UtshovChapter 17
17.1
वैशंपायन उवाच
व्युषितायां रजन्यां तु धृतराष्ट्रोऽम्बिकासुतः
विदुरं प्रेषयामास युधिष्ठिरनिवेशनम्
Vaishampayana uvacha
Vyushitayam rajanyam tu dhritarashtrombikasutah
Viduram preshayamasa yudhishthiraniveshanam
17.2
स गत्वा राजवचनादुवाचाच्युतमीश्वरम्
युधिष्ठिरं महातेजाः सर्वबुद्धिमतां वरः
Sa gatva rajavachanaduvachachyutamishvaram
Yudhishthiram mahatejah sarvabuddhimatam varah
17.3
धृतराष्ट्रो महाराज वनवासाय दीक्षितः
गमिष्यति वनं राजन्कार्त्तिकीमागतामिमाम्
Dhritarashtro maharaja vanavasaya dikshitah
Gamishyati vanam rajankarttikimagatamimam
17.4
स त्वा कुरुकुलश्रेष्ठ किंचिदर्थमभीप्सति
श्राद्धमिच्छति दातुं स गाङ्गेयस्य महात्मनः
Sa tva kurukulashreshtha kinchidarthamabhipsati
Shraddhamichchhati datum sa gangeyasya mahatmanah
17.5
द्रोणस्य सोमदत्तस्य बाह्लीकस्य च धीमतः
पुत्राणां चैव सर्वेषां ये चास्य सुहृदो हताः
यदि चाभ्यनुजानीषे सैन्धवापसदस्य च
Dronasya somadattasya bahlikasya cha dhimatah
Putranam chaiva sarvesham ye chasya suhrido hatah
Yadi chabhyanujanishe saindhavapasadasya cha
17.6
एतच्छ्रुत्वा तु वचनं विदुरस्य युधिष्ठिरः
हृष्टः संपूजयामास गुडाकेशश्च पाण्डवः
Etachchhrutva tu vachanam vidurasya yudhishthirah
Hrishtah sampujayamasa gudakeshashcha pandavah
17.7
न तु भीमो दृढक्रोधस्तद्वचो जगृहे तदा
विदुरस्य महातेजा दुर्योधनकृतं स्मरन्
Na tu bhimo dridhakrodhastadvacho jagrihe tada
Vidurasya mahateja duryodhanakritam smaran
17.8
अभिप्रायं विदित्वा तु भीमसेनस्य फल्गुनः
किरीटी किंचिदानम्य भीमं वचनमब्रवीत्
Abhiprayam viditva tu bhimasenasya phalgunah
Kiriti kinchidanamya bhimam vachanamabravit
17.9
भीम राजा पिता वृद्धो वनवासाय दीक्षितः
दातुमिच्छति सर्वेषां सुहृदामौर्ध्वदेहिकम्
Bhima raja pita vriddho vanavasaya dikshitah
Datumichchhati sarvesham suhridamaurdhvadehikam
17.10
भवता निर्जितं वित्तं दातुमिच्छति कौरवः
भीष्मादीनां महाबाहो तदनुज्ञातुमर्हसि
Bhavata nirjitam vittam datumichchhati kauravah
Bhishmadinam mahabaho tadanugyatumarhasi
17.11
दिष्ट्या त्वद्य महाबाहो धृतराष्ट्रः प्रयाचति
याचितो यः पुरास्माभिः पश्य कालस्य पर्ययम्
Dishtya tvadya mahabaho dhritarashtrah prayachati
Yachito yah purasmabhih pashya kalasya paryayam
17.12
योऽसौ पृथिव्याः कृत्स्नाया भर्ता भूत्वा नराधिपः
परैर्विनिहतापत्यो वनं गन्तुमभीप्सति
Yosau prithivyah kritsnaya bharta bhutva naradhipah
Parairvinihatapatyo vanam gantumabhipsati
17.13
मा तेऽन्यत्पुरुषव्याघ्र दानाद्भवतु दर्शनम्
अयशस्यमतोऽन्यत्स्यादधर्म्यं च महाभुज
Ma tenyatpurushavyaghra danadbhavatu darshanam
Ayashasyamatonyatsyadadharmyam cha mahabhuja
17.14
राजानमुपतिष्ठस्व ज्येष्ठं भ्रातरमीश्वरम्
अर्हस्त्वमसि दातुं वै नादातुं भरतर्षभ
एवं ब्रुवाणं कौन्तेयं धर्मराजोऽभ्यपूजयत्
Rajanamupatishthasva jyeshtham bhrataramishvaram
Arhastvamasi datum vai nadatum bharatarshabha
Evam bruvanam kaunteyam dharmarajobhyapujayat
17.15
भीमसेनस्तु सक्रोधः प्रोवाचेदं वचस्तदा
वयं भीष्मस्य कुर्मेह प्रेतकार्याणि फल्गुन
Bhimasenastu sakrodhah provachedam vachastada
Vayam bhishmasya kurmeha pretakaryani phalguna
17.16
सोमदत्तस्य नृपतेर्भूरिश्रवस एव च
बाह्लीकस्य च राजर्षेर्द्रोणस्य च महात्मनः
Somadattasya nripaterbhurishravasa eva cha
Bahlikasya cha rajarsherdronasya cha mahatmanah
17.17
अन्येषां चैव सुहृदां कुन्ती कर्णाय दास्यति
श्राद्धानि पुरुषव्याघ्र मादात्कौरवको नृपः
Anyesham chaiva suhridam kunti karnaya dasyati
Shraddhani purushavyaghra madatkauravako nripah
17.18
इति मे वर्तते बुद्धिर्मा वो नन्दन्तु शत्रवः
कष्टात्कष्टतरं यान्तु सर्वे दुर्योधनादयः
यैरियं पृथिवी सर्वा घातिता कुलपांसनैः
Iti me vartate buddhirma vo nandantu shatravah
Kashtatkashtataram yantu sarve duryodhanadayah
Yairiyam prithivi sarva ghatita kulapansanaih
17.19
कुतस्त्वमद्य विस्मृत्य वैरं द्वादशवार्षिकम्
अज्ञातवासगमनं द्रौपदीशोकवर्धनम्
क्व तदा धृतराष्ट्रस्य स्नेहोऽस्मास्वभवत्तदा
Kutastvamadya vismritya vairam dvadashavarshikam
Agyatavasagamanam draupadishokavardhanam
Kva tada dhritarashtrasya snehosmasvabhavattada
17.20
कृष्णाजिनोपसंवीतो हृताभरणभूषणः
सार्धं पाञ्चालपुत्र्या त्वं राजानमुपजग्मिवान्
क्व तदा द्रोणभीष्मौ तौ सोमदत्तोऽपि वाभवत्
Krishnajinopasanvito hritabharanabhushanah
Sardham panchalaputrya tvam rajanamupajagmivan
Kva tada dronabhishmau tau somadattopi vabhavat
17.21
यत्र त्रयोदश समा वने वन्येन जीवसि
न तदा त्वा पिता ज्येष्ठः पितृत्वेनाभिवीक्षते
Yatra trayodasha sama vane vanyena jivasi
Na tada tva pita jyeshthah pitritvenabhivikshate
17.22
किं ते तद्विस्मृतं पार्थ यदेष कुलपांसनः
दुर्वृत्तो विदुरं प्राह द्यूते किं जितमित्युत
Kim te tadvismritam partha yadesha kulapansanah
Durvritto viduram praha dyute kim jitamityuta
17.23
तमेवंवादिनं राजा कुन्तीपुत्रो युधिष्ठिरः
उवाच भ्रातरं धीमाञ्जोषमास्वेति भर्त्सयन्
Tamevanvadinam raja kuntiputro yudhishthirah
Uvacha bhrataram dhimanjoshamasveti bhartsayan