिव्यदर्शी महातपाः
Ityukto naradastena vakyam sarvamanonugam
Vyajahara satam madhye divyadarshi mahatapah
27.8
यदृच्छया शक्रसदो गत्वा शक्रं शचीपतिम्
दृष्टवानस्मि राजर्षे तत्र पाण्डुं नराधिपम्
Yadrichchhaya shakrasado gatva shakram shachipatim
Drishtavanasmi rajarshe tatra pandum naradhipam
27.9
तत्रेयं धृतराष्ट्रस्य कथा समभवन्नृप
तपसो दुश्चरस्यास्य यदयं तप्यते नृपः
Tatreyam dhritarashtrasya katha samabhavannripa
Tapaso dushcharasyasya yadayam tapyate nripah
27.10
तत्राहमिदमश्रौषं शक्रस्य वदतो नृप
वर्षाणि त्रीणि शिष्टानि राज्ञोऽस्य परमायुषः
Tatrahamidamashrausham shakrasya vadato nripa
Varshani trini shishtani ragyosya paramayushah
27.11
ततः कुबेरभवनं गान्धारीसहितो नृपः
विहर्ता धृतराष्ट्रोऽयं राजराजाभिपूजितः
Tatah kuberabhavanam gandharisahito nripah
Viharta dhritarashtroyam rajarajabhipujitah
27.12
कामगेन विमानेन दिव्याभरणभूषितः
ऋषिपुत्रो महाभागस्तपसा दग्धकिल्बिषः
Kamagena vimanena divyabharanabhushitah
Rishiputro mahabhagastapasa dagdhakilbishah
27.13
संचरिष्यति लोकांश्च देवगन्धर्वरक्षसाम्
स्वच्छन्देनेति धर्मात्मा यन्मां त्वं परिपृच्छसि
Sancharishyati lokanshcha devagandharvarakshasam
Svachchhandeneti dharmatma yanmam tvam pariprichchhasi
27.14
देवगुह्यमिदं प्रीत्या मया वः कथितं महत्
भवन्तो हि श्रुतधनास्तपसा दग्धकिल्बिषाः
Devaguhyamidam pritya maya vah kathitam mahat
Bhavanto hi shrutadhanastapasa dagdhakilbishah
27.15
इति ते तस्य तच्छ्रुत्वा देवर्षेर्मधुरं वचः
सर्वे सुमनसः प्रीता बभूवुः स च पार्थिवः
Iti te tasya tachchhrutva devarshermadhuram vachah
Sarve sumanasah prita babhuvuh sa cha parthivah
27.16
एवं कथाभिरन्वास्य धृतराष्ट्रं मनीषिणः
विप्रजग्मुर्यथाकामं ते सिद्धगतिमास्थिताः
Evam kathabhiranvasya dhritarashtram manishinah
Viprajagmuryathakamam te siddhagatimasthitah