UtshovChapter 18
18.1
अर्जुन उवाच
भीम ज्येष्ठो गुरुर्मे त्वं नातोऽन्यद्वक्तुमुत्सहे
धृतराष्ट्रो हि राजर्षिः सर्वथा मानमर्हति
Arjuna uvacha
Bhima jyeshtho gururme tvam natonyadvaktumutsahe
Dhritarashtro hi rajarshih sarvatha manamarhati
18.2
न स्मरन्त्यपराद्धानि स्मरन्ति सुकृतानि च
असंभिन्नार्थमर्यादाः साधवः पुरुषोत्तमाः
Na smarantyaparaddhani smaranti sukritani cha
Asambhinnarthamaryadah sadhavah purushottamah
18.3
इदं मद्वचनात्क्षत्तः कौरवं ब्रूहि पार्थिवम्
यावदिच्छति पुत्राणां दातुं तावद्ददाम्यहम्
Idam madvachanatkshattah kauravam bruhi parthivam
Yavadichchhati putranam datum tavaddadamyaham
18.4
भीष्मादीनां च सर्वेषां सुहृदामुपकारिणाम्
मम कोशादिति विभो मा भूद्भीमः सुदुर्मनाः
Bhishmadinam cha sarvesham suhridamupakarinam
Mama koshaditi vibho ma bhudbhimah sudurmanah
18.5
वैशंपायन उवाच
इत्युक्ते धर्मराजस्तमर्जुनं प्रत्यपूजयत्
भीमसेनः कटाक्षेण वीक्षां चक्रे धनंजयम्
Vaishampayana uvacha
Ityukte dharmarajastamarjunam pratyapujayat
Bhimasenah katakshena viksham chakre dhananjayam
18.6
ततः स विदुरं धीमान्वाक्यमाह युधिष्ठिरः
न भीमसेने कोपं स नृपतिः कर्तुमर्हति
Tatah sa viduram dhimanvakyamaha yudhishthirah
Na bhimasene kopam sa nripatih kartumarhati
18.7
परिक्लिष्टो हि भीमोऽयं हिमवृष्ट्यातपादिभिः
दुःखैर्बहुविधैर्धीमानरण्ये विदितं तव
Pariklishto hi bhimoyam himavrishtyatapadibhih
Duhkhairbahuvidhairdhimanaranye viditam tava
18.8
किं तु मद्वचनाद्ब्रूहि राजानं भरतर्षभम्
यद्यदिच्छसि यावच्च गृह्यतां मद्गृहादिति
Kim tu madvachanadbruhi rajanam bharatarshabham
Yadyadichchhasi yavachcha grihyatam madgrihaditi
18.9
यन्मात्सर्यमयं भीमः करोति भृशदुःखितः
न तन्मनसि कर्तव्यमिति वाच्यः स पार्थिवः
Yanmatsaryamayam bhimah karoti bhrishaduhkhitah
Na tanmanasi kartavyamiti vachyah sa parthivah
18.10
यन्ममास्ति धनं किंचिदर्जुनस्य च वेश्मनि
तस्य स्वामी महाराज इति वाच्यः स पार्थिवः
Yanmamasti dhanam kinchidarjunasya cha veshmani
Tasya svami maharaja iti vachyah sa parthivah
18.11
ददातु राजा विप्रेभ्यो यथेष्टं क्रियतां व्ययः
पुत्राणां सुहृदां चैव गच्छत्वानृण्यमद्य सः
Dadatu raja viprebhyo yatheshtam kriyatam vyayah
Putranam suhridam chaiva gachchhatvanrinyamadya sah
18.12
इदं चापि शरीरं मे तवायत्तं जनाधिप
धनानि चेति विद्धि त्वं क्षत्तर्नास्त्यत्र संशयः
Idam chapi shariram me tavayattam janadhipa
Dhanani cheti viddhi tvam kshattarnastyatra sanshayah