অধ্যায় 8

8.1

ব্যাস উবাচ
যুধিষ্ঠির মহাবাহো যদাহ কুরুনন্দনঃ
ধৃতরাষ্ট্রো মহাত্মা ত্বাং তত্কুরুষ্বাবিচারয়ন্

অয়ং হি বৃদ্ধো নৃপতির্হতপুত্রো বিশেষতঃ
নেদং কৃচ্ছ্রং চিরতরং সহেদিতি মতির্মম

গান্ধারী চ মহাভাগা প্রাজ্ঞা করুণবেদিনী
পুত্রশোকং মহারাজ ধৈর্যেণোদ্বহতে ভৃশম্

অহমপ্যেতদেব ত্বাং ব্রবীমি কুরু মে বচঃ
অনুজ্ঞাং লভতাং রাজা মা বৃথেহ মরিষ্যতি

রাজর্ষীণাং পুরাণানামনুয়াতু গতিং নৃপঃ
রাজর্ষীণাং হি সর্বেষামন্তে বনমুপাশ্রয়ঃ

বৈশংপায়ন উবাচ
ইত্যুক্তঃ স তদা রাজা ব্যাসেনাদ্ভুতকর্মণা
প্রত্যুবাচ মহাতেজা ধর্মরাজো যুধিষ্ঠিরঃ

ভগবানেব নো মান্যো ভগবানেব নো গুরুঃ
ভগবানস্য রাজ্যস্য কুলস্য চ পরায়ণম্

অহং তু পুত্রো ভগবান্পিতা রাজা গুরুশ্চ মে
নিদেশবর্তী চ পিতুঃ পুত্রো ভবতি ধর্মতঃ

ইত্যুক্তঃ স তু তং প্রাহ ব্যাসো ধর্মভৃতাং বরঃ
যুধিষ্ঠিরং মহাতেজাঃ পুনরেব বিশাং পতে

এবমেতন্মহাবাহো যথা বদসি ভারত
রাজায়ং বৃদ্ধতাং প্রাপ্তঃ প্রমাণে পরমে স্থিতঃ

সোঽয়ং ময়াভ্যনুজ্ঞাতস্ত্বয়া চ পৃথিবীপতে
করোতু স্বমভিপ্রায়ং মাস্য বিঘ্নকরো ভব

এষ এব পরো ধর্মো রাজর্ষীণাং যুধিষ্ঠির
সমরে বা ভবেন্মৃত্যুর্বনে বা বিধিপূর্বকম্

পিত্রা তু তব রাজেন্দ্র পাণ্ডুনা পৃথিবীক্ষিতা
শিষ্যভূতেন রাজায়ং গুরুবত্পর্যুপাসিতঃ

ক্রতুভির্দক্ষিণাবদ্ভিরন্নপর্বতশোভিতৈঃ
মহদ্ভিরিষ্টং ভোগাশ্চ ভুক্তাঃ পুত্রাশ্চ পালিতাঃ

পুত্রসংস্থং চ বিপুলং রাজ্যং বিপ্রোষিতে ত্বয়ি
ত্রয়োদশসমা ভুক্তং দত্তং চ বিবিধং বসু

ত্বয়া চায়ং নরব্যাঘ্র গুরুশুশ্রূষয়া নৃপঃ
আরাধিতঃ সভৃত্যেন গান্ধারী চ যশস্বিনী

অনুজানীহি পিতরং সময়োঽস্য তপোবিধৌ
ন মন্যুর্বিদ্যতে চাস্য সুসূক্ষ্মোঽপি যুধিষ্ঠির

এতাবদুক্ত্বা বচনমনুজ্ঞাপ্য চ পার্থিবম্
তথাস্ত্বিতি চ তেনোক্তঃ কৌন্তেয়েন যয়ৌ বনম্

গতে ভগবতি ব্যাসে রাজা পাণ্ডুসুতস্ততঃ
প্রোবাচ পিতরং বৃদ্ধং মন্দং মন্দমিবানতঃ

যদাহ ভগবান্ব্যাসো যচ্চাপি ভবতো মতম্
যদাহ চ মহেষ্বাসঃ কৃপো বিদুর এব চ

যুয়ুত্সুঃ সংজয়শ্চৈব তত্কর্তাস্ম্যহমঞ্জসা
সর্বে হ্যেতেঽনুমান্যা মে কুলস্যাস্য হিতৈষিণঃ

ইদং তু যাচে নৃপতে ত্বামহং শিরসা নতঃ
ক্রিয়তাং তাবদাহারস্ততো গচ্ছাশ্রমং প্রতি